«توبىل» – «فەرەنتسۆاروش»
شۆەيتساريانىڭ نون قالاسىندا جەرەبەسى تارتىلعان چەمپيوندار ليگاسىنىڭ ءبىرىنشى كۆاليفيكاتسيالىق كەزەڭىندە «توبىل» ماجارستان بىرىنشىلىگىنىڭ 33 دۇركىن جەڭىمپازى «فەرەنتسۆاروش» كلۋبىمەن كەزدەسەتىن بولدى. ءبىر عاسىرلىق تاريحى بار بۋداپەشت كومانداسى ماجارستاننىڭ ەڭ اتاقتى كلۋبتارىنىڭ ءبىرى سانالادى. ولار ەل چەمپيوندىعىنان بولەك, 24 مارتە ماجارستان كۋبوگىن جەڭىپ العان بولسا, التى رەت سۋپەركۋبوكتا دارا شىققان. سونداي-اق ولار 1964/1965 جىلعى «جارمەڭكە كۋبوگىنىڭ» (قازىرگى – ەۋروپا ليگاسى) فينالىندا يتاليانىڭ اتاقتى «يۋۆەنتۋس» كلۋبىن 1:0 ەسەبىمەن جەڭىپ, ءوز تاريحىندا العاش رەت ەۋروكۋبوك باسەكەسىندە توپ جاردى.
«فەرەنتسۆاروش» – كەيىنگى ءتورت جىلدا ماجارستان چەمپيوندىعىن ەشكىمگە بەرمەي كەلەدى. 2019 جىلى چەمپيوندىق ءتاجدى قايتا كيگەن سوڭ كلۋب چەمپيوندار ليگاسىنىڭ جارىستارىنا قايتا قوسىلدى. 2020/2021 جىلعى ماۋسىمدا ولار 1995 جىلدان كەيىن العاش رەت ءتۋرنيردىڭ توپتىق كەزەڭىنە جولداما الدى. بىلتىر ەۋروپا ليگاسىنىڭ توپتىق باسەكەسىندە باق سىنادى.
Transfermarkt دەرەگى بويىنشا, قازىرگى تاڭدا «فەرەنتسۆاروشتىڭ» ترانسفەر قۇنى – 42,80 ميلليون ەۋرو. «توبىل» كومانداسىنىڭ فۋتبولشىلارى 10,13 ميلليون ەۋروعا باعالانعان. «فەرەنتسۆاروش» ساپىندا 22 لەگيونەر بار. ونىڭ ىشىندەگى ەڭ قىمبات فۋتبولشى – تۋنيستىك ايسسا لايدۋني. ويىنشىنىڭ نارىقتاعى قۇنى – 3,5 ميلليون ەۋرو. «توبىلدا» رۇقسات ەتىلگەن سەگىز عانا لەگيونەر بار. ونىڭ ەڭ باعالىسى – وزبەكستاندىق يگور سەرگەەۆ. ترانسفەر قۇنى – 1,70 ميلليون ەۋرو.
«فەرەنتسۆاروش» – ەۋروكۋبوك تاريحىندا قازاقستاندىق كوماندامەن العاش رەت جولىقپاق. ەكى كوماندا اراسىنداعى العاشقى ويىن 6 شىلدەدە قوستانايدا, قارىمتا ماتچ 12 شىلدەدە بۋداپەشتتە وتەدى دەپ جوسپارلانعان.
«استانا» – «راكۋۆ»
ەلوردانىڭ «استانا» كلۋبى بيىل قاتارىنان ەكىنشى جىل ۋەفا كونفەرەنتسيا ليگاسىندا باق سىناماق. كەيىنگى جەتى جىلدا التى مارتە ەل چەمپيونى اتانىپ, چەمپيوندار ليگاسىنىڭ ىرىكتەۋ كەزەڭىندە ونەر كورسەتىپ جۇرگەن «استانا» 2020 جىلى قازاقستان بىرىنشىلىگىندە كۇمىس جۇلدە ولجالاپ, كونفەرەنتسيا ليگاسىندا ويناۋعا ءماجبۇر بولدى. ەلوردالىقتار بىلتىر دا سول مەجەدەن كورىنىپ, تاعى دا كونفەرەنتسيا ليگاسىنا جولداما الدى. بيىلعى قارسىلاس – پولشانىڭ «راكۋۆ» كلۋبى.
«راكۋۆ» تا «استانا» سياقتى پولشا چەمپيوناتىندا «لەح» كومانداسىنا جول بەرىپ, كۇمىس جۇلدەنى قاناعات تۇتتى. 1916 جىلى قۇرىلعان كلۋب بۇگىنگە دەيىن بىردە-ءبىر رەت ءوز ەلىنىڭ چەمپيونى اتانباعان. سەبەبى چەنستوحوۆا قالاسىنىڭ كومانداسى ۇزاق جىلدار بويى پولشا چەمپيوناتىنىڭ ەڭ تومەنگى ليگالارىندا ويناپ, 2019 جىلى جوعارى توپقا جولداما الدى.
ەليتالى توپقا قوسىلا سالىسىمەن, قاتارىنان ەكى جىل پولشا چەمپيوناتىندا ەكىنشى ورىنعا تابان تىرەپ, ەكى مارتە پولشا كۋبوگى مەن ءبىر مارتە سۋپەركۋبوگىن جەڭىپ الدى. اينالدىرعان ەكى جىلدا زور تابىسقا جەتكەن كوماندا ء«ا» دەگەننەن ەۋروكۋبوك جولىنداعى جارىستا دا مامانداردىڭ تاڭدايىن قاقتىردى. كونفەرەنتسيا ليگاسىنداعى تۇساۋكەسەر كەزدەسۋىندە ليتۆانىڭ «سۋدۋۆا» كلۋبىنان باسىم تۇسسە, كەيىننەن قازاننىڭ «رۋبين» كلۋبىن جارىس جولىنان ىعىستىردى. الايدا پلەي-وفف كەزەڭىندە بەلگيانىڭ تاجىريبەلى «گەنت» كومانداسىنان ايلاسىن اسىرا الماي, توپتىق كەزەڭگە ءبىر قادام قالعاندا ءسۇرىندى.
«راكۋۆ» ۋەفا-نىڭ كلۋبتىق رەيتينگىندە 274-ورىندا تۇرسا, «استانا» قازىرگى ۋاقىتتا 80-ساتىعا ورنالاسقان. بىراق پولشالىق كلۋبتىڭ ترانسفەر باعاسى «استانادان» ەكى جارىم ەسە جوعارى. Transfermarkt «راكۋۆ» فۋتبولشىلارىن 28,5 ميلليون ەۋروعا, «استانانىڭ» ويىنشىلارىن 11,18 ميلليون ەۋروعا باعالاعان. ەكى ۇجىم اراسىنداعى ءبىرىنشى ويىن 21 شىلدەدە پولشادا, قارىمتا كەزدەسۋ 28 شىلدەدە ەلوردادا وتەدى.
«قايرات» – «كيشۆاردا»
ۋەفا كونفەرەنتسيا ليگاسىنىڭ ەكىنشى ىرىكتەۋ كەزەڭىندە الماتىنىڭ «قايراتى» ماجارستاننىڭ تاعى ءبىر ۇجىمى – «كيشۆاردامەن» كەزدەسەدى. بىلتىرعى ەل چەمپيوناتىنىڭ قولا جۇلدەگەرىنە العاشقى اينالىمدا جەڭىل قارسىلاس تاپ بولدى دەپ ايتۋعا بولادى. سەبەبى 2003 جىلى قۇرىلعان كوماندا بىلتىر عانا ماجارستاننىڭ جوعارى ليگاسىنا ورالىپ, بيىل كۇمىس جۇلدەگە قول جەتكىزدى. ەل بىرىنشىلىگىندە دە, ەۋروكۋبوك ويىندارىندا دا تاجىريبەسى جوق «كيشۆاردا» «قايراتقا» ەش قيىندىق تۋدىرماۋى كەرەك. ونىڭ ۇستىنە ماجارستان چەمپيوناتى اياقتالعان بەتتە كوماندادان بىرنەشە تاجىريبەلى لەگيونەر كەتىپ قالعان.
دەگەنمەن قازىرگى تاڭدا «قايراتتىڭ» دا جاعدايى اسا ءماز ەمەس. بىرەر اپتا بۇرىن باس باپكەر قۇربان بەردىەۆ كوماندادان كەتىپ, ورنىنا كيريلل كەكەر كەلدى. سونداي-اق پولشالىق لەگيونەر ياتسەك گۋرالسكي, كامەرۋندىق داۆيد ەكۆە, وزبەكستاندىق جاسۋر جالوليددينوۆ جانە تاعى باسقا فۋتبولشىلاردىڭ كلۋبتان كەتكەنى ءمالىم. ودان بولەك, جاراقات الىپ, الاڭعا قاشان ورالاتىنى بەلگىسىز فۋتبولشىلار دا جەتەرلىك. قازاقستاندا ترانسفەر تەرەزەسى اشىلعانىمەن, ازىرگە «قايراتتا» جاڭا فۋتبولشى ساتىپ الا قوياتىن قارجى دا, مۇمكىندىك تە جوق. سوندىقتان باپكەرلەر قۇرامى الداعى ويىنداردا اكادەميا تاربيەلەنۋشىلەرى مەن نەگىزگى قۇرامدا جۇرگەن ءبىردى-ەكىلى لەگيونەر, اتاپ ايتقاندا حوسە كانتە, جواو پاۋلو سەكىلدى ويىنشىلارعا سەنىم ارتادى.
Transfermarkt دەرەگى بويىنشا, ەكى كوماندانىڭ دا باعاسى شامالاس. ماسەلەن, لەگيونەرلەردەن (19 فۋتبولشى) جاساقتالعان «كيشۆاردا» فۋتبولشىلارىنىڭ جالپى قۇنى – 8,25 ميلليون ەۋرو. «قايرات» كلۋبى 9,45 ميلليون ەۋروعا باعالانعان.
قازىر ماجارستان چەمپيوناتىندا ماۋسىمارالىق ءۇزىلىس. ەۋروكۋبوكقا قاتىساتىن كوماندالار دەمالىستان ورالىپ, جاتتىعۋ جيىنىنا ەندى كىرىسىپ جاتىر. ال قازاقستان چەمپيوناتى ەندى قىزىپ جاتىر. فۋتبولشىلاردا ويىن تاجىريبەسى جەتەرلىك. «قايرات» وسى باسىمدىعىن ءتيىمدى پايدالانىپ, «كيشۆاردانى» جەڭۋگە ءتيىس. العاشقى ويىن 21 شىلدەدە الماتىدا, قارىمتا كەزدەسۋ 28 شىلدەدە كيشۆاردادا وتەدى.
«قىزىلجار» – «وسيەك»
ەۋروكۋبوك باسەكەسىنە قاتىساتىن قازاقستاندىق ءتورت كوماندانىڭ ىشىندە ەڭ قيىن قارسىلاس «قىزىلجار» كومانداسىنا تاپ بولدى. ءوز تاريحىندا تۇڭعىش رەت ەۋروپا جاسىل الاڭىندا وينايىن دەپ جاتقان پەتروپاۆل كلۋبى كونفەرەنتسيا ليگاسىنىڭ ەكىنشى اينالىمىندا حورۆاتيانىڭ «وسيەك» كومانداسىمەن كەزدەسەدى.
«وسيەك» – بيىلعى حورۆاتيا چەمپيوناتىنىڭ تۋرنير كەستەسىندە «دينامو» (زاگرەب) جانە «حايدۋك» كلۋبتارىنان كەيىن ءۇشىنشى ورىنعا يە بولدى. ىرگەتاسى 1947 جىلى قالاعان ۇجىم ەۋروكۋبوك باسەكەلەرىنىڭ تۇراقتى قاتىسۋشىسى. حورۆاتيالىق كلۋبتىڭ ترانسفەر قۇنى «قىزىلجاردان» باقانداي التى ەسە جوعارى. ياعني «وسيەك» فۋتبولشىلارىنىڭ باعاسى 36,85 ميلليون ەۋرو بولسا, «قىزىلجار» كلۋبىنىڭ جالپى باعاسى – 6 ميلليون ەۋرو.
«وسيەك» قۇرامىندا قازاقستان چەمپيوناتىن جاقسى بىلەتىن ەكى فۋتبولشى بار. ءبىرى – «استانا» كلۋبىنىڭ بۇرىنعى جارتىلاي قورعاۋشىسى لاسلو كلياينحايسلەر, ەكىنشىسى – قاراعاندىنىڭ «شاحتەرىندە» ويناعان شابۋىلشى ميحرەت توپچاگيچ.
ەكى ۇجىم اراسىنداعى ءبىرىنشى ويىن 21 شىلدەدە نۇر-سۇلتاندا, قارىمتا كەزدەسۋ 28 شىلدەدە وسيەك قالاسىندا وتەدى. ايتا كەتەيىك, پەتروپاۆلداعى «قاراساي باتىر» ستاديونى ۋەفا تالابىنا ساي كەلمەيتىندىكتەن, سولتۇستىكقازاقستاندىق كوماندا ءوز الاڭىنداعى ويىندارىن «استانا ارەنادا» وتكىزۋگە ءماجبۇر.
