«سيمپوزيۋمنىڭ ماقساتى – حالىقارالىق دارەجەدەگى سۋرەتشىلەرمەن تىعىز بايلانىس ورناتىپ, ەلىمىزدىڭ مادەني قورىن كەڭەيتۋ, قازاق ەلىنىڭ مادەنيەتى مەن ونەرىن, الەۋمەتتىك-ەكونوميكالىق دامۋىن, رۋحاني بايۋىن سۋرەتشىلەردىڭ قىلقالامى ارقىلى جەتكىزۋ. حالىقارالىق سۋرەتشىلەر اراسىندا دوستىق, مادەني-شىعارماشىلىق بايلانىستى دامىتۋ جانە نىعايتۋ» دەيدى وسى ءىس-شارانى ۇيىمداستىرۋشى, جوبا اۆتورى كاميلا جاپالوۆا. ايتا كەتەيىك, كاميلا ابەنقىزىنىڭ ءوزى دە قازاقستان سۋرەتشىلەر وداعىنىڭ مۇشەسى, قازاقستان رەسپۋبليكاسىنىڭ مادەنيەت قايراتكەرى, حالىقارالىق زاماناۋي ونەر اكادەمياسىنىڭ مۇشەسى, BatikKami مادەني قورىنىڭ ديرەكتورى.
حالىقارالىق سۋرەتشىلەردىڭ باسىن قوسىپ, تاجىريبە الماسۋىنا مۇمكىندىك بەرەتىن بۇل جوبا ەلىمىزدە 2018 جىلدان بەرى وتەدى. بيىل مادەنيەت جانە سپورت مينيسترلىگىنىڭ قولداۋىمەن سيمپوزيۋمعا ازەربايجان, وزبەكستان, تۇرىكمەنستان, قىرعىزستان, تاجىكستان ەلدەرىنەن جاس ونەرپازدار قاتىستى. ولاردىڭ ىشىندە تۇركيانىڭ انكارا قالاسىندا تۇراتىن زاميرا شاحين, ازەربايجاننان رامينا سااداتحان, وزبەكستاننان ساردور اللابەرگەنوۆتەر, سونداي-اق قازاقستاندىق جەڭىس مولدابەكوۆ, سەمبىعالي سماعۇلوۆ, داۋرەنبەك بەكنازاروۆ, باقىتنۇر بەردىسبەكوۆ, اينابەك وسپانوۆ, نۇربەك جاردەموۆ سەكىلدى قىلقالام شەبەرلەرى بار. جوبا اياسىندا پلەنەر, كونفەرەنتسيا, كورمە جانە شەبەرلىك ساعاتتارى وتكىزىلدى.
15 ماۋسىم كۇنى سيمپوزيۋمنىڭ اشىلۋ سالتاناتىندا كاميلا ابەنقىزى بەينەلەۋ ونەرىنىڭ بۇگىنى مەن ەرتەڭى تاقىرىبىندا بايانداما جاسادى.
– سۇلۋلىق – ايەل زاتىنا عانا ءتان دۇنيە ەمەس. سۇلۋلىق – ءبىزدى قورشاعان ورتا ءھام جان دۇنيەمىز. سوندىقتان دا ءبىز سيمپوزيۋم اتاۋىن «سۇلۋلىق الەمدى قۇتقارادى» دەپ قويدىق. مۇنداي ءىس-شارالار ەل وركەنيەتىنىڭ دامۋىنا سەپتىگىن تيگىزەدى. ورالداي ادەمى قالادا سۋرەتشىلەر ەركىن جۇمىس ىستەپ, جاقسى ناتيجە كورسەتەدى دەگەن ويدامىن. جاستار شەبەرلىك ساعاتتارىنا قاتىسىپ, تاجىريبەلى سۋرەتشىلەردەن ءدارىس الاتىن بولادى, – دەدى كاميلا جاپالوۆا.
جيىندا قازاقستاننىڭ ەڭبەك سىڭىرگەن قايراتكەرى, حالىقارالىق «ونەر كاۆالەرى» وردەنىنىڭ, «الەمدىك بەيبىتشىلىك سۋرەتشىسى» قۇرمەتتى اتاعىنىڭ يەگەرى سەمبىعالي سماعۇلوۆ, قازاقستاننىڭ ەڭبەك سىڭىرگەن قايراتكەرى, قازاقستان رەسپۋبليكاسى كوركەمونەر اكادەمياسىنىڭ اكادەميگى, حالىقارالىق تۇران سىيلىعىنىڭ لاۋرەاتى, سۋرەتشىلەر وداعىنىڭ مۇشەسى اينابەك وسپانوۆ, ازەربايجان سۋرەتشىلەر وداعىنىڭ مۇشەسى, فوتوگراف رامينا سااداتحان جانە باسقالارى ءسوز سويلەپ, ءوز ويلارىن ورتاعا سالدى.
– قازاقستانعا العاش كەلۋىم. ورال – وتە تازا قالا ەكەن. ماعان جاقسى اسەر ەتىپ جاتىر. ءوزىم باكۋ قالاسىندا تۇرامىن, سۋرەتشىمىن. كوبىنەسە سۇڭعات جانرىندا جۇمىستانامىن. نەوەكسپرەسسيونيزم باعىتىنداعى كارتينالارىم كوپشىلىككە ۇنايتىن سياقتى. اڭىز-اڭگىمەلەر, ادامنىڭ ءوز-ءوزىن تانۋى – مەنىڭ نەگىزگى تاقىرىبىم. نەوەكسپرەسسيونيزم – 1970 جىلداردىڭ سوڭىندا پايدا بولعان مودەرنيستىك نەمەسە پوستمودەرنيستىك كەسكىندەمە مەن ءمۇسىن ءستيلى. شاگال, ماتيسس, پيكاسسو شىعارماشىلىعى جانىما جاقىن. وسىنداي سيمپوزيۋمدار تاجىريبە الماسۋ ءۇشىن كەرەك. بۇل باستاما بولاشاقتا دا جالعاسىن تابادى دەگەن ويدامىن. الداعى ۋاقىتتا قازاقستاندىقتاردى قاراباقتا وتەتىن شاراعا شاقىرامىز, – دەيدى سۋرەتشى رامينا سااداتحان.
سيمپوزيۋمنىڭ ءار كۇنى قىزىققا تولى بولدى. 16-18 ماۋسىم كۇندەرى مەيماندار ورالداعى مۇراجايلار مەن مادەنيەت وشاقتارىن ارالادى. اشىق اسپان استىندا شەبەرلىك ساباعىن وتكىزدى. ماحامبەت اتىنداعى باتىس قازاقستان ۋنيۆەرسيتەتى «ديزاين جانە بەينەلەۋ ونەرى» ماماندىعىندا وقيتىن ستۋدەنتتەرمەن كەزدەسىپ, ەركىن تاقىرىپتا بىرگە سۋرەت سالدى. قازاقستان سۋرەتشىلەر وداعىنىڭ مۇشەلەرى باقىتنۇر بەردىسبەكوۆ «پورترەت», الماس نۇرعوجاەۆ «ورال قالاسىنىڭ تابيعاتى مەن تاريحى» تاقىرىپتارىندا شەبەرلىك ساعاتتارىن وتكىزدى.
19 ماۋسىم كۇنى «سۇلۋلىق الەمدى قۇتقارادى» كورمەسى اشىلدى. وعان قازاقستان رەسپۋبليكاسى مادەنيەت جانە سپورت ۆيتسە-ءمينيسترى نۇرعيسا داۋەشوۆ قاتىسىپ, قاتىسۋشىلارعا مينيستر داۋرەن اباەۆتىڭ العىسىن جەتكىزدى.
– ەۋروپا مەن ازيانى جالعاپ جاتقان اقجايىق وڭىرىندە كەرەمەت ءىس-شارا ءوتتى. سۋرەتشىلەر بەس كۇن بويى ورالدا سۋرەت سالدى, ءوز تاجىريبەسىمەن ءبولىستى. جالپى, ەلىمىزدىڭ تاريحى مەن مادەنيەتىن بەدەرلەپ, ماڭگىلىككە قالدىرۋدا سۋرەت ونەرىنىڭ ماڭىزى زور. قازاقستان رەسپۋبليكاسى مادەنيەت جانە سپورت ءمينيسترى وڭىرلەردە ءتۇرلى ءىس-شارا وتكىزۋدى قولعا الدى. الماتىدا, تۇركىستان جانە باسقا دا قالالاردا اۋقىمدى ءىس-شارالار وتۋدە. ورالدا وتكەن سيمپوزيۋمنان جاستار كوپ نارسە ۇيرەندى, ءبىلدى دەپ ويلايمىن, – دەدى نۇرعيسا مۇرات ۇلى.
باتىس قازاقستان وبلىسى
