قىتاي مەملەكەتتىك قىزمەتتە قازاقستانمەن ىنتىماقتاس بولۋعا مۇددەلى

بۇدان بۇرىن قىتايدىڭ مەملەكەتتىك قىزمەتشىلەر وكىلدەرىنىڭ ەلىمىزدە رەسمي ساپارمەن جۇرگەنىن حابارلاعانبىز. ادامي رەسۋرستار جانە الەۋمەتتىك قامسىزداندىرۋ ءمينيسترىنىڭ ورىنباسارى يان شيتسيۋ باستاعان سول دەلەگاتسيا مۇشەلەرى كەشە قر پرەزيدەنتى جانىنداعى مەملەكەتتىك باسقارۋ اكادەمياسىندا بولىپ, قازاقستان مەملەكەتتىك قىزمەتشىلەرىنىڭ «ا» كورپۋسىن قالىپتاستىرۋداعى تاجىريبەسىمەن تانىسۋدى جالعاستىردى. كەزدەسۋ بارىسىندا قىتاي ۆيتسە-ءمينيسترى يان شيتسيۋ ءوز ەلىن­دەگى مەملەكەتتىك قىز­مەت رەفور­ماسىنىڭ نەگىزگى اسپەكتىلەرىنە توقتالىپ ءوتىپ, بۇل سالادا وزدەرىنە قازاقستاننىڭ وزىق تاجىريبەسىنىڭ قاجەت ەكەنىن تىلگە تيەك ەتتى. «قىتاي استاناداعى مەم­لە­كەتتىك قىزمەت سالاسىنداعى ايماق­تىق حابتىڭ قۇرىلۋىنا قول­داۋ ءبىلدىرىپ, اكىمشىلىك مەملە­كەتتىك قىزمەتشىلەردىڭ «ا» باس­قارۋ كورپۋسىن قالىپتاستىرۋ تاجىريبەسىنە قىزىعۋشىلىق تانىتادى», – دەدى ول قر پرەزيدەنتى جانىنداعى مەملەكەتتىك باسقارۋ اكادەمياسىندا ستۋدەنتتەر مەن وقىتۋشىلارعا ارناپ وتكىزگەن ءدارىسى كەزىندە. بۇدان ءارى يان شيتسيۋ مىرزا ءبىزدىڭ ەلىمىزدە قۇرىلعان ايماقتىق حاب تۋرالى ءوز ويلارىن ورتاعا سالدى. «قازاقستاننىڭ  باستاماسىمەن مەملەكەتتىك قىزمەت سالاسىندا ايماقتىق حاب قۇرىلعانىن بىلەمىز. ءبىز ونى تولىق قولدايمىز. ايماقتىق حاب – كوپتەگەن ەلدەردىڭ مەلەكەتتىك قىز­مەت سالاسىندا تاجىريبە مەن ءبىلىم, اقپارات الماسىپ, ىنتى­ماقتاساتىن بىرەگەي الاڭى. وعان قوسا بۇل يدەيانى قازاقستان كوتەرىپ, ورتالىق وسىندا ورنالاستى. قازاقستان – ءبىزدىڭ جاقسى كورشىمىز ءارى ستراتەگيالىق سەرىكتەسىمىز. ياعني ماڭىزدى باعىتتىڭ ماڭىزدى مەحانيزمدەرى كورشى ءارى سەرىكتەس ەلدە جۇزەگە اسىپ وتىر. سوندىقتان,  حابتىڭ جۇمىسىنا, وسى سالاداعى ءىس-شارالارعا جان-جاقتى قولداۋ كورسەتۋىمىزگە تولىق نەگىز بار», – دەگەندى ايتتى ول. ونىڭ ايتۋىنشا, ايماقتىق حابتى دامىتۋدىڭ وراسان الەۋەتى دە زور. «ءبىز مۇنى ءوزىمىز ءۇشىن اسا كەرەكتى تاجىريبە دەپ سانايمىز, – دەدى قىتاي ۆيتسە-ءمينيسترى سوسىن. – قىتايدا اكىمشىلىك مەملەكەتتىك قىزمەتشىلەر جوعارى باسقارۋ, ورتا جانە تومەنگى لاۋازىمدار بولىپ ۇشكە بولىنەدى. بىزدە كادرلاردى قىزمەتكە قويۋدا تاپسىرما بويىنشا تىكەلەي تاعايىنداۋ, كونكۋرس بويىنشا تاڭداۋ جانە سايلاۋ دەپ اتالاتىن ءۇش ءتۇرلى جولمەن جۇرگىزىلەدى. ەندى قازاقستان تاجىريبەسىن دە قولدانۋدىڭ ءمۇم­كىن­دىكتەرى تۋىپ وتىر», – دەپ اتاپ ءوتتى يان شيتسيۋ. مارتەبەلى مەيمان «ا» كورپۋسى تۋرالى دا وتە جاقسى پىكىرلەر ءبىلدىردى. «قازاقستاننىڭ مەملەكەتتىك قىزمەت رەفورماسىنىڭ ەكىنشى كەزەڭىندە «ا» كورپۋسىن قۇرعانىن بىلەمىز. بۇل – ءبىز ءۇشىن پايدالى ءارى جاقسى تاجىريبە. قازاقستاندا مەملەكەتتىك قىزمەتكەرلەردى ساياسي جانە اكىمشىلىك دەپ ءبولۋ الەمنىڭ كوپتەگەن ەلدەرىندەگى تاجىريبەگە ساي. اكىمشىلىك مەملەكەتتىك قىز­مەت­كەرلەر «ا» جانە «ب» كورپۋس­تارىنا توپتاستىرىلىپ وتىر. مۇنىڭ كادر تاڭداۋ مەن تاربيە­لەۋ­دەگى ارتىقشىلىقتارى مەن ءتا­لىمدى جاقتارى وتە كوپ», – دەگەن قو­رىتىندى جاسادى قىتاي ۆيتسە-ءمينيسترى. كەزدەسۋ سوڭىندا يان شيتسيۋ مىرزا جينالعانداردىڭ سۇراق­تارىنا جاۋاپ بەردى. سەرىك ءپىرنازار, «ەگەمەن قازاقستان».