بالۋاندار باسەكەسىنىڭ العاشقى كۇنىندە «قاراعاندى ارەناعا» جينالعان جانكۇيەرلەر 74 كيلو سالماقتاعى سپورتشىلاردىڭ سايىسىن قىزىعا تاماشالادى. سەبەبى بۇل سالماق دارەجەسىندە كىل مىقتىلار جينالعان ەكەن. سولاردىڭ اراسىنان نۇرقوجا قايپانوۆ پەن دانيار قايسانوۆ سۋىرىلىپ شىقتى. ءبىرى – ەلىمىزدىڭ سولتۇستىك, ەكىنشىسى – شىعىس ءوڭىرىنىڭ تۋماسى. ەكەۋىنىڭ دە ەسىمى قالىڭ كورەرمەنگە ەتەنە تانىس. 24 جاستاعى نۇرقوجا 2019 جىلى نۇر-سۇلتانداعى الەم چەمپيوناتىندا كۇمىس مەدالدى موينىنا ءىلىپ, 2019 جانە 2021 جىلدارى ازيا بىرىنشىلىگىندە باس جۇلدەنى ولجالادى. وسىدان ەكى اي بۇرىن موڭعوليادا وتكەن سارى قۇرلىقتىڭ باستى دوداسىندا قايپانوۆ كۇمىس مەدالدى يەلەندى. 28 جاستاعى دانياردىڭ الەم چەمپيوناتىنىڭ قولا جانە ازيا ويىندارىنىڭ كۇمىس جۇلدەگەرى دەگەن اتاقتارى بار. قايسانوۆ تا ازيا چەمپيوناتىنىڭ التىن تۇعىرىنا ەكى مارتە كوتەرىلدى.
نەگىزى «قايپانوۆ مىقتى ما, قايسانوۆ پا؟» دەگەن سۇراق جانكۇيەرلەردىڭ كوكەيىندە كوپتەن بەرى جۇرگەن ەدى. وسىنداي ساۋال جولدانعان ساتتە كوپتى كورگەن كانىگى باپكەرلەردىڭ ءوزى دە جاۋاپ بەرە الماي, ءبىراز ابىگەرگە تۇسكەنىنە سان مارتە كۋا بولعانبىز. بۇل جولى قوس مىقتىنىڭ جولى فينالدا ءتۇيىستى. ءبىرىنشى كەزەڭ تەك اڭداسۋمەن ءوتتى. سوڭعى ساتتە العاشقى ۇپاي دانياردىڭ ەنشىسىنە جازىلدى. ونىڭ وزىندە جاسالعان ۇتىمدى ءادىسى ءۇشىن ەمەس, بەلسەندىلىگى ءۇشىن بەرىلدى. ۇزىلىستەن كەيىن قايسانوۆ ءجيى شابۋىلداعانىمەن, قارسىلاسى ۇنەمى ونىڭ الدىن وراپ وتىردى. سونداي مەزەتتەردىڭ بىرىندە قارسىلاسىنىڭ ارتىنا شىعىپ, ەكى ۇپايدى يەلەندى. ءبىراز ۋاقىتتان سوڭ قايتا ءدال سونداي ارەكەتكە باردى. اقىرىندا امالى تاۋسىلعان دانيار قارسىلاسۋدى قويدى. ناتيجەسىندە, 14:3 ەسەبىمەن جەڭىسكە جەتكەن نۇرقوجا قايپانوۆ قازاقستان چەمپيونى اتاندى. ال قولا مەدالدى پاۆلودارلىق ازات ساقاەۆ پەن الماتى وبلىسىنىڭ وكىلى ەرنار ساتىبالدى يەلەندى.
ءدال وسى سالماقتا الەم چەمپيوناتىنىڭ كۇمىس جۇلدەگەرى نۇرلان بەكجانوۆ پەن جۋىردا عانا الماتىدا وتكەن «بولات تۇرلىحانوۆ كۋبوگىندا» ورەلى ونەرىمەن كوزگە ءتۇسىپ, كۇمىس مەدالدى يەلەنگەن روديون انچۋگين دە كۇرەسۋگە ءتيىس ەدى. الايدا جاراقاتىنا بايلانىستى ولار بوز كىلەمگە شىقپادى. ەلىمىزدىڭ تاعى ءبىر بەدەلدى بالۋانى ازامات ءومىرجانوۆ بولسا, العاشقى اينالىمنان اسا المادى.
79 كيلو سالماق دارەجەسىنىڭ فينالىندا اتىراۋلىق بولات ساقاەۆ پەن ماڭعىستاۋلىق جىگەر زاكىروۆ بەلدەستى. بۇل تارتىس العاشقىسىنىڭ پايداسىنا شەشىلدى. تاياۋدا عانا الماتىدا ۇيىمداستىرىلعان «بولات تۇرلىحانوۆ كۋبوگىندا» ءدال وسى بالۋان ەركىن كۇرەستەن قازاقستان قۇراماسىنىڭ قورجىنىنا جالعىز التىندى سالعان ەدى. بۇل جولى دا بولات ءوزىنىڭ بابىندا ەكەنىن بايقاتتى.
57 كيلو سالماقتا جامبىلدىق راحات قالجانعا تەڭ كەلەر ەشكىم تابىلمادى. فينالدا ول شىمكەنتتىك جاھانگەر احماتجانوۆتان ايلاسىن اسىردى. شىمكەنت قالاسىنىڭ تاعى ءبىر بالۋانى اسىل ايتاقىن مەن الماتى وبلىسىنىڭ وكىلى ءوسىمجان داستانبەك 61 كيلو سالماق دارەجەسىنىڭ باس جۇلدەسىن ءوزارا ساراپقا سالدى. بۇل باسەكەدە اسىلدىڭ اسىعى الشىسىنان ءتۇستى. 97 كيلو سالماقتا مامەد يبراگيموۆ ەل چەمپيونى اتاندى. پاۆلودارلىق بالۋان فينالدا قاراعاندىلىق سەرىك باقىتحانوۆتان باسىم ءتۇستى.
