تۇرعىنداردان تۇسكەن ءار ساۋال مۇقيات زەرتتەلىپ, 150-گە جۋىق ادام جينالعان ەكى ستراتەگيالىق سەسسيا وتكىزىلىپتى. جيىندا قالالار مەن اۋىلداردان ارنايى ات باسىن بۇرعان ءار جاستاعى ازاماتتار توبە كورسەتىپتى. ءتىپتى قاڭتار وقيعاسىنا قاتىسقاندار دا ورتادان تابىلعان. وسىلايشا, كوپشىلىكتىڭ تالقىلاۋىنان كەيىن 2022 جىلعا ارنالعان باعدارلامانىڭ مازمۇنى بەكىتىلگەن. سوعان سايكەس, ەكى قولعا ءبىر كۇرەك تابا الماي جۇرگەن 5 مىڭ جاسقا جۇمىس تاۋىپ بەرۋ, 12 مىڭ وقۋشىعا بوس ۋاقىتتى ءتيىمدى پايدالانۋ ءۇشىن ىڭعايلى جاعداي جاساۋ سياقى شارالار قامتىلعان. العاشقى ناتيجەلەر جامان ەمەس. ماسەلەن, 25 جاستاعى باياناۋىلدىق سايان ءاۋ باستا ءوزىن-ءوزى جۇمىسپەن قامتىعانداردىڭ ساناتىندا جۇرسە, بۇگىندە كاسىپكەرلىك كۋرستارىن مەڭگەرىپ, جەكە شاعىن بيزنەسىن ورگە دومالاتىپ وتىر. 20 جاستاعى مارگاريتا جۇمىسسىز جۇرگەن ەدى. قازىر تەرەڭكول اۋدانىنىڭ اكىمدىگىندە ادىسكەر بولىپ ناپاقا ايىرۋدا. قىسقاسى, جاڭا باعدارلاما ىسكە قوسىلعاننان بەرى 6 مىڭ پاۆلودارلىق تۇراقتى جانە ۋاقىتشا جۇمىسقا ورنالاسقان. مەجەگە قول جەتكىزۋ ءۇشىن جۇمىسپەن قامتۋ ورتالىقتارىنىڭ قاعيداتتارى وزگەرتىلىپ, ماماندار شالعاي اۋىلدارعا, ادامدار تىعىز ورنالاسقان ەلدى مەكەندەرگە قاتىناعان. جۇمىسپەن قامتۋ ءموبيلدى ورتالىقتارىنىڭ دا پايداسى وراسان. جۇمىس ىزدەپ اۋرە بولمايسىز. ۇيدە وتىرىپ-اق ەكى قولعا ءبىر كۇرەك تابا الاتىن مۇمكىندىك بار. 19 ءبىلىم بەرۋ مەكەمەسىندە جاستارعا ارنالعان ورتالىقتار اشىلدى. كادىمگى حالىققا قىزمەت كورسەتۋ ورتالىقتارى سياقتى كەڭەس بەرىپ, قۇجاتتاردى رەتتەۋگە, وزگە دە ماسەلەنى شەشۋگە جاردەمدەسەدى.
جاڭا باعدارلاماعا سايكەس, تاعدىردىڭ تاۋقىمەتىن تارتىپ, قيىن جاعدايدا قالعان وتباسىلاردى انىقتاۋ كوزدەلگەن. ەستە بولسا, بيىل اقپاندا ەكىباستۇز قالاسىندا جاعىمسىز جاعداي ءدۇيىم ەلدى ەلەڭ ەتكىزگەن-ءدى. پاتەرلەردىڭ بىرىنەن كۇتىمسىز قالعان ءتورت بالدىرعان تابىلعان ەدى. ودان كەيىن دە سوعان ۇقساس وقيعا تىركەلگەن بولاتىن. وسى رەتتە جەرگىلىكتى بيلىك «وتباسىنىڭ تسيفرلى كارتاسى» شەڭبەرىندە الەۋمەتتىك ءالسىز وتباسىلارعا ءتيىستى تولەماقىنى الۋ, قۇجاتتاردى رەتتەۋ سياقتى ۇلكەن قولداۋ كورسەتىپ جاتقان كورىنەدى. مۇنداي كومەك 55 وتباسىنا كورسەتىلگەن. پسيحولوگيالىق قولداۋدى 12 وتباسى سەزىنىپ, 39 ادام جۇمىسقا ورنالاسقان. جالپى, جاڭا باعدارلامادا 10 باعىت بويىنشا 97 ناقتى ءىس-شارا قاراستىرىلعان.
– اتالعان باعدارلاما حالىقتىڭ يگىلىگى ءۇشىن جاسالعانىن كورىپ وتىرسىزدار. سەبەبى حالىقتىڭ ءوزى ونى تالقىلاۋعا جانە ازىرلەۋگە قاتىستى. اتا-بابالارىمىز اقساقالدار, بيلەر كەڭەسىن شاقىرىپ, قۇرىلتايدا بىرلەسىپ شەشىم قابىلداۋدىڭ تيىمدىلىگى ەرەكشە ەكەنىن بۇرىننان بىلگەن. ونىڭ تاعى ءبىر دالەلى – پرەزيدەنتىمىز قاسىم-جومارت توقاەۆ بەكىتكەن حالىقپەن كەزدەسۋلەردىڭ جاڭا فورماتى. مەن, مەنىڭ ورىنباسارلارىم جانە باسقارما باسشىلارى وسى ۋاقىتقا دەيىن 100-گە جۋىق اۋىلدى ارالادى. كەزدەسۋلەردە 536 سۇراق قويىلدى, ونىڭ 40 پايىزى جەدەل شەشىلدى. مۇنداي شارالاردىڭ تيىمدىلىگى وتە جوعارى, سەبەبى كەزدەسۋگە تۇرعىندار, اۋدان, وبلىس باسشىلىعى, قۇقىق قورعاۋ جانە باسقا ورگاندار وكىلدەرى قاتىسادى. بىرلىكپەن بىرلەسىپ شەشىم قابىلداۋ – باستى ماقساتتىڭ ءبىرى, – دەدى ءا.سقاقوۆ.
ايماق باسشىسى ەمحانالاردىڭ جۇمىسىنا قاتىستى تۇرعىنداردان شاعىم كوپ تۇسەتىنىن ايتتى. پاۆلودارلىقتار كوبىنە كەزەكتى كوپ كۇتەتىندەرىن, مەديتسينا قىزمەتكەرلەرىنىڭ دورەكى جاۋاپ قايتاراتىنىن, تەلەفونمەن حابارلاسۋ مۇمكىن ەمەس ەكەنىن جەتكىزىپتى. ماسەلەنى شەشۋ ءۇشىن وبلىس اكىمى ەمحانالاردى ارالاپ, ءتيىستى ورگان باسشىلارىمەن بىرگە ناقتى شارالار قولعا الىندى. ناتيجەسى جامان ەمەس. قازىرگى ۋاقىتتا پاتسيەنتتەردىڭ ەمحانالارعا قوڭىراۋ شالۋ كەزىندەگى كۇتۋ ۋاقىتى 4 ەسەگە, مەدبيكەلەر بەكەتتەرىن ەنگىزۋ ەسەبىنەن دارىگەرلەردىڭ جۇكتەمەسى 35 پايىزعا ازايعان. ەمحانالاردا تسيفرلى بەكەتتەر ورناتىلىپ, call-ورتالىقتاردىڭ, تىركەۋ بولىمدەرىنىڭ جانە باسقا دا قۇرىلىمدىق بولىمشەلەردىڭ 385 قىزمەتكەرى ارنايى وقىتۋدان وتكەن. وڭىردە جاس ماماندارعا رەزيدەنتۋرادا وقۋ ءۇشىن گرانتتار ءبولىنىپ, قولداۋ كورسەتىلۋدە. ماسەلەن, وبلىس ورتالىعىنداعى مەديتسينالىق كوللەدج جاتاقحاناسى قايتا جاڭعىرتىلىپ, جاس دارىگەرلەردىڭ وتباسىلارى ءۇشىن كوپپاتەرلى تۇرعىن ءۇي سالۋ جوسپارلانعان.
– وبلىستا وقۋشىلاردىڭ جارتىسىنان كوبى تەگىن ىستىق تاماقپەن قامتاماسىز ەتىلگەن. بۇعان ءوڭىر بيۋدجەتىنەن ءتيىستى قارجىلاندىرۋدى ۇلعايتۋ اسەر ەتتى. ول 1,8 ەسەگە ءوسىپ, 3,9 ملرد تەڭگەنى قۇرادى. ءبىرىنشى مامىردان باستاپ وڭىردەگى بارلىق ءۇش قالادا مەكتەپ وقۋشىلارى قوعامدىق كولىكتە تەگىن ءجۇرۋ مۇمكىندىگىنە يە بولدى. بالالارعا ارنالعان سپورت ينفراقۇرىلىمىن كەڭەيتۋ جوسپارلارى دا اۋقىمدى. وبلىستا 7 ءىرى سپورت نىسانى, 13 شاعىن فۋتبول الاڭى جانە 63 سپورت الاڭى سالىنۋدا.
– وبلىستا 7-11 سىنىپ وقۋشىلارىنا بولاشاق ماماندىقتارىن تابۋعا كاسىبي باعدارلاۋ باعدارلاماسى وڭ سەپتىگىن تيگىزۋدە. قازىرگى كەزدە باعدارلاما 20 مىڭ وقۋشىنى قامتىدى. ءبىز 150-گە جۋىق مەكتەپ كىتاپحاناسىن جاڭعىرتىپ, بارلىق وقۋشىنىڭ مۋزەيگە تەگىن بارۋىن ۇيىمداستىردىق. پىكىرسايىس قوزعالىسىن دامىتىپ, اقپاراتتىق تەحنولوگيالارعا وقىتۋدىڭ ۇزدىكسىز جۇيەسىن قۇردىق جانە دارىندى بالالاردى «تاۋەلسىزدىك ۇلانى» سىيلىعىمەن ماراپاتتاۋ ارقىلى ىنتالاندىرامىز, – دەدى ءا.سقاقوۆ.
بريفينگ بارىسىندا وبلىس اكىمى جۋرناليستەردىڭ ساۋالىنا تولىمدى جاۋاپ بەردى.
پاۆلودار وبلىسى
