استانا. 28 ءساۋىر. بۇگىن قازاقستان پرەزيدەنتى نۇرسۇلتان نازارباەۆ م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە ەۋرازيالىق ينتەگراتسيا تاقىرىبىنداعى دارىسىندە ەۋرازيالىق ەكونوميكالىق وداقتى 2050 جىلى الەمدەگى ينتەگراتسيالىق ۇيىمداردىڭ ۇزدىك ۇشتىگى قۇرامىنان تابىلۋعا ءتيىس ەكەنىن ايتتى. بۇل تۋرالى egemen.kz ءتىلشىسى حابارلادى.
ەلباسىنىڭ پايىمىنشا, قازىرگى تاڭدا الەمدە 300-دەن استام ىقپالداستىق بىرلەستىكتەرى تىرشىلىك ەتەدى. ولاردىڭ بارلىعى دا بەلگىلى ءبىر اۋماق پەن سالا بويىنشا بەلگىلى ءبىر دارەجەدە كوشباسشى بولۋعا ۇمتىلادى. سونداي توپجارعان توپتىڭ ءرولى ەۋرازيالىق ەكونوميكالىق وداققا دا وتە وڭتايلى كەلەدى.
«ەۋرازيالىق ەكونوميكالىق وداق اياسىنداعى ءبىزدىڭ ارىپتەستەرگە 2050 جىلعا قاراي الەمنىڭ 300 بىرلەستىكتەرىنىڭ ىشىندە ەڭ مىقتى ينتەگراتسيالىق ۇيىمداردىڭ ۇشتىگىنە ەنۋ ماقساتىن قويۋدى ۇسىنامىن. قازىردىڭ وزىندە مەن مۇنداي ىقپالداستىقتىڭ تەك ءۇش-تورتەۋىن كورىپ وتىرمىن. بىزگە دە نەگە تالپىنباسقا؟» رەسەي ەكونوميكاسىنىڭ ءرولى وتە ماڭىزدى. سوندىقتان ءبىزدىڭ بىرلەستىكتىڭ دامۋى ەكونوميكالىق پراگماتيزم, جاۋاپكەرشىلىك, ەۆوليۋتسيالىق, اشىقتىق شەڭبەرىندە جۇرگىزىلۋى ءتيىس», - دەدى وسى ورايدى قازاقستان ليدەرى.
سول ويلاردىڭ جالعاسى رەتىندە ن.نازارباەۆ ارىپتەستەرىنە بۇل ماسەلەدە قازاقستاننان ۇلگى الۋ كەرەكتىگىن جەتكىزدى.
«قازاقستاندا 2050 جىلعا دەيىنگى جاڭا ستراتەگيالىق باعدارلاما ىسكە اسىرىلۋدا. ونىڭ الدىندا بىزدە 2030 جىلعا دەيىنگى باعدارلاما مەرزىمىنەن بۇرىن جۇزەگە اسقان بولاتىن. ەندى ءبىز وزىمىزگە عاسىردىڭ ورتاسىندا الەمنىڭ دامىعان 30 ەلىنە ەنۋ جونىندە ماقسات قويىپ وتىرمىز. بۇل ارمان-قيال ەمەس. بۇل باعدارلاما تولىعىمەن قارجىمەن, ماماندارمەن جانە جوبالارمەن قامتاماسىز ەتىلەدى. ءبىز وسى ماقساتقا ەگەمەن, ەۋرازيالىق ەكونوميكالىق كەڭىستىكتىڭ تولىققاندى مۇشەسى رەتىندە قول جەتكىزۋدى كوزدەپ وتىرمىز. ءبىزدىڭ بارلىعىمىز وسىنداي جوعارى ماقساتتاردى قويۋىمىز كەرەك», - دەدى بۇدان سوڭ مەملەكەت باسشىسى.
ەسكە سالا كەتەتىن ءبىر جايت, نۇرسۇلتان.نازارباەۆتىڭ ەۋرازيالىق ەكونوميكالىق وداق تۋرالى يدەياسى 1994 جىلى م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى مىنبەسىنەن ايتىلعان ەدى. مىنە, ارادا 20 جىل وتكەندە, سول يدەيانىڭ ءىس جۇزىنە اسىرىلاتىن ءساتى تۋىپ, 2014 جىلى مامىر ايىندا قازاقستان, رەسەي جانە بەلارۋس مەملەكەتتەرىنىڭ باسشىلارى اراسىندا ەۋرازيالىق ەكونوميكالىق وداقتى قۇرۋ تۋرالى شارتقا قول قويىلعالى وتىر.
ساكەن مايلىباي.
دەرەككوز: egemen.kz.
فوتو: my-uni.ru.
