وداق ەركىندىك پەن تەڭدىك ۇستانىمدارى نەگىزىندە قۇرىلادى

استانا. 28 ءساۋىر. ەۋرازيالىق ەكونوميكالىق وداق ەركىندىك پەن تەڭدىك ۇستانىمدارى نەگىزىندە قۇرىلۋى ءتيىس. م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ءدارىس وقىعان كەزىندە قازاقستان پرەزيدەنتى وسىنى ايتتى. بۇل تۋرالى «قازاقپارات» اگەنتتىگى حابارلادى. قازاقستان باسشىسى نۇرسۇلتان نازارباەۆ ەۋرازيالىق ينتەگراتسيانىڭ جاڭا پەرسپەكتيۆالارى تۋرالى جاساعان لەكتسياسىندا ءوزىنىڭ وسىنداي وداقتىڭ باستاۋشىسى دا, جاقتاۋشىسى دا بولىپ قالا بەرەتىنىن جەتكىزدى. «مەن ەۋرازيالىق وداقتىڭ مۇمكىن ەكەندىگىنىڭ مىعىم جاقتاسى بولدىم ءارى بولىپ قالا بەرەم دە. ءبىز قازىردىڭ وزىندە ونى قۇرۋعا جاقىنداپ قالدىق. ول ەركىندىك, تەڭقۇقىلىق, ءوزارا تيىمدىلىك, ءاربىر ەلدىڭ پراگماتيكالىق مۇددەسىن ەسكەرۋ ۇستانىمدارى نەگىزىندە قۇرىلۋى ءتيىس», - دەدى ول. وسى رەتتە قر پرەزيدەنتى ەۋرازيالىق وداق يدەياسى كوتەرىلگەن سوناۋ 90-شى جىلدارى ءوزىنىڭ بۇل باستاماسى تمد ەلدەرىنىڭ كوپتەگەن ساياساتكەرلەرى ءۇشىن تۇسىنىكسىز بولعاندىعىن اتاپ ءوتتى. «بۇگىندە ول ىسكەرلىك ورتادا, قوعامدىق-گۋمانيتارلىق دەڭگەيدە  كەڭ اۋقىمداعى قاجەتتىلىك بولىپ وتىر», - دەدى ەلباسى. قۇرىش نۇرىمبەت. دەرەككوز: «قازاقپارات». فوتو: www.spr.ru.