جيىندا كوميسسيا توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا كوميسسيا جۇمىسىنىڭ نەگىزگى باسىمدىعى – ادامگەرشىلىك-وتباسىلىق قۇندىلىقتاردى نىعايتۋ, بالالاردىڭ قۇقىقتارى مەن زاڭدى مۇددەلەرىن قورعاۋ, ايەلدەردىڭ قۇقىقتارى مەن مۇمكىندىكتەرىن كەڭەيتۋ جونىندەگى مىندەتتەر ەكەنىن اتاپ ءوتتى. «كوميسسيا مەملەكەتتىك وتباسى, دەموگرافيالىق جانە گەندەرلىك ساياسات سالاسىنداعى وزەكتى مىندەتتەردى ايشىقتاۋعا باعىتتالعان باستامالار توپتاماسىن قاراستىرادى. ولاردىڭ قاتارىندا, انا مەن بالا ءولىمىن ازايتۋ, جاسوسپىرىمدەر اراسىنداعى الىمجەتتىك پەن ءسۋيتسيدتىڭ الدىن الۋ, جىنىستىق زورلىق كورسەتۋ قىلمىستارىنان قورعاۋ, گەندەرلىك ءبىلىم ورتالىعىن قۇرۋ جانە تاعى دا باسقا ماسەلەلەر بار», دەدى ا.بالاەۆا. سونىمەن قاتار پروبلەمالىق ماسەلەلەردى شەشۋ ءۇشىن ۇلتتىق كوميسسيا الاڭىندا مەملەكەتتىك ورگانداردى جەدەل تىڭداۋ كەستەسى بار. وندا كوميسسيانىڭ ساراپتامالىق-تالداۋ جۇمىسىن جۇرگىزۋ قۇرالدارى مەن تەتىكتەرىنىڭ كەڭ اۋقىمى قاراستىرىلعان. اتاپ ايتقاندا, ءتۇرلى بەيىمدەۋ جانە الەۋمەتتىك قولداۋ ورتالىقتارىن ادىستەمەلىك سۇيەمەلدەۋ قامتاماسىز ەتىلەدى, ومىرلىك قيىن جاعدايعا تاپ بولعان بالالار مەن انالارعا قاجەتتى كومەك كورسەتۋ مۇمكىندىگىن قامتاماسىز ەتەتىن وتباسىلاردىڭ الەۋمەتتىك كارتاسى جاسالادى.
وتىرىستا بالالار مەن جاسوسپىرىمدەرگە رۋحاني-ادامگەرشىلىك تاربيە بەرۋ ماسەلەسى دە قارالدى. كامەلەتكە تولماعاندار اراسىنداعى تۇرمىستىق زورلىق-زومبىلىق پەن قىلمىستىڭ الدىن الۋعا, بالالارعا قاتىستى قۇقىق قورعاۋ قۇرالدارىن دامىتۋعا باعىتتالعان پروفيلاكتيكالىق شارالار كەشەنى ۇسىنىلدى. سونىمەن قاتار كوميسسيا مۇشەلەرى اتا-انالار ءۇشىن ءوز بالالارىن تاربيەلەۋمەن كوبىرەك اينالىسۋعا مۇمكىندىكتەر جاساۋعا ىقپال ەتەتىن قۇقىقتىق ورتانى دامىتۋ بويىنشا بىرقاتار ءىس-شارا ۇسىندى.
اقپارات جانە قوعامدىق دامۋ ۆيتسە-ءمينيسترى ا.دانيلوۆ ورتالىق جانە جەرگىلىكتى دەڭگەيلەردەگى مەملەكەتتىك باسقارۋ جۇيەسىندە ايەل باسشىلاردىڭ الەۋەتىن ارتتىرۋ بويىنشا جوبا ازىرلەپ, ىسكە اسىرۋدى ۇسىندى. «جوبانى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ەگيداسى اياسىندا بۇۇ-نىڭ ايەلدەر قۇرىلىمىمەن بىرلەسىپ ىسكە اسىرۋ جوسپارلانىپ وتىر. جوباعا ءتۇرلى ساراپشىلار توبى مەن باسقا دا حالىقارالىق ۇيىمداردى تارتۋ كوزدەلۋدە. جوبا اياسىندا ەلدىڭ بارلىق ايماعىنداعى ايەلدەر مەن قىزدارعا ارنالعان وقىتۋ ءىس-شارالارى وتكىزىلەدى (سەمينارلار, ترەنينگتەر, شەبەرلىك ساباقتارى كوۋچ سەسسيالار). جوبا بيىل شىلدە ايىندا باستالادى. اتالعان جوبا ەلدىڭ ساياسي جانە قوعامدىق ومىرىندەگى ايەلدەردىڭ ءرولىن كۇشەيتۋگە سەپتىگىن تيگىزەدى», دەدى ول.
سونىمەن قاتار ۇلتتىق كوميسسيا مۇشەلەرى – اباي وبلىسى, «سەمەي تاڭى» گازەتىنىڭ باس رەداكتورى ريزا مولداشەۆا مەن «تالبەسىك» كوپبالالى انالار وداعى» قب باسشىسى ءلاززات قوجاحمەتوۆا وتباسى, مەكتەپ جانە قوعام اراسىنداعى بايلانىستى نىعايتۋ تەتىكتەرىن كەڭەيتۋ جونىندە ۇسىنىستارىن ايتىپ, وتباسىلىق قۇندىلىقتاردى نىعايتۋ, بالا تاربيەسىندەگى اكە ينستيتۋتى ماسەلەلەرىنە, پروبلەمالىق ماسەلەلەردى شەشۋ مونيتورينگىنە جانە وسى باعىتتاعى كوميسسيا قىزمەتىنىڭ پەرسپەكتيۆالارىن ءسوز ەتتى.
وتىرىستى قورىتىندىلاعان كوميسسيا توراعاسى, پرەزيدەنت اكىمشىلىگى باسشىسىنىڭ ورىنباسارى ايدا بالاەۆا: «بۇگىن ءبىز ازاماتتىق قوعامنىڭ بارلىق ينستيتۋتىن تارتا وتىرىپ, پرەزيدەنتتىڭ گەندەرلىك ساياسات سالاسى مەن بارلىعىنا تەڭ مۇمكىندىك بەرۋگە ارنالعان رەفورماسىن ءارى قاراي ىسكە اسىرۋعا قاجەتتى كەشەندى قادامدار قامتىلعان جوسپاردى بەكىتتىك. كوميسسيا جوسپاردا كورسەتىلگەن بارلىق باعىت بويىنشا قوعاممەن بارىنشا اشىق جانە جان-جاقتى بايلانىس ورناتىپ, الداعى ورتاق جۇمىسىمىزدا الدىن الۋ شارالارىنا ۇلكەن ءمان بەرۋ كەرەك», دەپ مەملەكەتتىك ورگاندارعا بىرقاتار تاپسىرما بەردى.
