گرەك-ريم كۇرەسىنەن وتكەن جارىستىڭ العاشقى كۇنى 63 كيلو سالماق دارەجەسىنىڭ باستى ءفاۆوريتى سانالعان الەم چەمپيوناتىنىڭ ەكى دۇركىن, قۇرلىق بىرىنشىلىگىنىڭ ءتورت دۇركىن جانە ازيا ويىندارىنىڭ جۇلدەگەرى, اقتوبەلىك مەيرامبەك ايناعۇلوۆ جەڭىس تۇعىرىنا كوتەرىلە المادى. جارتىلاي فينالدا ول الماتى وبلىسىنىڭ وكىلى عالىم قابدۋناسىروۆقا ەسە جىبەردى. نەگىزى بۇل باسەكە 12:12 ەسەبىمەن اياقتالعان ەدى. ونداي جاعدايدا جاسالعان ءادىستىڭ ساپاسى ەسكەرىلەتىنى ءمالىم. بۇل رەتتە عالىمنىڭ اسىعى الشىسىنان ءتۇستى. ءۇشىنشى ورىن ءۇشىن تارتىستا مەيرامبەك شىمكەنتتىك جولدىباي توقباەۆقا جول بەردى. ال فينالدا سولتۇستىكقازاقستاندىق رۋستام مامەدوۆتىڭ تاس-تالقانىن شىعارىپ, ايقىن باسىمدىقپەن ۇتقان قابدۋناسىروۆ ەل چەمپيونى اتاندى.
77 كيلو سالماقتا باسەكەلەستىك وتە كۇشتى بولدى. جيىرمادان اسا بالۋاننىڭ اراسىنان ءتورت مىقتى سۋىرىلىپ شىعىپ, باس جۇلدەنى ءوزارا ساراپقا سالدى. جارتىلاي فينالدا اتىراۋلىق قوس ساڭلاق – ماقسات ەرەجەپوۆ (ازيانىڭ چەمپيونى, ەكى دۇركىن كۇمىس جانە ءۇش دۇركىن قولا جۇلدەگەرى) پەن كاھارمان قيسىمەتوۆ (23 جاستاعىلار اراسىنداعى الەم جانە قۇرلىق بىرىنشىلىكتەرىنىڭ قولا جۇلدەگەرى) اراسىنداعى ايقاس العاشقىسىنىڭ پايداسىنا شەشىلدى. قوستانايلىق تەمىرلان شادۋكاەۆ (جاستار اراسىنداعى الەم چەمپيونى, ەرەسەكتەر اراسىندا ازيا چەمپيونى) الماتى وبلىسىنان كەلگەن ساقا سپورتشى دەمەۋ جادىراەۆقا (الەم چەمپيوناتىنىڭ كۇمىس جۇلدەگەرى) جەر سيپاتىپ كەتتى. فينالدا شادۋكاەۆ پەن ەرەجەپوۆ كۇرەستى. بىلتىرعى ەل چەمپيوناتىندا وسى بالۋاندار ءوزارا شەبەرلىك بايقاسىپ, سول تارتىستا ماقساتتىڭ مەرەيى ۇستەم بولعان. بۇل جولى تەمىرلان كەتكەن ەسەنى قايتاردى. قارسىلاسى العا ۇمتىلعان كەزدە ەكى مارتە قارىمتا شابۋىلىن ءساتتى جۇزەگە اسىرعان شادۋكاەۆ قورىتىندى ەسەپتە 7:1 ەسەبىمەن جەڭىسكە جەتتى.
الىپتاردىڭ ايقاسىندا انتون ساۆەنكونىڭ ايدارىنان جەل ەستى. فينالدا الماتىلىق بالۋان ازيا چەمپيونى, شىمكەنتتىك ءالىمحان سىزدىقوۆپەن كۇش سىناستى. بۇل كەزدەسۋدە سىزدىقوۆتىڭ جەڭىسكە جەتەتىنىنە كۇماندانعاندار كەمدە-كەم ەدى. دەسەك تە, جاس دارىن ساقا سپورتشىنىڭ ورەسكەل قاتەلىگىن ۇتىمدى پايدالانىپ, باسەكە تاعدىرىن ءوز پايداسىنا شەشتى. ەڭ جەڭىل سالماقتا جەتىسۋلىق يسحار قۇرباەۆتىڭ اسىعى الشىسىنان ءتۇستى. شەشۋشى تۇستا ول جەتىسۋلىق مارلان مۇقاشەۆتى قاپى قالدىردى. 87 كيلو سالماقتا ازيا چەمپيوناتىنىڭ جەڭىمپازى, وليمپيا ويىندارىنا قاتىسۋشى وسكەمەندىك نۇرسۇلتان تۇرسىنوۆقا تەڭ كەلەر ەشكىم تابىلمادى. اقتىق سايىستا ول قىزىلجارلىق باۋىرجان مۋسيننەن باسىم ءتۇستى.
جارىستىڭ ەكىنشى كۇنى تاعى بەس سالماق دارەجەسى بويىنشا ءتۇرلى-ءتۇستى مەدالدار ساراپقا سالىندى. سول كۇنى دىنمۇحامەت قوشقاردىڭ اسقان شەبەرلىگىنە ءتانتى بولدىق. باستاپقى باسەكەلەردە قارسىلاستارىن سىپىرا ۇتقان جامبىل وبلىسىنىڭ جامپوزى جارتىلاي فينالدا ماديار مالتەكباەۆتى ءسۇرىندىردى. اقتىق سىندا دىنمۇحامەتتىڭ جولى ءوزىنىڭ كوماندالىق ارىپتەسى, ازيا چەمپيونى سۇلتان اسەت ۇلىمەن قيىستى. اتاقتى قارسىلاسىنان ەش قايمىقپاعان جاس دارىن ۇتىپ جاتسا دا, قارقىنىن ەش باسەڭدەتكەن جوق. اسەت ۇلىن تورتتاعاندا ارى دا, بەرى دە اينالدىرعان قوشقار بۇل بەلدەسۋدە ايقىن باسىمدىق تانىتتى – 9:1.
60 كيلو سالماقتا قىزىلوردالىق ايدوس سۇلتانعاليدىڭ شوقتىعى بيىك بولدى. الەم چەمپيوناتىنىڭ قولا جۇلدەگەرى فينالدا ەلىمىزدىڭ تاعى ءبىر تاجىريبەلى بالۋانى, شىعىسقازاقستاندىق ەرنۇر فيداحمەتوۆتى ەڭسەردى. 72 كيلو سالماق دارەجەسىنىڭ باس جۇلدەسىن قاراعاندىلىق يبراگيم ماگومادوۆ پەن جەتىسۋلىق ەراسىل نۇربوسىنوۆ ءوزارا ساراپقا سالدى. بۇل تارتىستا جارىس قوجايىنى ءوزىنىڭ مىقتىلىعىن مويىنداتتى. 82 كيلو سالماقتا جەتىسۋ وبلىسىنىڭ ورەنى دياس قالەننىڭ قارقىنى كۇشتى بولدى. شەشۋشى تۇستا ول قوستانايلىق ميراس بارشىلىقوۆتىڭ وسال تۇسىن ءدوپ تاپتى. 97 كيلو سالماقتاعى سايىس تا وتە شيەلەنىستى ءوتتى. قىزىلوردالىق ولجاس سىرلىباي مەن قاراعاندىلىق ەرۇلان ىسقاقوۆ بەلدەسىپ, بۇل باسەكەدە جەرگىلىكتى بالۋان جەڭىس تويىن تويلادى.
جالپى كوماندالىق ەسەپتە الماتى وبلىسىنىڭ ورەندەرى الدارىنا جان سالمادى. شىعىس قازاقستان وبلىسى مەن شىمكەنت قالاسىنىڭ وكىلدەرى ەكىنشى جانە ءۇشىنشى ورىنداردى ءوزارا ءبولىستى. سونداي-اق قاراعاندى مەن سولتۇستىك قازاقستاننىڭ سپورتشىلارى ۇزدىك بەستىكتىڭ قاتارىنا ەندى. ال باتىس قازاقستان, ماڭعىستاۋ جانە پاۆلوداردىڭ بالۋاندارى بىردە-ءبىر ۇپايعا يەلىك ەتە الماي, كوش سوڭىندا قالىپ قويدى.
