قازاقستان چەمپيوناتىنىڭ التى دۇركىن جەڭىمپازى «استانا» بۇل تۋردا پاۆلوداردىڭ «اقسۋ» كومانداسىن قابىلداپ, 5:0 ەسەبىمەن بىرىنشىلىك دەبيۋتانتىنىڭ تاس-تالقانىن شىعاردى. ماڭىزدى ءۇش ۇپايىنا قول جەتكىزگەن ەلوردا كلۋبى 24 ۇپايمەن تۋرنير كەستەسىندە قايتا توپ باسىنا شىقتى. ال بۇعان دەيىن ۇزدىكتەر كوشىن باستاپ تۇرعان اقتاۋدىڭ «كاسپيى» سىرت الاڭدا قوستانايدىڭ «توبىلىنان» جەڭىلىپ (1:0), ەكىنشى ورىنعا سىرعىدى. ءوز جانكۇيەرلەرىنىڭ الدىندا جەڭىسكە جەتكەن «توبىل» 21 ۇپايمەن ءتورتىنشى ورىنعا كوتەرىلدى.
سونداي-اق بيىلعى چەمپيوناتتا ءتاۋىر ناتيجە كورسەتىپ كەلە جاتقان «تاراز» سىرت الاڭدا «ورداباسىدان» جەڭىلىپ قالدى. اسا تارتىستى وتكەن وڭتۇستىك دەربيىندە بەس گول سوعىلىپ, شىمكەنتتىك كوماندا 3:2 ەسەبىمەن باسىم ءتۇستى. ءبىرىنشى اينالىمدا سۇرەڭسىز ويىن وتكىزىپ, تۋرنير كەستەسىندە جاعدايىن قيىنداتىپ العان «قايرات» بۇل تۋردا «ماقتاارالدى» 1:0 ەسەبىمەن جەڭدى. سونىمەن قاتار 14-تۋردا «اقتوبە» سىرت الاڭدا «اتىراۋدى» (2:0), «قىزىلجار» قاراعاندىدا «شاحتەردى» (2:1) ۇتتى. ال تۇركىستانداعى «تۇران» مەن «اقجايىق» ماتچى 1:1 ەسەبىمەن تەڭ اياقتالدى.
