كەيىنگى ەكى-ءۇش جىلدىڭ ىشىندە بارلىق مەملەكەت پاندەميا جاعدايىندا ءومىر ءسۇرىپ, ءوز ەلدەرىندە وتەتىن ءتۇرلى حالىقارالىق جارىستى كەيىنگە شەگەرىپ تاستادى. سونىڭ سالدارىنان سپورتشىلار كوپ جاعدايدا تەك ەل ىشىندەگى بىرىنشىلىكتەرمەن شەكتەلۋگە ءماجبۇر بولدى. سوندىقتان بوكستان ۇلتتىق قۇرامانىڭ باس باپكەرى قايرات ءساتجانوۆ وسى تۋرنيردە بىلتىرعى ەل چەمپيوناتىندا جارتىلاي فينالعا دەيىن جەتكەن بارلىق بوكسشىعا ءوزىن كورسەتۋگە مۇمكىندىك بەردى. ءسويتىپ, «ەلوردا كۋبوگىندا» ەرلەر اراسىندا قازاقستاننىڭ 54 بوكسشىسى سىنعا ءتۇستى. سونىڭ ىشىندە 16-سى فينالدىق ايقاسقا جولداما الدى. ارينە, جەرەبەگە بايلانىستى كەيبىر سالماق دارەجەلەرىندە قازاقستاندىق بوكسشىلار ءبىر-بىرىمەن ەرتە جولىعىپ, جارتىلاي فينال, فينال جولدامالارىن ءوزارا ساراپقا سالۋعا تۋرا كەلدى. ال تۇڭعىش رەت ۇيىمداستىرىلعان ءتۋرنيردىڭ فينالىنا بىلتىرعى الەم چەمپيوناتىنىڭ جەڭىمپازدارى تەمىرتاس ءجۇسىپوۆ (48 كگ) پەن ساكەن بيبوسىنوۆ (51 كگ), كۇمىس ءجۇل-
دەگەرى ماحمۇد سابىرحان (54 كگ) مەن سەرىك تەمىرجانوۆ (57 كگ), اعايىندى-ەگىزدەر ءساماتالى (60 كگ) مەن ءساناتالى تولتاەۆتار (63,5), نۇربەك (80 كگ) پەن ايبەك ورالباي (91 كگ) سىندى تاجىريبەلى بوكسشىلار جولداما الدى. سونداي-اق فينالدا كۋبانىڭ – ءتورت, وزبەكستاننىڭ – ءۇش, قىتايدىڭ – ءۇش, جاپونيانىڭ ءبىر بوكسشىسى ونەر كورسەتتى.
فينالدىق جەكپە-جەكتىڭ تۇساۋكەسەر كەزدەسۋىندە جەڭىل سالماقتاعى الەم جانە ازيا چەمپيونى, قازاقستان بىرىنشىلىگىنىڭ بەس دۇركىن جەڭىمپازى تەمىرتاس ءجۇسىپوۆ پەن وزبەكستاندىق جاس بوكسشى اسىلبەك جاليلوۆ جۇدىرىقتاستى. ءۇش راۋندقا جالعاسقان جەكپە-جەكتە تالاي دودالاردا دارا شىققان تاجىريبەلى جەرلەسىمىز 4:1 ەسەبىمەن ەش قيىندىقسىز جەڭىسكە جەتتى. ءسويتىپ, ءجۇسىپوۆ ەل قورجىنىنا تۋرنيردەگى العاشقى التىن جۇلدەنى سالدى.
قازاقستاندىق بوكسشىلاردان ەكىنشى بولىپ شارشى الاڭعا شىققان 51 كيلودا الەم چەمپيونى, توكيو وليمپياداسىنىڭ قولا جۇلدەگەرى ساكەن بيبوسىنوۆ كۋبانىڭ جاس قابىلانى الەحاندرو كلارا فيسسۋرمەن باس جۇلدەنى ساراپقا سالدى. اسا تارتىستى وتكەن باسەكەدە جەرلەسىمىزدىڭ باعى جاندى.
سونداي-اق 54 كيلو سالماقتا الەم چەمپيوناتىنىڭ كۇمىس جۇلدەگەرى, ەلىمىزدىڭ تالانتتى بوكسشىسى سابىرحان ماحمۇد قىتايلىق بو فانگتان 5:0 ەسەبىمەن باسىم ءتۇسىپ, تۇعىردىڭ بيىك ساتىسىنان كورىندى. ال 57 كيلو سالماقتىڭ فينالىندا الەم چەمپيوناتىنىڭ كۇمىس جۇلدەگەرى سەرىك تەمىرجانوۆ كۋبالىق وسۆەل كابالەرونىڭ وسال تۇسىن تابا ءبىلدى – 3:2.
60 كيلو سالماقتا قازاقستاندىق ەكى بوكسشى – ءساماتالى تولتاەۆ پەن تالعات سىرىمبەتوۆ جانكۇيەرلەرگە تاماشا بوكس جەكپە-جەگىن سىيلادى. س.تولتاەۆ جاستار اراسىنداعى ازيا چەمپيونى, وسى سالماقتاعى 2020 جىلعى ەل بىرىنشىلىگىنىڭ جەڭىمپازى سانالسا, ت.سىرىمبەتوۆ بىلتىر 54 كيلو سالماقتا توپ جارعان بولاتىن. فينالدا ول تاجىريبەلى بوكسشى ولجاس باينيازوۆتان باسىم تۇسكەن-ءدى. جارتى جىلدىڭ ىشىندە التى كيلو سالماق قوسقان تالعات جاڭا سالماقتى جاتسىنباي, فينالعا ەركىن جەتتى. الايدا سوڭعى جەكپە-جەكتە 60 كيلونىڭ «قوجايىنى» تولتاەۆتى جەڭۋگە شاماسى جەتپەدى.
ءساماتالىنىڭ ءىزىن الا رينگكە سىڭارى ءساناتالى شىقتى. 63,5 كيلو سالماقتا سىنعا تۇسكەن ول ەگىزىنىڭ جەڭىستى جولىن جالعاي المادى. شوقىر بولتەك ۇلى ءتۋرنيرىنىڭ قولا جۇلدەگەرى مۇحامەدسابىر بازارباي ۇلى فينالدا اعايىندى تولتاەۆتارعا ەكى سالماقتا توپ جارۋ مۇمكىندىگىن بەرمەدى. ءۇش راۋندتا دا مىقتىلىق تانىتقان مۇحامەدسابىر 5:0 ەسەبىمەن جەڭىسكە جەتتى. ال 67 كيلو سالماقتىڭ فينالىندا بىلتىرعى ەل چەمپيونى دۋلات بەكباۋوۆ پەن 63,5 كيلوداعى كۇمىس جۇلدەگەر, جاستار اراسىنداعى ازيا چەمپيونى ابزال سەرىك جۇدىرىقتاسىپ, ەكىنشىسى التىننان القا تاعىندى – 4:1.
«جەكپە-جەك» سپورت سارايىنا جينالعان جانكۇيەرلەر 71 كيلو سالماقتاعى بوكسشىلاردىڭ جەكپە-جەگىن قىزىعا تاماشالادى. بۇل سالماقتا قازاقستان چەمپيوناتىنىڭ ەكى دۇركىن جەڭىمپازى, ازيا ويىندارىنىڭ كۇمىس جۇلدەگەرى جەرلەسىمىز اسلان شىمبەرگەنوۆ پەن 2021 جىلى سەربيادا وتكەن الەم چەمپيوناتىنىڭ جەڭىمپازى جاپونيالىق سەۆون وكازاۆا ايقاستى. بەلگرادتاعى دودانىڭ جارتىلاي فينالىندا ابىلايحان ءجۇسىپوۆتى قاپى قالدىرعان جاپون بوكسشىسى بۇل جولى اسلانبەكتەن ايلاسىن اسىرا المادى. وتە ساۋاتتى جۇدىرىقتاسقان وتانداسىمىز ءۇش راۋندتا دا ايقىن باسىمدىققا يە بولىپ, تورەشىلەرگە بۇرا تارتاتىنداي مۇمكىندىك قالدىرمادى – 4:1.
وكىنىشكە قاراي, 75 كيلو سالماقتا بىردە-ءبىر بوكسشىمىز فينالعا شىعا المادى. الداعى ۋاقىتتا ءدال وسى سالماق باس باپكەر قايرات ءساتجانوۆتىڭ باس اۋرۋىنا اينالاتىن ءتۇرى بار. سەبەبى كەيىنگى جىلدارى بۇل سالماقتا جۇلدەنىڭ اۋىلى الىستاپ كەتتى. ءتۋرنيردىڭ جارتىلاي فينالىندا بىلتىرعى قازاقستان چەمپيونى نۇرقانات رايىس الەم چەمپيونى كۋبالىق يونليس مارتينەسكە ەسە جىبەرسە, ەل بىرىنشىلىگىنىڭ كۇمىس جۇلدەگەرى اياتوللا تاكىجانوۆ وزبەكستاندىق سايدجامشيد جافاروۆتان جەڭىلىپ قالدى. ال بۇل سالماقتا باس جۇلدە كۋبالىق يونليس مارتينەسكە بۇيىردى.
80 كيلودا جاستار اراسىنداعى الەم چەمپيونى, قازاقستان بىرىنشىلىگىنىڭ جەڭىمپازى نۇربەك ورالباي دا ەلورداداعى تۋرنيردە ءوز مىقتىلىعىن دالەلدەدى. فينالدا ول قىتايلىق بوكسشى تانگلاتيحان ەربيەكەمەن كەزدەسىپ, ءۇش راۋندتا 3:2 ەسەبىمەن جەڭىسكە جەتتى. العاشقى ەكى راۋندتا وتانداسىمىز ايقىن باسىمدىقپەن الدا تۇرعان ەدى. سوڭعى راۋندتا قىتايلىق بوكسشى جەكپە-جەك تىزگىنىن ءوز قولىنا الىپ, بەلسەندى بولعانىمەن, ءبارىبىر جەڭىسكە جەتە المادى. اۋىر سالماقتا (91 كيلو) ەلىشىلىك, حالىقارالىق تۋرنيرلەردىڭ جەڭىم-
پازى مەن جۇلدەگەرى, اسكەريلەر اراسىندا الەم چەمپيونى اتانعان ابزال قۇتتىبەكوۆ العاش رەت 86 كيلو سالماقتا ونەر كورسەتىپ, ءبىرىنشى التىن جۇلدەسىنە قول جەتكىزدى. وتانداسىمىز فينالدا كۋبالىق يانەر ارەومەن كەزدەسىپ, ءۇشىنشى راۋندتا نوكداۋن الىپ قالعانىنا قاراماستان تورەشىلەردىڭ ارالاس داۋىسىمەن باسىم ءتۇستى – 3:2.
اراعا ءبىر جەكپە-جەك سالىپ, 80 كيلودا توپ جارعان نۇربەكتىڭ سىڭارى, جاستار اراسىنداعى وليمپيادا چەمپيونى ايبەك ورالباي 91 كيلودا شارشى الاڭعا كوتەرىلىپ, ءبىر وتباسىعا قوس قۋانىش سىيلادى. اسا تارتىستى وتكەن فينالدىق ايقاستا ايبەك جاستار اراسىنداعى ازيا چەمپيونى تۇركىستاندىق ساعىندىق توعامبايدى جەڭدى. ەكى بوكسشى دا كەيىنگى جىلدارى كوپ باسەكەدە ءبىر-بىرىنە لايىقتى قارسىلاس اتانىپ ءجۇر. بىراق ازىرگە بارلىق جارىستا ايبەكتىڭ مەرەيى ۇستەم بولۋدا.
فينالدىق جەكپە-جەكتىڭ نۇكتەسىن اسا اۋىر سالماقتا سىنعا تۇسكەن قازاقستاندىق دامير تويباي مەن وزبەكستاندىق لازيزبەك مۋللاجانوۆ قويدى. جاستار اراسىندا ورەلى ونەرمەن ماماندار كوزىنە تۇسكەن دامير ەرەسەكتەر دۋىنا قوسىلعالى بەرى حالىقارالىق ءىرى جارىستاردا جەڭىس تۇعىرىنان كورىنە الماي كەلەدى. ول بۇل جولعى فينالدا دا قارسىلاسىنىڭ وسال تۇسىن تابا الماي, التىن جۇلدەگە سىنىق سۇيەم قالعاندا ءسۇرىندى. وزبەكستاندىق بوكسشى تورەشىلەردىڭ ءبىراۋىز شەشىمىمەن جەڭىسكە جەتتى.
وسىلايشا, ەلوردادا العاش رەت ۇيىمداستىرىلعان حالىقارالىق تۋرنير ءوز مارەسىنە جەتتى. ۇلتتىق قۇراما بوكسشىلارى 13 سالماقتىڭ 11-ىندە التىن مەدال ولجالاپ, جالپىكوماندالىق ەسەپتە توپ جاردى. كەيىنگى ورىندارعا كۋبا جانە وزبەكستان بوكسشىلارى يە بولدى. ال توكيو وليمپياداسىنىڭ قولا جۇلدەگەرى ساكەن بيبوسىنوۆ ءتۋرنيردىڭ ەڭ ۇزدىك بوكسشىسى اتاندى. ايتا كەتەيىك, جارىس قورىتىندىسى بويىنشا جەڭىمپاز جانە جۇلدەگەر اتانعان بوكسشىلارعا قارجىلاي سىياقى تابىستالدى.
