ايماقتار • 04 شىلدە، 2022

ەكى اۋىلعا گاز جەتتى

شيەلى اۋدانىندا ءبىر كۇندە اقمايا، العاباس اۋىلدارى گازعا قوسىلدى. وسىعان وراي ۇيىمداستىرىلعان ءىس-شاراعا اۋدان تۇرعىندارىمەن كەزدەسۋگە كەلگەن وبلىس اكىمى نۇرلىبەك نالىباەۆ قاتىسىپ، وسى كۇندى كوپتەن كۇتكەن تۇرعىنداردى قۋانىشىمەن قۇتتىقتادى. حالىقتىڭ تۇرمىسىنا قاجەتتى اۋىز سۋ، گاز تارتۋ، جول سالۋ ماسەلەلەرىنىڭ كەزەڭ-كەزەڭىمەن شەشىلەتىنىن ايتىپ ءوتتى.

مۇرات جەتپىسباەۆ

– بيىل اۋدان ورتالىعى – شيەلى كەنتى گازبەن تولىق قامتىلدى. جاقاەۆ، بيدايكول، بايسىن، ن.بەكەجانوۆ، قودامانوۆ ەلدى مەكەنىنىڭ تۇرعىندارى «كوگىلدىر وتىن» يگىلىگىن كورۋگە مۇمكىندىك الدى. تابيعي گاز – اۋىلداعىلاردىڭ قولىن وت جاعىپ، كۇل شىعارۋدان بوساتۋمەن قاتار، قورشاعان ورتانى قورعاۋعا، ورمان قورىن ساقتاۋعا مۇمكىندىك بەرەدى، – دەدى وبلىس باسشىسى.

ەلدى مەكەندى گازداندىرۋدى تۇرعىندار جىل سايىنعى ەسەپتى كەزدەسۋدە كوتەرىپ كەلگەن ەكەن. اقمايا اۋىلىنا تابيعي گاز تارتۋ ءۇشىن رەسپۋبليكالىق، جەرگىلىكتى بيۋدجەتتەردەن 460 ملن تەڭگە قارالعان. ال العاباس اۋىلىنا 488 ملن تەڭگە بولىنگەن. بۇگىندە اۋداندى تابيعي گازبەن قامتۋ ۇلەسى 56،4%-دى قۇراپ وتىر.

الداعى ۋاقىتتا اۋدانداعى بەستام، دوسبول داتقا، ەڭبەكشى، جيدەلىارىق ەلدى مەكەندەرىنە گاز قۇبىرىن جۇرگىزۋگە قاجەتتى بيۋدجەتتىك ءوتىنىم تاپسىرىلسا، المالى، تاجىباەۆ اۋىلدارى تۇرعىندارى «كوگىلدىر وتىنعا» قول جەتكىزۋ ءۇشىن جوبا-سمەتالىق قۇجاتتامالارى ازىرلەنىپ، ساراپتاماعا ۇسىنىلدى.

بيىل وبلىستا اۋىلداردى گازداندىرۋ بويىنشا 13 جوبانى ىسكە اسىرۋ باستالسا، ونىڭ 7-ەۋى وسى جىلى اياقتالادى. ناتيجەسىندە، 15 مىڭنان استام حالقى بار 7 ەلدى مەكەن تابيعي گازعا قوسىلىپ، ونى تۇتىناتىن حالىق سانىنىڭ ۇلەسى 68 پايىزعا جەتپەك.

شيەلىدەگى 2 اۋىل تابيعي گازعا قوسىلعان كۇنى كورشىلەس جاڭاقورعان اۋدانىنداعى بىرلىك، قىراش ەلدى مەكەندەرىنە اۋىلىشىلىك گاز تاراتۋ جەلىلەرىن تارتۋ باستالدى. وسى جۇمىس اياقتالعاندا بىرلىكتە 6 الەۋمەتتىك نىسان، 440 ءۇي، قىراش اۋىلىندا 5 الەۋمەتتىك نىسان مەن 124 ءۇي گازداندىرىلادى. سونىمەن قاتار اۋدانداعى تومەنارىق، شالقيا، قۇتتىقوجا، جايىلما، كەيدەن اۋىلدارىنا گاز جەلىسىن تارتۋ جوبالارى ازىرلەنىپ، مەملەكەتتىك ساراپتاما قورىتىندىلارى الىنعان.

قىزىلوردا وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز