اقتاۋدا كۆوتا ءبولۋ ءبولىمىنىڭ باستىعى پارامەن ۇستالدى

اقتاۋ. 28 ءساۋىر. ماڭعىستاۋ قارجى پوليتسياسىنىڭ قىزمەتكەرلەرى «ماڭعىستاۋ وبلىستىق اۋرۋحاناسى» شجق مكك جوعارى مامانداندىرىلعان مەديتسينالىق كومەكتى ەنگىزۋ جانە كۆوتالاندىرۋ ءبولىمىنىڭ باستىعىن پارا الۋ ۇستىندە قولعا ءتۇسىردى. بۇل تۋرالى وبلىستىق قارجى پوليتسياسىنىڭ ءباسپاسوز قىزمەتىنىڭ دەرەگىنە سىلتەمە جاساعان egemen.kz ءتىلشىسى حابارلادى. اتالعان ءبولىمنىڭ باستىعى عاليا قاليەۆا استانا قالاسىنداعى ۇلتتىق عىلىمي مەديتسينا ورتالىعىنا جەدەل ارادا جىبەرۋگە كۆوتا بەرۋ ءۇشىن 300 اقش دوللارىن الۋ كەزىندە ءوزىنىڭ قىزمەت بولمەسىندە قولما-قول ۇستالدى. ۇستىمىزدەگى جىلدىڭ 11 ساۋىرىندە الاياقتىق قىلمىس جاسادى دەگەن كۇدىكپەن ع.قاليەۆاعا قاتىستى قىلمىستىق ءىس قوزعالدى جانە ودان ەشقايدا كەتپەۋ تۋرالى قولحات الىندى. ماڭعىستاۋ وبلىسى بويىنشا ەكونوميكالىق سىبايلاستىق پەن جەمقورلىققا قارسى كۇرەس دەپارتامەنتى ءباسپاسوز قىزمەتىنىڭ حابارلاۋىنشا, قازىر قىلمىستىق ءىس تەرگەلۋدە. گۇلايىم شىنتەمىرقىزى. دەرەككوز: egemen.kz. فوتو: www.pandaland.kz.