يۋليا پۋتينتسەۆا (32) فرانتسيالىق اليزە كورنەمەن (38) كەزدەستى. الەمدىك رەيتينگتە ەكەۋى شامامەن قاتار تۇر. دەسەك تە كورنەگە كەلگەندە پۋتينتسەۆانىڭ بىلگەنىنەن جاڭىلاتىن ءبىر جامان ادەتى بار. ولار ءوزارا ءۇش رەت كەزدەسىپ, ۇشەۋىندە دە فرانتسيا وكىلىنىڭ مەرەيى ۇستەم بولدى. ال 2017 جىلى نيۋ-حەيۆەندەگى تۋرنيردە جەرلەسىمىز قارسىلاسىنان 0:6, 0:6 ەسەبىمەن ويسىراي ۇتىلعان ەدى. بۇل جولى دا يۋليا اليزەدەن ايلاسىن اسىرا المادى – 3:6, 6:7. ەلەنا رىباكينا (23) امەريكالىق كوكو ۆاندەۆەگەمەن (157) شەبەرلىك بايقاستى. كەزىندە ۆاندەۆەگە ەكى رەت «ۋيمبلدوننىڭ» شيرەك فينالىنا دەيىن جەتىپ, اقش پەن اۋستارليانىڭ اشىق بىرىنشىلىگىنىڭ جارتىلاي فينالىندا وينادى. ءداۋىرى ءجۇرىپ تۇرعان كەزدە WTA رەيتينگىندە توپ-10 تەننيسشىنىڭ قاتارىنا ەندى. بىراق قازىرگى كەزدە كوكونىڭ قارقىنى باسەڭدەگەن. 1 ساعات 41 مينۋتقا سوزىلعان بۇل باسەكە 7:6, 7:5 ەسەبىمەن رىباكينانىڭ پايداسىنا شەشىلدى.
