بيىلعى «پرەزيدەنت كۋبوگىندا» ەل نامىسىن ەلىمىزدىڭ ۇلتتىق جانە جاستار قۇراماسىنىڭ مۇشەلەرى, اتاپ ايتقاندا, ميحايل كۋكۋشكين, دميتري پوپكو, تيموفەي سكاتوۆ, بەيبىت جۇقاەۆ, دەنيس ەۆسەەۆ, گريگوري لوماكين, ماكسيم باتيۋتەنكو, گوزال اينيتدينوۆا, جىبەك قۇلامباەۆا, ارۋجان ساعىندىقوۆا, ساندۋعاش كەنجەباەۆا سىندى الەمدىك دەڭگەيدەگى كورتتاردا ونەر كورسەتىپ جۇرگەن تەننيسشىلەر قورعايدى.
سونداي-اق ەلورداعا الىس-جاقىن شەتەلدەگى ەڭ مىقتى دەگەن تەننيسشىلەر دە كەلەدى دەپ كۇتىلۋدە. ماسەلەن, قىزدار اراسىنداعى باسەكە كورىگىن گرۋزيانىڭ ءبىرىنشى راكەتكاسى – ەكاتەرينا گورگودزە (WTA رەيتينگتە 144-ورىندا), 2020 جىلعى جۇپتىق سىنداعى وليمپيا ويىندارىنىڭ قولا جۇلدەگەرى, برازيليالىق لاۋرا پيگوسسي (124), تەننيس ماماندارى تاراپىنان چەحيا تەننيسىنىڭ بولاشاق جۇلدىزىنا بالانعان ليندا فرۋحۆيرتوۆا (176), بىلتىرعى «پرەزيدەنت كۋبوگىنىڭ» چەمپيونى, گرۋزيالىق ماريام بولكۆادزە (185) قىزدىرماق.
ەرلەر باسەكەسىندە باق سىنايتىن تەننيسشىلەر دە قارا جاياۋ ەمەس. ەلىمىزدەگى بەدەلدى جارىسقا جىل سايىن الەمنىڭ ەڭ ۇزدىك تەننيسشىلەرى قاتىساتىنى جانكۇيەرلەرگە ايان. اتاپ ايتقاندا, «پرەزيدەنت كۋبوگىندا» ءار جىلدارى دانيل مەدۆەدەۆ (الەمنىڭ قازىرگى ءبىرىنشى راكەتكاسى), اندرەي رۋبلەۆ (ATP رەيتينگىندە 8-ورىندا), كارەن حاچانوۆ (22), ميومير كەتسمانوۆيچ (30), سەباستيان كوردا (46), ماكس پەرسەلل جانە باسقا دا تانىمال ويىنشىلار ونەر كورسەتتى.
سوناۋ ەلىمىز تاۋەلسىزدىك العان جىلدان بەرى, ياعني 1991 جىلى تۇساۋى كەسىلگەن «پرەزيدەنت كۋبوگى» جارىسى جىل سايىن ەلوردادا جاز مەزگىلىندە ۇيىمداستىرىلادى. 2007 جىلى «پرەزيدەنت كۋبوگى» باسەكەسى ايەلدەر اراسىنداعى ITF جانە ەرلەردىڭ ATP ءتۋرنيرىنىڭ باعدارلاماسىنا ەنىپ, سول جىلدان بەرى حالىقارالىق دارەجەدەگى تۋرنير رەتىندە ۇيىمداستىرىلىپ كەلەدى.
سول ۋاقىتتان بەرى بۇل جارىستا قازاقستاندىقتاردان ميحايل كۋكۋشكين مەن اندرەي گولۋبەۆ, ۋكراينالىق يليا مارچەنكو, اۋستريالىق سەباستيان وففنەر, گەرمانيا قۇراماسىنىڭ قازىرگى كاپيتانى راينەر شاتتلەر, اۋستراليا اشىق چەمپيوناتىنىڭ جانە «رولان گارروس» چەمپيونى حورۆات يۆان دوديگ, جۇپتىق سىندا «ۇلكەن دۋلىعا» ساناتىنداعى ءتۋرنيردىڭ ەكى دۇركىن جەڭىمپازى قىتايلىق چجان شۋاي سەكىلدى تەننيسشىلەر توپ جارعان.
