ۇلتتىق سپورت پەن بۇقارالىق ماڭىزى بار سپورت تۇرلەرىن دامىتۋدى كوزدەيتىن ءدۇبىرلى جارىستىڭ اشىلۋ ءراسىمى توبىل جاعالاۋىندا تاۋەلسىزدىكتىڭ 25 جىلدىعى ساياباعىندا ورنالاسقان امفيتەاتردا ءوتتى.
سالتاناتتى ءىس-شاراعا ارنايى كەلىپ قاتىسقان دەنە شىنىقتىرۋ جانە سپورت كوميتەتىنىڭ توراعاسى سامات ەراليەۆ بيىل جەتىنشى رەت ءوتىپ جاتقان بايراقتى باسەكەگە قاتىسۋشىلاردى اتاۋلى سپورت مەرەكەسىمەن قۇتتىقتاپ, جارىستا ساتتىلىك تىلەدى.
– ءتورت جىلدا ءبىر اينالىپ كەلەتىن حالىق سپورتى ويىندارى وڭىرلەردە جىل باسىنان بەرى ءجۇرىپ جاتىر. بۇل جارىستاردا ءار ايماقتىڭ ۇزدىك سپورتشىلارى انىقتالدى. ەندى, مىنە, سول سىننان سۇرىنبەي وتكەن ساڭلاقتار فينالدىق باسەكەگە جينالىپ وتىر. حالىق سپورتى ويىندارى وليمپيادا سەكىلدى جوعارى دەڭگەيدەگى ءدۇبىرلى دودا دەپ ويلايمىن. مەملەكەت باسشىسى قاسىم-جومارت توقاەۆ ءار جولداۋىندا بۇقارا مەن جاسوسپىرىمدەر سپورتىنا وتە زور ءمان بەرىپ وتىرادى. ولاي بولسا, بۇل باسەكە سپورتتاعى بيىك بەلەستەرگە باستايتىن باسپالداق بولعاي. بىزگە وسىنداي مەرەكەنى ۇيىمداستىرىپ بەرگەن قوستاناي وبلىسىنىڭ اكىمدىگىنە جانە وبلىستىق دەنە شىنىقتىرۋ جانە سپورت باسقارماسىنا العىس ايتامىن, – دەدى كوميتەت توراعاسى.
ۇيىمداستىرۋشىلاردىڭ مالىمەتىنشە, حالىق سپورتى ويىندارىنا ءار ايماقتان 100 شاقتى سپورتشى كەلگەن. رەسمي قۇتتىقتاۋلاردان كەيىن ءوڭىر ونەرپازدارى سپورتشىلاردىڭ قۇرمەتىنە ءان مەن كۇيدەن, جىر مەن بيدەن شاشۋ شاشتى.
سالتاناتتى ءىس-شارا بارىسىندا سامات ەراليەۆ فرانتسيانىڭ نورمانديا پروۆينتسياسىندا وتكەن ءحىح الەمدىك گيمنازيادا ەل قورجىنىنا ولجا سالعان قوستانايلىق ءۇش سپورتشىعا, اتاپ ايتقاندا, باتتەرفليايدان چەمپيون بولىپ ورالعان دميتري ەنەسكە, رەگبيدەن قولا جۇلدەگەرلەر ۆيكتوريا كۋزنەتسوۆا مەن مارينا دەنيسوۆالارعا مادەنيەت جانە سپورت مينيسترلىگىنىڭ ماراپاتىن تابىس ەتتى.
قوستاناي وبلىسى
