جۋرناليستەرگە جۇلدە جاۋعان كۇن

«تۇمار» بايقاۋىنىڭ جەڭىمپازدارى انىقتالدى

قىزىل كىلەم, ءسانى مەن ءمانى كەلىس­كەن بەزەندىرۋ, اسەم كيىنگەن تەلە­ما­مانداردىڭ شات-شادىمان كوڭىل كۇيى جۋرناليستەردىڭ ءتول دۋمانى, كاسىبي مەرە­كەسىندە ەرەكشە اسەر سىيلادى. «قازمەديا» ورتالىعىنىڭ كونتسەرت زالىندا وتكەن تەلەونەر تويىنا پرەمەر-ءمينيستردىڭ ورىنباسارى ەرالى توع­جانوۆ, مەملەكەتتىك كەڭەسشى ەرلان قارين, اmanat پارتياسىنىڭ اتقارۋشى حاتشىسى اسحات ورالوۆ, اقپارات جانە قوعامدىق دامۋ ءمينيسترى اسقار وماروۆ, پارلامەنت سەناتىنىڭ دەپۋتاتتارى دانا نۇرجىگىت, دارحان مىڭباي,  نۇر-سۇلتان قالاسىنىڭ اكىمى التاي كول­گىنوۆ, «ەگەمەن قازاقستان» رگ» جشس باس ديرەكتورى دارحان قىدىرالى, QAZAQSTAN رترك اق باسقارما تور­اعاسى ءلاززات تانىسباي, «حابار» اگەنت­تىگى» اق باس­قارما توراعاسى بەرىك ءۋالي, پرە­زيدەنت تەلە­را­ديوكەشەنىنىڭ باس ديرەك­تورى راۋشان قاجىباەۆا, مەملەكەت جانە قوعام قايرات­كەرلەرى, قازاق تەلەۆي­زياسىنىڭ ارداگەر­لەرى مەن جۋرناليستەر, ەسترادا انشىلەرى قاتىس-
تى.

2017 جىلدان بەرى جىل سا­يىن قازاق تەلەۆيزياسى ۇزدىكتەرىن انىقتاپ, تەلەجۋرناليستەردىڭ كاسىبي دارەجەسىن كوتەرۋگە ارنالعان «تۇمار» سىيلى­عى بيىل 10 اتالىم بويىنشا جۇز­دەن جۇيرىك شىققان مىقتىلارعا بۇ­يىر­دى. ساراپتاۋ القاسىنا 300-گە جۋىق ءوتىنىم كەلىپ تۇسكەن, ەڭ كوپ ءوتىنىم «ۇزدىك دەرەكتى فيلم», «ۇزدىك اقپاراتتىق باعدارلاما», «ۇزدىك الەۋمەتتىك جوبا», «ۇزدىك تەلەجۋرناليست», «ۇزدىك تەلەجۇرگىزۋشى» اتالىمدارى بويىنشا قابىلدانعان.

سونىمەن بايگە قورىتىندىسى بويىنشا ەڭ الدىمەن پرەمەر-ءمينيستردىڭ ورىنباسارى ەرالى توعجانوۆ «ۇزدىك دەرەكتى فيلم» اتالىمىنىڭ جەڭىمپازىن جاريالادى. مۇندا ATYRAY تەلەارناسى تۇسىرگەن «كاسپيدەن كەتكەن قىپشاقتار» ءفيلمى توپ جاردى.

«ۇزدىك اقپاراتتىق باعدار­لاما» جۇلدەسىنە ASTANA TV تەلە­ارناسىنىڭ Saraptimes باعدار­لاماسى لايىق دەپ تانىلدى. مۇسىن­شەنى نۇر-سۇلتان قالاسىنىڭ اكىمى التاي كولگىنوۆ تابىستادى.

«ۇزدىك الەۋمەتتىك جوبا» اتالىمىندا «كتك» تەلەارناسىنىڭ «داۋ-دامايسىز» جوباسى كوش باستادى. ونى پرەزيدەنت تەلەراديوكەشەنىنىڭ باس ديرەكتورى راۋشان قاجىباەۆا تابىس ەتتى.

«ۇزدىك توك-شوۋ» جۇلدەسىن جۋرناليست كەمەلبەك ويشىباەۆ بەردى, بۇل جۇلدەنى «Atameken Business» تەلەارناسىنىڭ «ۆرەميا گوۆوريت» جوباسى جەڭىپ الدى.

«ۇزدىك ويىن-ساۋىق باعدارلاماسى» اتالىمىندا «الماتى» تەلەارناسى ازىرلەگەن «Almaty Bala Fest» جوباسى ۇزدىك اتاندى. جۇلدەنى سەنات دەپۋتاتى دانا نۇرجىگىت تاپسىردى.

«ۇزدىك تەلەۆيزيالىق سەريال» سىيلىعىن تابىستاۋ ءۇشىن ساحناعا «ەكسپرەسس-ك» گازەتىنىڭ باس رەداكتورى الەكساندر اكسيۋتيتس شاقىرىلدى. مۇندا قازىلار القاسىنىڭ شەشىمى­مەن Qazaqstan ۇلتتىق تەلەارناسى تۇسىرگەن «احمەت. ۇلت ۇستازى» ۇزدىك سەريال اتاندى.

سونىمەن بىرگە ايماقتار اراسىندا Turkistan تەلەارناسى «ۇزدىك ايماقتىق تەلەارنا» اتاندى. بۇل سىيلىقتى Amanat پارتياسىنىڭ اتقارۋشى حاتشىسى اسحات ورالوۆ تابىستادى.

«ۇزدىك رەجيسسەرلىك جۇمىس» نومي­نا­تسياسىندا «Qazaq TV» تەلەارنا­سىنىڭ «جەنا» جوباسى توپ جاردى.

«ۇزدىك تەلەجۋرناليست» جۇلدەسىن ءماجىلىس دەپۋتاتى دارحان مىڭباي تابىس ەتتى. مۇندا «حابار 24» تەلەارناسىنىڭ وڭتۇستىك كورەياداعى مەنشىكتى ءتىلشىسى ۆلاديسلاۆ تسوي جەڭىمپاز اتاندى. ۆ.تسوي سالتاناتتى ماراپاتتاۋ كەشىنە سەۋلدەن تىكەلەي ەفيرگە شىقتى.

كەش سوڭىندا «ۇزدىك تەلەجۇر­گىزۋشى» اتالىمىندا «31 ارنا» تەلەجۇرگىزۋشىسى اسقار مەڭدىباەۆ جەڭىمپاز اتاندى. جۇلدەنى اقپارات جانە قوعامدىق دامۋ ءمينيسترى اسقار وماروۆ تابىستادى.

«ادىلقازى القاسىنىڭ ارنايى سىيلىعى» «بالاپان» تەلەارناسىنا بۇيىردى. ارنايى سىيلىقپەن ەرلان قارين ماراپاتتادى.

ايتا كەتسەك, «تۇمار» جۇلدەسىن ماراپاتتاۋ كەشىندە بالالار جىلىنا ەرەكشە ءمان بەرىلدى. كەشتى بالالار جۇرگىزدى جانە بارلىق جەڭىمپاز بالالارمەن بىرگە ساحناعا شىقتى.

«تۇمار» ۇلتتىق تەلەۆيزيالىق بايگەسى 2017 جىلى اقپارات جانە قوعامدىق دامۋ مينيسترلىگىنىڭ باستاماسىمەن قۇرىلعان. جەڭىمپازدار قازاق­ستاندىق تەلەۆيزيانى دامىتۋعا قوسقان ۇلەسى ءۇشىن «تۇمار» مۇسىنشەسى مەن 1 ميلليون تەڭگە كولەمىندە اقشا­لاي سىياقى الدى.

ءسويتىپ, تەلەجۇلدىزدار «تۇمار» سىيلىعىن يەلەنىپ, كاسىبي مەرەيىن وسىرگەن مازمۇندى كەش سوڭى ەسترادا انشىلەرىنىڭ تاماشا ونەر كورسەتۋىنە ۇلاسىپ, جەڭىمپازدارعا ەستەلىك كۋبوك تابىس ەتىلدى.

كاسىبي مەرەكەنىڭ شارىقتاۋ شەگى

پرەزيدەنتتىڭ جارلىعىمەن بيىل ەلىمىزدە العاش رەت كاسىبي مەرەكەسىندە جۋرناليستەرگە مەملەكەتتىك ماراپاتتار, جوعارى وردەندەر بەرىلىپ وتىر. ونى اقپارات جانە قوعامدىق دامۋ ءمينيسترى اسقار وماروۆ ارنايى ءوزى كەلىپ تاپسىردى. بۇل جاڭا ءۇردىس اقپارات سالاسى­نىڭ مايتالماندارىنا كورسەتىلگەن ايرىق­شا قۇرمەت دەپ باعالادىق.

بىرقاتار مەملەكەتتىك باق سالاسىن­داعى جۋرناليستەرگە «ەرەن ەڭبەگى ءۇشىن» مەدالى, قازاقستان پرەزيدەنتىنىڭ قۇرمەت گراموتاسى, قازاقستان پرەزيدەنتىنىڭ العىس­حاتى, «شاپاعات» مەدالى تابىستالدى. وسى توپتا Egemen Qazaqstan گازەتى باس رەداكتورىنىڭ ورىنباسارى, قازاق جۋرناليستيكاسىندا ۇزاق جىلدار بويى تالماي ەڭبەك ەتىپ كەلە جاتقان تانىمال جۋرناليست تالعات باتىرحان «قۇرمەت» وردەنىمەن ماراپاتتالدى. سونىمەن قاتار بۇگىندە ءبىر ۇجىمعا بىرىكتىرىلگەن «كازاحستانسكايا پراۆدا» گازەتىنىڭ بەلگىلى ءفوتوتىلشىسى, جەلتوقسان وقيعاسىندا تۇسىرگەن ءبىرشاما تاريحي فوتولار­دىڭ اۆتورى يۋري بەككەر دە «قۇرمەت» وردەنىن وڭىرىنە تاقتى. ءوز يەسىن تاپقان ماراپات قاشاندا قۇندى بولسا كەرەك.