ەلوردادا ەلەكتر پويىزدارى قاتىنايدى

قازاقستان ۇكىمەتى مەن ازيا دامۋ بانكى استانادا ەلەكتر پويىزدارى جۇيەسىن قۇرۋ جوباسىن قارجىلاندىرۋعا ۋاعدالاستى. بۇل جوبا استانالىقتاردىڭ ءومىر ساپاسىن ارتتىرۋعا جانە قالاىشىلىك قوزعالىستى جىلدامداتۋعا مۇمكىندىك بەرەدى. قازىردىڭ وزىندە ەلوردامىزدا Smart Astana(«اقىلدى قالا») جوباسى ىسكە اسىرىلا باستادى. بۇل زاماناۋي تەحنولوگيا بويىنشا جۇزەگە اساتىن جوبانىڭ العاشقى كەزەڭىندە ەكى باعىت – «قاۋىپسىز قالا» جانە «ينتەللەكتۋالدىق كولىك جۇيەسى» جوباسى قولعا الىنادى. ال, 2017 جىلعا دەيىن «اقىلدى قالا» جۇيەسى تولىعىمەن ىسكە اسىرىلادى. Smart Astana جوباسى ەۋرو­پالىق «اقىلدى قالالاردىڭ» ۇلگىسى بويىنشا ازىرلەندى. جوبا ناتيجەسىندە قالادا ءومىر ساپاسى ارتىپ, ينفراقۇرىلىم جاقسارادى, قوعامدىق قاۋىپسىزدىك وڭ شەشىمىن تابادى. ايتالىق, «ينتەللەكتۋالدىق كولىك جۇيەسى» اياسىندا «اقىلدى باعدارشامدار» پايدا بولادى. بۇل جۇيە جولداردا كولىك كەپتەلىسىن بولدىرمايدى. 2014 جىلدىڭ وزىندە وسىنداي 42 باعدارشام سارىارقا, تۇران, قوناەۆ, دوستىق, سارايشىق, سىعاناق كوشەلەرىندە ورنالاستىرىلادى. جوبا بويىنشا اسىرەسە, قوعامدىق كولىك قۇرىلىمىن دا­مىتۋعا ايرىقشا نازار اۋدارىلادى. قالادا جەڭىل رەلستىك كولىك جۇيەسى قۇرىلىسى باستالىپ, ارنايى ۇلكەن اۆتوبۋستار ىسكە قو­سىلادى. ولار بەينەباقىلاۋ, جۇرگىزۋشىنى قاداعالاۋ باسقا دا ساقتىق قۇرىلعىلارىمەن قامتا­ماسىز ەتىلگەن. كوشەلەردەگى جول قوزعالىسى سۋرەت-بەينە تاركىلەۋ جۇيەلەرىمەن جاساقتالىپ, قوزعالىس ەرەجەسىن ساقتاۋ اۆتوماتتى تۇردە باقىلاناتىن بولادى. بارلىق اقپاراتتار ناقتى ۋاقىت رەجىمىندە ارنايى جەدەل باسقارۋ ورتالىعىنا تۇسەدى. كوشەلەردە ورتالىق وپەراتورلارىمەن شۇعىل بايلانىس جانە انىقتامالىق اقپاراتتار الۋ تەرمينالدارى ورناتىلادى. جەدەل باسقارۋ ورتالىعىنىڭ قۇرىلىسىن 2014 جىلى سالۋ جوسپارلانعان. عيمارات الاڭى 5300 شارشى مەتردى قۇرايدى, توبەسىنە عيماراتتى جارىقتاندىراتىن جالپى الاڭى 600 «شارشىلىق» كۇن ساۋلەسىنەن ءنار الاتىن قۇرىلعى قويىلادى. ورتالىققا دەرەكتەردى تابىستاۋ جەلىسى ارقىلى ونلاين رەجىمىندە قوعامدىق قاۋىپسىزدىك, كوممۋنيكاتسيالار, قالالىق قىزمەت كورسەتۋ, كولىكتىك كەپتەلىستەر, كاسىپ­ورىندار جۇمىسى تۋرالى اقپاراتتار ءتۇسىپ تۇرادى. وندا 200-گە جۋىق ادام جۇمىسقا تارتىلماق, ولاردىڭ قاتارىندا مۇمكىندىگى شەكتەۋلى جاندارعا باسىمدىق بەرىلەدى. ەلەكتر پويىزدارى جۇيەسى – استانا اۋەجايىنان قالا ورتالىعىنا دەيىنگى 14 شاقىرىمدىق ارالىق; قالا ورتالىعىنان استانانىڭ سولتۇستىك بولىگىنە جانە ورتالىق تەمىرجول ۆوكزالىنا دەيىنگى 8 دەن 10 شاقىرىمعا دەيىنگى قاشىقتىق; جولدى ورتالىقتا تۇيىستىرەتىن 18 شاقىرىمدىق ارالىق باعىتتارىن قامتيدى. نەگىزىنەن ەلەكتر پويىزدارى جەلىسى قالاىشىلىك قوزعالىستى جىلدامداتۋعا جول اشاتىن زا­ماناۋ­ي ترامۆايلاردان تۇرادى. ازيا دامۋ بانكى قازاقستان ۇكىمەتىنىڭ شاقىرۋى بويىنشا جوبانىڭ دايىندىعىن قامتا­ماسىز ەتۋ جانە كەشەندى تەكسەرۋ جۇ­مىس­تارىن جۇرگىزۋ ءۇشىن تەحنيكالىق كومەك كورسەتەتىن بولادى. سونىمەن بىرگە, جوبانى جۇزەگە اسىرۋ ءۇشىن ازيا دامۋ بانكى قاجەتتى قاراجات ءبولدى. حالىقارالىق كەڭەسشىلەر اتالعان جۇيەنىڭ قۇرىلىسى كەزىندە قانداي دا ءبىر قاتەلىككە جول بەرمەۋ­گە قولعابىس ەتەدى, ال, بانكتىڭ ۇزاق مەرزىمگە بەرلىگەن قارجىسى جوبانى قىسقا ۋاقىت ىشىندە, ناقتىراق ايتساق, 2017-ءشى جىلعا دەيىن تو­لىق­تاي جۇزەگە اسىرۋعا مۇمكىندىك بەرەدى. «ەگەمەن-اقپارات».