بۇل ءىس-شاراعا ەلىمىزدىڭ بارلىق وڭىرلەرىندەگى اسكەري-پاتريوتتىق كلۋبتاردىڭ, قارۋلى كۇشتەردىڭ, باسقا دا اسكەرلەر مەن اسكەري قۇرالىمداردىڭ, اسكەري كوللەدجدەردىڭ, مەكتەپ-ينتەرناتتاردىڭ جانە «جاس ۇلان» رەسپۋبليكالىق مەكتەپتەرىنىڭ وكىلدەرى ءبىر جىل بويى دايىندالدى.
جاس پاتريوتتاردى پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد, «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى ورتالىق كەڭەسىنىڭ توراعاسى ارميا گەنەرالى مۇحتار التىنباەۆ قۇتتىقتادى. سونداي-اق, جاس پاتريوتتارعا قولداۋ كورسەتۋگە قارۋلى كۇشتەردىڭ ارداگەرلەرى, بۇۇ بىتىمگەرلىك ميسسيالارىنا, جاۋىنگەرلىك ءىس-قيمىلدار مەن جەرگىلىكتى قاقتىعىستارعا قاتىسۋشىلار, مەملەكەتتىك ورگانداردىڭ, جۇرتشىلىق پەن باق وكىلدەرى دە كەلدى.
بۇعان دەيىن وتكەن جەتى جيىننىڭ جەڭىمپازدارى مەن «جاس سارباز» مامانداندىرىلعان سىنىپتارىنىڭ تۇلەكتەرى قوناق رەتىندە شاقىرىلدى. بۇگىندە ولاردىڭ دەنى وفيتسەر, جوعارى اسكەري وقۋ ورىندارىنىڭ كۋرسانتى, اسكەري قىزمەتشى, «جاس ۇلان» رەسپۋبليكالىق مەكتەپتەرىنىڭ تاربيەلەنۋشىسى ەكەنىن اتاپ وتكەن ءجون.
«ەلدىڭ دامۋى مەن گۇلدەنۋى, ونىڭ كەلەشەگى جاس ۇرپاققا تىكەلەي بايلانىستى. مەملەكەت باسشىسى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆ «جاستار دامۋدىڭ سيمۆولى جانە جارقىن بولاشاققا دەگەن ءۇمىتتىڭ كورىنىسى» دەپ بەكەر ايتقان جوق», دەدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ.
قورعانىس ۆەدومستۆوسىنىڭ باسشىسى ءاربىر جاس ادامنىڭ اسكەري ماماندىقتى تاڭداعانىنا نەمەسە تاڭداماعانىنا قاراماستان, وتاندى قورعاۋ دەيتىن قاسيەتتى ميسسياعا دايىن بولۋ كەرەك ەكەنىن اتاپ ءوتتى.
جيىندا اسكەري وركەستردىڭ مۋزىكالىق كومپوزيتسيالارى شىرقالىپ, ۆوكالدىق جانە بي نومىرلەرى ورىندالدى. وركەسترلەردىڭ سينحروندى دەفيلەسىندە بارابانشىلار ونەر كورسەتتى. دەسانتتىق-شابۋىلداۋ روتاسىنىڭ كورسەتىلىمى مەن ارنايى كۇشتەر توبىنىڭ قاتىسۋىمەن وتكەن تاكتيكالىق جاۋىنگەرلىك ەپيزود كورەرمەندەرگە ەرەكشە اسەر بەردى.
جيىنعا قاتىسۋشى 600 وقۋشى ءۇشىن وقۋ ورتالىعىنىڭ اۋماعىندا جاقسى تۇرمىستىق جاعداي جاسالعان. جاتىن ورىن شاتىرلارى, تۇرمىستىق بولمەلەرى مەن اس ءۇيى بار دالالىق لاگەر قۇرىلعان. سونداي-اق مۇراجاي ەكسپوزيتسيالارى, «ايبىن – پاتريوتتار مەكەنى» اللەياسى, قارۋ-جاراق پەن اسكەري تەحنيكا جانە كيىم ۇلگىلەرىنىڭ كورمەسى ۇيىمداستىرىلعان.
جيىن باعدارلاماسىندا 11 كونكۋرس پەن اسكەري-قولدانبالى جانە اسكەري-سپورتتىق جارىستار بار. الەمدەگى ەپيدەميولوگيالىق جاعدايعا بايلانىستى جارىستار ەكى جىل بويى ونلاين-فورماتتا وتكىزىلگەنى بەلگىلى. ال بيىلعى جيىندا قاتىسۋشىلار ساندىق كەڭىستىكتە دە, تاكتيكالىق الاڭدا دا باق سىنايتىن بولادى.
ايانا توعانبەك
