«وبلىستىق پروكۋراتۋرا الماتى وبلىسىنىڭ اۋىل شارۋاشىلىعى باسقارماسىن تەكسەرىپ, جالپى سوماسى 95,2 ملن تەڭگەگە اۋىل شارۋاشىلىعى تاۋار وندىرۋشىلەرىن زاڭسىز سۋبسيديالاۋ فاكتىلەرىن انىقتادى. سۋبسيديالاۋ قاعيدالارى بويىنشا اۋىل شارۋاشىلىعى تاۋارىن وندىرۋشىلەر ( «قابانباياگرو» اوك, «بەسكول» اوك, «كەربۇلاقاگرو دامۋى» اوك جانە «بەكارىس-2» اوك) سۋبسيديالانعان قوي تولدەرىن ساقتاپ, ازايۋىنا جول بەرمەۋ تالاپتارىن ورىنداماعان», دەپ مالىمدەدى الماتى وبلىسى پروكۋراتۋراسىنىڭ ءباسپاسوز قىزمەتى.
ۆەدومستۆو وكىلىنىڭ مالىمدەۋىنشە, پروكۋراتۋرانىڭ قاداعالاۋ اكتىسى بويىنشا اۋىل شارۋاشىلىق باسقارماسى مامانداندىرىلعان اۋدانارالىق ەكونوميكالىق سوتىنا بيۋدجەت قاراجاتىن قايتارۋ تۋرالى 3 تالاپ ارىز بەردى. الايدا ەكونوميكالىق سوت تالاپ ارىزداردى قاناعاتتاندىرۋسىز قالدىرعان.
«وسىعان بايلانىستى پروكۋراتۋرا وبلىستىق سوتقا اپەللياتسيالىق ءوتىنىش حاتتار جولدادى. وبلىستىق سوت پروكۋراتۋرانىڭ قاداعالاۋ اكتىلەرىن تولىق كولەمدە قاناعاتتاندىرىپ, ءبىرىنشى ساتىداعى سوتتىڭ شەشىمدەرىنىڭ كۇشى جويىلدى. قازىرگى ۋاقىتتا سوت ورىنداۋشىلارى بيۋدجەت قاراجاتىن ءماجبۇرلى تۇردە قايتارۋ بويىنشا شارا قولدانىپ جاتىر», دەلىنگەن اقپاراتتا.
