– ماسامەن كۇرەستى جۇيەلى تۇردە جۇرگىزىپ وتىرمىز. 5-31 مامىر ارالىعىندا دەرناسىلدەرىن ۋلادىق. ال 12 ماۋسىمنان باستاپ ۇشىپ جۇرگەن ماسالاردى ۋلاۋمەن الەكپىز. شاما كەلگەنشە, ازايتۋعا تىرىسۋدامىز. ەندى ۇشاق شاقىرتىپ, ءبىر ءجۇرىپ وتسە دەيمىز. بىراق ءتۇپ-تۇياعىمەن جويا المايمىز. ماسانىڭ ۇياسى ىلعالدى, قامىستى, باتپاقتى جەردە بولادى. سوندىقتان وزەن اڭعارىنداعى شالشىق سۋلاردى قۇرعاتۋ كەرەك, – دەيدى «زايسان اۋداندىق دەزينفەكتسيالاۋ ستانتسياسى» جشس-نىڭ باس مامانى بيبيگۇل باتىرحانوۆا.
اۋىلدىقتاردىڭ ايتۋىنشا, كەڭەس وكىمەتى تۇسىندا ۇشاقپەن ۋلاپ, قۇستارعا دەيىن قىرىپ سالادى ەكەن. ارينە, قۇستاردى ەمەس, تەرەزەلەردە كيىز بولىپ تۇرعان ماسالاردى جويۋ كەرەك. بىلتىرلارى دەلتاپلانمەن ۋ شاشىپ, ازايتپاق بولىپتى. الايدا ەش پايدا بولماعان. ۇشىپ جۇرگەن ماسالاردى عانا قىرىپ سالعان كورىنەدى. ناتيجە بولماعان سوڭ, بيىل ماماندار قولمەن شاشىپ ۋلاۋعا كىرىسكەن.
– كۇرشىم اۋداندىق تۇرعىن ءۇي-كوممۋنالدىق شارۋاشىلىعىنان قارجى ءبولىنىپ, ماسالاردى ۋلاۋعا كوكتەمدە كىرىسكەنبىز. مىناۋ كۇننىڭ قاپىرىعىندا ايەلدەر تۇمشالانىپ, ۋ شاشىپ ءجۇر. قولدان كەلگەنشە ەڭبەكتەنىپ-اق جاتىر. بىراق ماڭايدىڭ ءبارى سازداۋىت. مەنىڭشە, عىلىمي-زەرتتەۋ جۇرگىزىپ بارىپ, ىسكە كىرىسپەسەك, بولمايتىن سەكىلدى, – دەيدى قالجىر اۋىلدىق وكرۋگىنىڭ اكىمى قۋات قيزاتوۆ.
جالپى, دەزينفەكتسيالاۋ جۇمىستارىنا 18 ملن 750 مىڭ تەڭگە قاراستىرىلعان ەكەن. ونىڭ 10 ملن تەڭگەگە جۋىعى «زايسان اۋداندىق دەزينفەكتسيالاۋ ستانتسياسى» جشس-نا بەرىلگەن. العاشىندا دەرناسىلدەرىن «بايتسيدال», «اگران» دەيتۇعىن دەزينفەكتسيالىق پرەپاراتتارمەن ۋلاعان. ەكىنشى كەزەڭدە «امازان», «تسيفوكس», «فوبي» سەكىلدى پرەپاراتتاردى پايدالانۋدا. ال ەكولوگ مامانداردىڭ پايىمداۋىنشا, ماسانىڭ مۇنشالىقتى شەكتەن تىس كوبەيۋى قۇستاردىڭ ازايىپ كەتكەندىگىنەن ەكەن. ول دا مۇمكىن. وتكەندە ورنيتولوگ عالىم بوريس ششەرباكوۆ قۇستىڭ قاي ءتۇرى بولسىن, ازايىپ كەتكەندىگىن ايتىپ دابىل قاققان. بالكىم, وكرۋگ اكىمى ايتقانداي, جەدەل تۇردە عىلىمي-زەرتتەۋ جۇمىستارى جۇرگىزىلۋى كەرەك شىعار. ايتپەسە, ۋلاپ تاۋىسۋ مۇمكىن ەمەس, راس.
ادەتتە ەل جاز شىقسا قۋانار ەدى. ال قالجىر, بوران جاقتىڭ تۇرعىندارى الاڭداي باستايدى. الا جازداي ماسانىڭ ىزىڭى قۇلاقتان كەتپەيدى. ىزىڭىن قويشى, ينفەكتسيا تاراتۋى ابدەن مۇمكىن. قالا بەردى مالدىڭ جايىلۋى قيىنداعان. تاڭەرتەڭ, كەشكە سيىر ساۋ دا اۋرە ەكەن. ءتۇتىن سالادى, حيميالىق زاتتارىن شاشقان بولادى. قايران جوق.
– ماسا دەگەنگە ءمان بەرمەيتىن دە شىعار جوعارعى جاق. بىراق بۋىپ تۇرعان ماسا ءبىزدى ابدەن قاجىتتى. دالادا ءجۇرۋ مۇمكىن ەمەس. سەنەسىزدەر مە؟ قالجىر مەن قارا ەرتىستىڭ ورتاسىندا وتىرمىز. ماسانىڭ ورداسى. بالانى قويىپ, ءوزىمىز دالاعا شىعۋعا تارتىنشاقتايمىز. بەت سوعادى. تۇك قالدىرماي تالايدى. ءشوبىمىزدى قالاي شاۋىپ الامىز, بىلمەيمىن. بىلتىر دا وسىلاي بولعان. بيىل ازاياتىن شىعار دەگەنبىز. كوبەيمەسە, ازايعان جوق. ماسا ماسەلەسىن رەسپۋبليكاداعى باسشىلارعا سىزدەر جەتكىزبەسەڭىزدەر, اۋدان مەن وبلىس باسشىلارىنا دەس بەرەيىن دەپ تۇرعان جوق, – دەيدى بوران اۋىلىنىڭ تۇرعىنى گۇلجان ساكەنوۆا.
بۇل ءبىر عانا تۇرعىننىڭ تىلەگى ەمەس, قالجىر, بوران, قازاقستان, يگىلىك, جاڭا اۋىل سەكىلدى بىرنەشە اۋىل تۇرعىندارىنىڭ ءوتىنىشى, ارىز-تىلەگى. ونىڭ ۇستىنە تورعايداي ماسا ءبىر عانا دەزينفەكتسيالاۋ ستانساسىنىڭ ماماندارىنا بوي بەرمەيتىن سياقتى.
شىعىس قازاقستان وبلىسى,
كۇرشىم اۋدانى
