كورمەگە اۆتوردىڭ تەك سيامەن سالعان 23 پەيزاجدىق كەسكىندەمە كارتيناسى قويىلدى. ايتا كەتسەك, بۇل سۋرەتشى 1979 جىلى چۋنگانگ ونەر كورمەسىندە «سانريم» كارتيناسى ءۇشىن باس جۇلدەنى جەڭىپ الىپ, الەمدىك ونەرسۇيەر قاۋىمنىڭ نازارىنا ىلىككەن ەكەن. وسى كەزدەن باستاپ كورەيا رەسپۋبليكاسىنىڭ تانىمال سۋرەتشىسى رەتىندە, الەمدىك كورمەلەرگە شاقىرىلىپ, دۇنيە جۇزىنە كورەي پەيزاجىن ناسيحاتتاۋمەن كەلەدى.
كورمەنىڭ اشىلۋ سالتاناتىنا قاتىسىپ, ءسوز العان كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كۋ حونگ سوك: «بۇل كورمە زاماناۋي كورەي كەسكىندەمەسىندە بەينەلەنگەن مودەرنيزم ستيلىمەن جاقىنىراق تانىسۋعا مۇمكىندىك بەرەدى. اۆتوردىڭ ورىنداۋىنداعى پەيزاجدىق ناتيۋرمورتتار ونىڭ شەبەرلىگىنىڭ دالەلى. بۇل تۋىندىلاردىڭ ەرەكشەلىگى – ءوز حالقىنىڭ ءداستۇرىن, ەلىنىڭ سۇلۋ تابيعاتىن تەك سيا ارقىلى جەتكىزە العاندىعى» دەسە, ءىس-شارا قوناعى ءماجىلىس دەپۋتاتى امانجول ءالتاي: «كورەي جانە قازاق حالقىنىڭ زاماناۋي بەينەلەۋ ونەرى سونىڭ ىشىندە كەسكىندەمە ءستيلى بىتە قايناسىپ جاتىر. وسى ورايدا تاعدىر تاۋقىمەتىنە مويىنسۇنباي, جالعىز قولىمەن سۋرەت سالىپ, الەمگە تانىمال ونەر تۋىندىلارىن جاساپ شىققان اۆتورعا راحمەت ايتامىن», دەدى.
سونداي-اق, كوپشىلىك الدىندا ءسوز العان كورمە اۆتورى پاك دە سونگ ءىس-شارانى ۇيىمداستىرۋشىلارعا العىس ايتۋمەن قاتار, «الداعى ۋاقىتتا قازاق مادەنيەتىمەن جاقىنىراق تانىسۋىما مۇمكىندىك تۋادى دەپ ۇمىتتەنەمىن. وسىنداي مادەني الماسۋلاردىڭ ارقاسىندا قازاقستان مەن كورەيا اراسىنداعى بايلانىس ارتاتىنىنا سەنىمدىمىن», دەدى.
