كوللاجدى جاساعان قونىسباي شەجىمباي, «EQ»
جيىندا ءبىرىنشى بولىپ ءسوز العان «اتامەكەن» ۇكپ تورالقاسى تۋريزم كوميتەتىنىڭ ءتورايىمى يۋليا ياكۋپباەۆا كوپتەگەن سىنعا قاراماستان, قازاقستاندا تۋريزم سالاسى قارقىندى دامىپ كەلە جاتقانىن اتاپ ءوتتى.
«تۋريزم – قازاقستاندا ەڭ كوپ سىنالاتىن سالانىڭ بىرىنە اينالدى. بىراق مەن ەلىمىزدە تۋريزم جوق دەگەن سوزبەن كەلىسپەيمىن. مەنىڭشە, كەيىنگى جىلدارى وتاندىق تۋريزم وتە قارقىندى دامىپ جاتىر. بۇكىل ەل بويىنشا جاڭا دەمالىس ورىندارى قۇرىلۋدا. تۋريستىك ونىمدەر قالىپتاسىپ, ينفراقۇرىلىم دا دامۋدىڭ داڭعىل جولىنا تۇسكەن. ستاتيستيكاعا كوز جۇگىرتەر بولساق, دەمالىس ورىندارىندا تۋريستەر سانى 22%-عا, كەلۋ ءتۋريزمى بويىنشا ءوسىم 34%-عا ارتتى. تۋريستەر سانى تەك نۇر-سۇلتان, الماتى قالالارى, بۋراباي, تۇركىستان جانە ماڭعىستاۋ وڭىرلەرىندە ارتىپ قانا قويماي, قالعان ايماقتاردا دا قارقىن الىپ كەلە جاتقانىن بايقاۋعا بولادى. لوگيستيكا, ينفراقۇرىلىم بويىنشا ءالى دە كوپتەگەن ماسەلە بار ەكەنى ءسوزسىز. دەگەنمەن ءبارى ءوز كەزەگىمەن ءجۇرىپ جاتىر. ءارى قارايعى دامۋ كۇشىمىزدى بىرىكتىرۋىمىزگە بايلانىستى», دەپ اتاپ ءوتتى يۋليا ياكۋپباەۆا.
مادەنيەت جانە سپورت ۆيتسە-ءمينيسترى ەرجان ەركىنباەۆ سالاعا جاۋاپتى ۆەدومستۆو, «اتامەكەن» جانە مەملەكەتتىك ورگاندارمەن ءتۋريزمدى دامىتۋعا باعىتتالعان بىرقاتار جول كارتاسى باعدارلامالارىن ىسكە اسىرىپ كەلە جاتقانىن ايتتى. «جىلدان-جىلعا جول كارتاسىنا قول قويعان مەملەكەتتىك ورگانداردىڭ سانى ارتۋدا. قول قويۋشىلار قاتارىنا Kazakh Geography كومپانياسىن قوسۋ تۋرالى ۇسىنىس ايتقىم كەلەدى. بۇل كومپانيادا ۇلتتىق پاركتەر مەن ەكولوگيالىق ءتۋريزمدى دامىتۋعا قاتىستى كوپ ۇسىنىس بار. سونىمەن قاتار ەلىمىز كەڭ-بايتاق ەكەنىن اتاپ وتكىم كەلەدى. ءبىر جاعىنان كەڭ اۋقىم ءتۋريزمنىڭ دامۋى بويىنشا جىلدام ناتيجە كورسەتۋ كەرەك كەزدە بۇل جەكەلەگەن قيىندىقتاردى تۋدىرسا, ەكىنشى جاعىنان جەر-سۋلارىمىز – ءبىزدىڭ ماقتانىشىمىز. بارلىعىن تەز ارادا وزگەرتۋ مۇمكىن ەمەس ەكەنىن تۇسىنەمىز. بىراق سالا قاتىسۋشىلارى بىرلەسىپ جۇمىس ىستەگەن كەزدە عانا ناتيجەگە تەز قول جەتكىزۋگە بولاتىنىن تاجىريبە كورسەتتى. مۇنى ساندار دا راستايدى. كورسەتكىشتەر جاقسارىپ كەلەدى, سالاعا سالىنعان ينۆەستيتسيالاردىڭ كولەمى دە ارتقان», دەدى سپيكەر.
ءىس-شارا اياسىندا «اتامەكەن» ۇكپ, Kazakh Tourism ۇك» اق, مادەنيەت جانە سپورت مينيسترلىگى, سونداي-اق گەولوگيا جانە تابيعي رەسۋرستار مينيسترلىگى ەكولوگيالىق دامۋعا باعىتتالعان «جول كارتاسىنا» قول قويدى.
بۇل – ۇلتتىق پالاتا مەملەكەتتىك ورگاندارمەن قول قويعان ءۇشىنشى جول كارتاسى. قۇجات شەڭبەرىندەگى وتكەن جىلعى جۇمىس قورىتىندىلارى تۋرالى Kazakh Tourism ۇك اق باسقارۋشى ديرەكتورى دانيەل سەرجان ۇلى اڭگىمەلەپ بەردى. سپيكەر نەگىزىنەن وقىتۋ باعدارلامالارىنا توقتالدى. ونىڭ مالىمەتى بويىنشا, 2021 جىلى 52 قولونەر شەبەرى ماركەتينگ پەن ءونىمدى برەندتەۋدى ۇيرەنگەن. سونداي-اق ماڭعىستاۋ كۋرورتتىق ايماعىنداعى قوناقۇيلەردىڭ جەلىلىك پەرسونالى دا وقۋعا قاتىسقان. جۇمىستىڭ ۇلكەن اۋقىمى ىشكى تۋريستىك ءونىمدى دامىتۋعا, 14 وبلىس پەن رەسپۋبليكالىق ماڭىزى بار 3 قالادا وتكەن بالالار مەن جاسوسپىرىمدەر ءتۋريزمى وبەكتىلەرىن تۇگەندەۋگە ارنالعان.
سەسسيا شەڭبەرىندە كاسىپكەرلەر مەن مەملەكەتتىك ورگاندار اگرو جانە ساۋىقتىرۋ ءتۋريزمىن دامىتۋ, تۇراقتى دامۋعا كوشۋ ستراتەگياسى تالقىلاندى. ەۋرازيالىق تۋريزم قاۋىمداستىعىنىڭ پرەزيدەنتى رىستى قاراباەۆا ورتالىق ازياداعى تۇراقتى ءتۋريزمنىڭ MOST – مودەلى جوباسىنىڭ قازاقستاندا جۇزەگە اسىرىلۋ بارىسى تۋرالى ايتىپ, جوبانىڭ ماقساتتارىن اتاپ ءوتىپ, ەكولوگيالىق سەرتيفيكاتتاۋ بويىنشا قاشىقتىقتان وقىتۋعا ارنالعان پلاتفورما تۋرالى اقپارات بەردى.
