سازدى اۋىلى اۋدان ورتالىعىنان 90 شاقىرىم شالعاي ورنالاسقان. الايدا تۇرعىندار قۇمدى ءوز كۇشىمەن كۇرەپ, تەحنيكانىڭ اقىسىن دا تولەپ وتىر. زەينەتكەر باليان ءابۋوۆا ونسىز دا جاڭا قوراسىن سالعانى ءۇشىن ەكى جىلقىمدى بەردىم دەيدى. ەندى, قۇمدى كۇرەۋ ءۇشىن اقشا تولەپ وتىرۋ كەرەك.
«قۇمدى زورعا كۇرەتىپ, تاس ءۇي سالىپ الدىق ەندى. بىراق بەرگى جاعىن قايتا-قايتا قۇم باسىپ جاتىر, ونى اقشاعا كۇرەتىپ وتىرمىز. ءبىر كۇرەتۋىمىزدىڭ ءوزى 500-600 مىڭعا شىعادى. ءبىز ونداي كوپ اقشا تابا المايمىز», دەيدى ب.ءابۋوۆا.
سازدىدان بولەك ساۋىسقان جانە جارما اۋىلدارى دا قۇمنىڭ استىندا قالدى. تۇرعىندار قۇم كوشكىنىنىڭ نەگىزگى سەبەبىن جەراستى سۋىنىڭ يگەرىلۋىمەن بايلانىستىرىپ وتىر.
سوڭعى جىلدارى قۇم كوشكىنى ۇدەپ كەتكەن. اقتوبە اۋىلدىق وكرۋگىنىڭ اكىمى سۇيىندىك ەڭسەپوۆ جەراستى سۋلارانىڭ جاقىن ەكەنىن راستادى. سونىڭ ارقاسىندا ءشوپ جاقسى وسەدى. بەس جىل بۇرىن ءۇش اۋىلداعى قۇم كوشكىنىن توقتاتۋ ءۇشىن ارنايى جوبا ازىرلەنگەن بولاتىن. ونىڭ قۇنى - 422 ملن تەڭگە.
ونىڭ اياسىندا قۇم قورشالىپ, سەكسەۋىل مەن جۇزگەن ەگىلۋى ءتيىس ەدى. الايدا قارجى بولىنبەي قالدى. قازىر قارجى بار بىراق, مەردىگەر جوق. سەبەبى, نارىقتاعى باعا شارىقتاپ كەتكەن.
وبلىستىق تابيعي رەسۋرستار جانە تابيعات قورعاۋ باسقارماسىنىڭ ءبولىم باسشىسى ەربول دەنوۆتىڭ ايتۋىنشا, 2022 جىلعا وبلىستىق بيۋدجەتتەن اقشا ءبولىندى.
«1,2,3-ءشى جىلعا 256 ملن تەڭگە قاراستىرىلعان. سول بويىنشا ءبىز جىل باسىنان بەرى 4 رەت كونكۋرس جاريالاعان بولاتىنبىز. وكىنىشكە قاراي, ەشكىم كونكۋرسقا قاتىسپادى, وتپەدى دەپ تانىلدى», دەپ اتاپ كورسەتتى ە. دەنوۆ.
ماماندار الدا تاعى دا كونكۋرس جاريالاۋدى جوسپارلاپ وتىر. ودان ناتيجە بولماسا, جوباعا تۇزەتۋ ەنگىزىلمەك. قۇم كوشكىنىن توقتاتۋ جۇمىستارى جىلدىڭ اياعىنا دەيىن باستالادى دەگەن جوسپار بار.
