تەاتردىڭ گاسترولدىك رەپەرتۋارىندا ەرەسەك كورەرمەندەرمەن قاتار, بالالارعا ارنالعان قويىلىمدار دا بار. كەنشىلەر قالاسىنداعى كىشكەنتاي كورەرمەندەرگە ارنالعان «مۋزىكا الەمى» اتتى ينتەراكتيۆتى كەش بارىسىندا تەاتر مۋزىكانتتارى سكريپكا مەن ۇرمەلى اسپاپتاردا ويناۋدان شەبەرلىك سىنىپتارىن وتكىزىپ, سوپرانو مەن باس ارالىعىنداعى داۋىس ەرەكشەلىكتەرىن ءتۇسىندىردى.
جالپى, كورەرمەنگە ارنالعان «جىبەك ساتى» وپەرالىق دراماتۋرگياسى يتاليا تىلىندە قويىلعانىنا قاراماستان, كوپشىلىك شىعارماعا تەرەڭ بويلاپ, وپەرا كەيىپكەرلەرىمەن بىرگە قايعىرىپ, بىرگە قۋانىپ وتىردى. تەاتر رەپەرتۋارىنا 2019 جىلى قوسىلعان دج.ءروسسينيدىڭ بۇل تۋىندىسى ونەر سىنشىلارى تاراپىنان دا جوعارى باعالانىپتى. وپەرالىق شىعارماداعى باس پارتيانى تەاتردىڭ جەتەكشى ءسوليسى, قازاقستاننىڭ ەڭبەك سىڭىرگەن ءارتىسى جانات باقتاي ورىندادى.
– رۋدنىي كورەرمەندەرىنىڭ الدىنا العاش شىعىپ وتىرمىز. «جىبەك ساتى» وپەراسى كامەرالىق زالعا ارنالعان. ياعني قويىلىمعا شاعىن ساحنا قاجەت. تۋىندى شاعىن, گاسترولدەرگە ىڭعايلى بولعانىمەن, مازمۇنى باي. ءارى كورەرمەن دە ونى جىلى قابىلداپ, كوپكە دەيىن ەسىندە ساقتايدى. بىزگە وسىنداي ءتۇرلى ساحنالاردا ونەر كورسەتىپ, كورەرمەننىڭ كوڭىلىنەن شىعۋدىڭ ءوزى ءبىر عانيبەت, – دەيدى جانات باقتاي.
اتالعان سپەكتاكلدەگى وزگە پارتيالاردى وپەرا مايتالماندارى مەن حالىقارالىق Astana Opera اكادەمياسىندا ءتالىم الىپ جۇرگەن تالانتتى جاستار شىرقادى. ماسەلەن, ءدورۆيلدتى ارتۋر گابديەۆ, دورمونتتى رامزات بالاكشيەۆ ورىنداسا, دجەرمانو بەينەسىن التىنبەك ءابىلدا سومداپ شىقتى. بلانزاك پەن ليۋچيللا پارتيالارىن وپەرا تەاترىنىڭ سوليستەرى ەۆگەني چاينيكوۆ پەن تاتيانا ۆيتسينسكايالار شىرقادى. سپەكتاكلدى قازاقستاننىڭ ەڭبەك سىڭىرگەن قايراتكەرى Astana Opera تەاترىنىڭ ابزال مۇحيتدين جەتەكشىلىك ەتەتىن كامەرالىق وركەسترى سۇيەمەلدەدى.
تەاتردىڭ گاسترولدىك ساپارى وسى ايدىڭ سوڭىندا اقتوبە قالاسىندا تۇيىندەلەدى.
قوستاناي وبلىسى
