باعدارلامانى جۇزەگە اسىرۋشى Kazakh Tourism ۇلتتىق كومپانياسىنىڭ مالىمەتى بويىنشا, قازىرگى تاڭدا سومماسى 5,2 ملن تەڭگە بولاتىن 230 بالانىڭ بيلەت قۇنىن سۋبسيديالاۋ بويىنشا 118 ءوتىنىم تۇسكەن. باعدارلاما اياسىندا سۇرانىسقا يە باعىتتار – تۇركىستان, الماتى جانە ماڭعىستاۋ وبلىستارى. تۋرلاردىڭ ورتاشا باعاسى – 320 مىڭ تەڭگە. ەڭ ارزان تۋر الماتىدا 82 مىڭ تەڭگەگە ساتىلعان. ال قازىرشە ەڭ قىمبات باعىت – اقتاۋ قالاسى بولىپ تۇر. وندا تۋر 1,2 ملن تەڭگەگە ساتىلعان.
سونداي-اق اتالعان باعدارلامانى قازاقستان رەسپۋبليكاسىنىڭ ازاماتتارى عانا پايدالانا الادى. باعدارلاما تالاپتارى بويىنشا, كامەلەتكە تولماعان بالالار اۋە رەيسىنە تەك اتا-اناسى جانە وزگە دە ەرەسەك جاقىن تۋىستارىمەن بىرگە وتىرعىزىلادى, باعدارلاما تەك تۋرپاكەت شەڭبەرىندەگى ساپارلارعا عانا جارامدى جانە تۋرپاكەت ىشكى تۋريزمدە ليتسەنزياسى بار تۋروپەراتوردان ساتىپ الىنۋعا ءتيىس. اتالعان ەرەجەلەر ساقتالعان جاعدايدا, تۋريستىك جولدامانى ساتىپ الۋ كەزىندە بالالاردىڭ اۋە بيلەتىنىڭ قۇنى الىنىپ تاستالادى. باعدارلاما اياسىندا تۋروپەراتورلاردىڭ شىعىندارى مەملەكەت ەسەبىنەن وتەلەدى.
ساياحات باعىتىندا قىزمەت كورسەتەتىن كومپانيالار تۋريستەردىڭ دەمالۋ مەرزىمى اياقتالعاننان كەيىن Kazakh Tourism ۇك-نا قۇجاتتار ازىرلەپ, سۋبسيديالاۋ بويىنشا ءوتىنىم بەرۋگە ءتيىس. «بەلگىلەنگەن قۇجاتتار توپتاماسى تولىق بولسا, ۇيىم 10 جۇمىس كۇنى ىشىندە سۋبسيديا تولەۋ نەمەسە سۋبسيديا تولەۋدەن باس تارتۋ تۋرالى شەشىم قابىلدايدى. كەيىن 45 جۇمىس كۇنى ىشىندە سۋبسيديا سوماسى تۋروپەراتوردىڭ كورسەتىلگەن شوتىنا اۋدارىلادى», دەپ كورسەتىلگەن ۇلتتىق كومپانيانىڭ حابارلاماسىندا.
