بيىل ەلدەگى ەڭسەلى وقۋ ورداسى – ءال-فارابي اتىنداعى قازاق ۇلتتىق ۋنيۆەرسيتەتى 80-ءشى كوكتەمىن ناۋرىز تويىمەن قارسى الدى.
مەرەيلى كوكتەم مەرەكەسى قازۇۋ رەكتورى عالىمقايىر مۇتانوۆتىڭ, ارنايى قۇتتىقتاپ كەلگەن شەتەلدىك قوناقتاردىڭ جانە اقساقالداردىڭ سوزىنەن سوڭ, «تازا كامپۋس» بايقاۋىنىڭ جەڭىمپازدارىن ماراپاتتاۋ ءراسىمىنىڭ جانە ەكىنشى «امانات» كىتابىنىڭ تۇساۋكەسەرىنە ۇلاستى.
ستۋدەنتتەر قالاشىعىندا وتكەن ناۋرىز بيىل بار ءسان-سالتاناتىمەن ەستە قالاتىن بولادى. ءبىر دەممەن جۇرتتى جالىقتىرماي وتە شىققان مەيرامدا بارشانى «ناۋرىز-دۋمان» مۋزىكالىق-تەاترلاندىرىلعان كورىنىسى كۇتىپ تۇردى. وندا ەسكى قالا تۇرعىندارى جاسى مەن قارياسى ناۋرىزدى قارسى الىپ, مەرەكەلەپ جاتتى. ولار اسا زور قۋانىشپەن «دوستىق ءبيىن» بيلەپ, قىزدار مەن جىگىتتەر ءان ايتىسقا ءتۇسىپ, ءتۇرلى اسپاپتاردا ويناپ, مەرەكە كوركىن قىزدىرا ءتۇستى. قازاق حالقىنىڭ ۇلتتىق «كەلىن ءتۇسىرۋ», «بەتاشار», «وتقا ماي قۇيۋ», «تويباستار», «باتا بەرۋ» سالت-داستۇرلەرى دە وتكىزىلدى. جالپىعا ورتاق مەيرامنىڭ سوڭى «قارا جورعا» بيىنە ۇلاستى.
ناعىز قازاقى ءداستۇر ساقتالعان شارادا كوزدىڭ جاۋىن الاتىن, اسەم 20 كيىز ءۇي تىگىلىپ, مەرەكەنىڭ مەيىرىن سەزىنگەن جۇرت ناۋرىز كوجە, باۋىرساق, ۇلتتىق تاعامنان ءدام تاتىپ, اسەم اندەر مەن مىڭ بۇرالا بيلەگەن بيشىلەردىڭ ءبيىن, سازدى اندەرىن تىڭداپ, تاڭدانىپ, ۇلتتىق مەيرامدى ۇلتتىق ۋنيۆەرسيتەتتە قارسى العاندارىنا قۋانىش ءبىلدىردى. وسى ورايدا قازاق قولونەر جانە زەرگەرلىك بۇيىمدارىنان كورمە ۇيىمداستىرىلىپ, باتىل جانە مىقتىلارى ۇلتتىق سپورت ويىندارى بويىنشا سپورتتىق جارىستاردا سايىستى.
ناۋرىز تويىنا قازۇۋ-ءدىڭ 10 مىڭداي وقىتۋشىلارى مەن ستۋدەنتتەرى, شەتەل ديپلوماتيالىق كورپۋسى وكىلدەرى, الماتىدا ءتىركەلگەن حالىقارالىق ۇيىمدار مەن ديپلوماتيالىق ميسسيالار باسشىلارى جانە الماتى قالاسى اكىمدىگىنىڭ وكىلدەرى, باق باسشىلارى, قازۇۋ ارداگەرلەر مەن اقساقالدار كەڭەسى, ستۋدەنتتىك قوعامدىق ۇيىمداردىڭ مۇشەلەرى دە قاتىستى.
ايناش ەسالي,
«ەگەمەن قازاقستان».
الماتى.
