قوعام • 05 شىلدە، 2022

5 ادام سۋعا كەتتى

22 رەت كورسەتىلدى

ماۋسىم ايىنىڭ 22-ءسى كۇنى شالقار كولىندە ۇرلەمەلى توسەكپەن سۋعا ءتۇسىپ جۇرگەن 9 جاسار بالانى تولقىن جاعادان الىس ايداپ اكەتكەن. قۇتقارۋشىلار 5 قايىقپەن، سۇڭگۋىر توپتارىمەن جابىلا ىزدەدى، كەلەسى كۇنى ىزدەۋ جۇمىسىنا تىكۇشاق قوسىلدى. الايدا ءۇش كۇننەن سوڭ بايعۇس بالانىڭ ءولى دەنەسى تابىلدى...

«وت پەن سۋ – ءتىلسىز جاۋ»، دەپ ەسكەرتەدى باتىس قازاقستان وبلىستىق توتەنشە جاعداي دەپارتامەنتى. جىل باسىنان بەرى وبلىس اۋماعىندا 5 ادام سۋعا كەتىپتى. بىلتىر وسى ۋاقىت ىشىندە سۋعا كەتكەن ادام سانى 12 بولعان ەكەن. كورسەتكىش ازاي­عانىمەن، وزەن-كولدەگى وقىس وقيعا­لاردىڭ الدىن الۋ مۇمكىن بولماي تۇر. «شىعاسىعا يەسى باسشى» دەگەندەي، كوپ جاعدايدا ادامداردىڭ بەيقامدىعى، قاراپايىم ساقتىق ەرەجەلەرىن ساقتاماۋى ورنى تولماس وكىنىشكە سوقتىرۋدا.

باتىس قازاقستان وبلىسىنىڭ اۋماعىندا 200-گە جۋىق وزەن، 144 كول بار، جازدىڭ ىستىق كۇندەرى حالىق دەمالۋ جانە قىدىرۋ ءۇشىن سۋ جاعالاپ كەتەدى. ال بۇكىل وبلىستا ارنايى جابدىقتالعان 19 عانا جاعاجاي بار ەكەن. بۇل جەرلەردە توتەنشە جاعداي دەپارتامەنتىنىڭ قۇتقارۋشى جاساقتارى – 46 ادام قاۋىپسىزدىكتى قاداعالايدى. ودان بولەك، حالىق كوپ جينالاتىن جاعاجايلاردا پوليتسيا، كولىكتىك باقىلاۋ ينسپەكتسياسى، جەرگىلىكتى اتقارۋشى ورگان وكىلدەرى جانە ەرىكتىلەر بىرلەسىپ، كۇن سايىن رەيدتىك ءىس-شارالار وتكىزەدى. بىراق سۋعا شومىلاتىن ءار ادامعا باقىلاۋ ورناتۋ مۇمكىن ەمەس.

– 2021 جىلمەن سالىستىرعاندا بيىل ارنايى جابدىقتالعان جاعاجاي سانى كوبەيدى. قازىر وبلىس اۋماعىندا 3 كوممۋنالدىق، 16 جەكە جاعاجاي حالىققا قىزمەت كورسەتۋدە. اتاپ ايتساق، بيىل ورال قالاسىندا، ءبورلى مەن جانىبەك اۋداندارىندا ءبىر-بىردەن كوممۋنالدىق جاعاجاي جاڭادان اشىلسا، بايتەرەك اۋدانىندا – 8، ورال قالاسىندا – 7، تاسقالا اۋدانىندا 1 جەكەمەنشىك جاعاجاي اشىلعان، – دەيدى باتىس قازاقستان وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ جەتەكشىسى باكيزات ماعزەنوۆا.

شومىلۋ كەزەڭىندە توتەنشە جاعداي­لارعا دەن قويۋ ءۇشىن وبلىستا 72 قۇتقارۋشى، 21 ءجۇزۋ قۇرالى، 1 كاتەر جانە پاترۋلدەۋ ءۇشىن 15 اۆتوموبيل دايىندالعان.

قازىر جاز كەزى، بارلىق جەردە وقۋشى­لاردىڭ جازعى دەمالىس لاگەرلەرى ءوتىپ جاتىر. وسى كەزەڭدە وبلىس بويىنشا 29 مودۋلدىك-قاڭقالى باسسەين اشىلعان. ولاردىڭ كوبى بالالار لاگەرلەرىندە جانە اۋدان ورتالىقتارىندا ورناتىلعان.

بۇگىندە توتەنشەلىكتەر سۋدا بولاتىن وقىس وقيعالاردان ساقتاندىرۋ ءۇشىن وقۋ­شى­لار اراسىندا پروفيلاكتيكالىق ءىس-شارالاردى جۇيەلى ۇيىمداستىرىپ وتىر. وبلىستىق دەنە شىنىقتىرۋ جانە سپورت باسقارماسىمەن اراداعى مەموراندۋمعا سايكەس جىل باسىنان بەرى 673 بالا جۇزۋگە ۇيرەنگەن. ال 1-28 ماۋسىم ارالىعىندا دەپارتامەنت وكىلدەرى 122 رەيدتىك ءىس-شارا وتكىزىپ، حالىققا 2 200 جادىناما تاراتقان.

 

باتىس قازاقستان وبلىسى

سوڭعى جاڭالىقتار

ەلوردا «جاسىل» ايماققا ءوتتى

كوروناۆيرۋس • كەشە

ۇقساس جاڭالىقتار