اڭىزدار اقيقاتقا اينالادى

اتى اڭىزعا اينالعان «لا سكالا» ساحناسىندا ونەر كورسەتۋ وپەرا انشىلەرى ءۇشىن ەڭ بيىك شىڭ دەسەك, سول قاسيەتتى ونەر وشاعىنىڭ كەرەمەتىن يتالياعا ات ارىتىپ بارماي-اق تاماشالاۋ مۇمكىندىگىنە يە بولىپ وتىرعان ەلوردالىقتار قانداي باقىتتى. «استانا وپەرا» مەملەكەتتىك وپەرا جانە بالەت تەاترى تاريحتا العاش رەت «لا سكالا» تەاترىمەن بىرگە «توسكا» وپەراسىنىڭ پرەمەراسىن ۇسىنباق. قويىلىم مامىراجاي مامىردىڭ 9-ى, 11-ءى مەن 12-ءسى كۇندەرى وتەدى دەپ كۇتىلۋدە. «توسكا» وپەراسى «لا سكا­لا» تەاترىنىڭ تۇپنۇسقالىق قويىلىمىنىڭ كوشىرمەسى بولىپ تابىلادى. ايتا كەتۋ كەرەك, مۇنداعى جوعارى ساپالى ماتەريالداردان ازىرلەنگەن دەكوراتسيا­لار مەن كوستيۋمدەر ميلاندىق تەاتردىڭ شەبەرحانالارىندا جاسالۋىمەن اسا ۇزدىك سانالادى. ەلوردا تۇرعىندارى مەن قوناقتارى وپەرانىڭ وتانىندا دۇنيەگە كەلگەن تىڭ تۋىندىنى جاقىننان تاماشالاپ, ۇمىتىلماس اسەرگە بولەنبەك. پاۆاروتتي, دومينگو, كار­رەراستان كەيىنگى ءتورتىنشى تەنور اتانۋعا نيەتتى, ونەرى وتە جوعارى سۇرانىسقا يە مارسەلو الۆارەس كاۆارادوسسيدى, يتالياندىق تانىمال سوپرانونىڭ ءبىرى اننا پيروتستسي توسكانى, اتاقتى باريتون پاولو سيلۆەريدىڭ شاكىرتى البەرتو ماسترومارينو سكارپيانى سومدايتىن عاجايىپ جوبانىڭ ەرەكشەلىگى – ودان جەرگىلىكتى جەردەگى تالانتتار دا تىس قالىپ قويمايتىن ءتۇرى بار. الەمدىك دەڭگەيدەگى ماەسترو دانيەل ورەن ديريجەرلىك ەتەتىن, رەجيسسەر لۋكا رونكوني ساح­نالاعان شوقتىعى بيىك قويىلىم تەاتر الەمىندەگى ايتۋلى وقيعانىڭ بىرىنە جاتۋدا. ءبىر عاسىردان استام ۋاقىت بۇرىن دۇنيەگە كەلگەن تۋىندى دۇنيەجۇزى تەاترلارى رەپەرتۋارلارىنداعى ەڭ ءجيى ورىندالاتىن ۇزدىك وپەرانىڭ ءبىرى دەسەك, اتالمىش مۋزىكالىق شىعارمانىڭ تاعى ءبىر قىرى – مۇنداعى اۋەن ءبىرتالاي كينوفيلمدەردە شىرقالعاندىقتان كوپشىلىككە اسا تاڭسىق بولا قويادى دەپ ويلامايمىز. وعان قوسا مۇنىڭ جەلىسى وپەراداعىداي دراماتيزمگە, ساتقىندىققا, ءولىم جازاسىنىڭ كورىنىستەرىنە تولى بولعاندىقتان, دج. ءپۋچچينيدىڭ درامالىق وپەراسىنىڭ اسەرلى كورىنىستەرى جۇرتشىلىقتى باسىنان اياعىنا دەيىن ءجىپسىز بايلاپ ۇستارىنا سەنىم مول. مارگەريتا ءپالليدىڭ قۇشتار سەزىممەن جەتكىزەتىن دەكوراتسيا­سى وتكەن جۇزجىلدىقتىڭ تاريحي وقيعاسى بولىپ سانالاتىن ناپولەون باسقارعان فرانتسۋز اسكەرىنىڭ 1800 جىلى يتالياعا باسىپ كىرگەن كەزىن سۋرەتتەيدى. ۆەرا مارزوتتىڭ نوبايىمەن ازىرلەنگەن كوستيۋمدەردىڭ تاريحي ناقىشى سول كەزەڭدەر سۋرەتىن ايشىقتى كورسەتۋمەن قاتار, وقيعانى انىق تا ءدال بەينەلەۋگە قىزمەت ەتەدى. جەتىقارا قوڭىر. استانا.