17-18 ماۋسىمدا قازاقستاننىڭ توراعالىق ەتۋىمەن تۇركىتىلدەس ەلدەر پارلامەنتتىك اسسامبلەياسىنىڭ جاس پارلامەنتاريلەر توبى مۇشەلەرىنىڭ ءبىرىنشى وتىرىسى ءوتتى. وتىرىسقا قازاقستاننان بولەك, تۇركيا, ازەربايجان, قىرعىزستان جانە وزبەكستان رەسپۋبليكالارىنان جاس پارلامەنتاريلەر توبىنىڭ مۇشەلەرى قاتىستى.
جاستار قاناتىنىڭ توراعاسى نۇرجان جەتپىسباەۆتىڭ ايتۋىنشا, تۇركىتىلدەس ەلدەردىڭ ءوزارا بەيبىتشىلىك قارىم-قاتىناس جاساۋىنىڭ ماڭىزى زور. «قازاق حالقى بۇرىنعى زاماننان بەرى باۋىرىن سىيلاپ, كورشىسىن قۇرمەتتەگەن. تۇركىتىلدەس باۋىرلارىمىزدىڭ ازيانىڭ جۇرەگىندە باس قوسۋى ەرەكشە ماڭىزعا يە. ءار ەل وزىندىك ماڭىزدى ورىن الادى. وسى ماڭىزدىلىقتى جاستار تەرەڭ تۇسىنەدى. اعا بۋىن وكىلدەرى جولعا قويعان ديپلوماتيالىق قارىم-قاتىناستى جالعاستىرۋ, ءبىزدىڭ, جاستاردىڭ مىندەتى. ۇعىنىپ قانا قويماي, تاراپتارعا پايدالى بولاتىن ناتيجەلى جۇمىستار اتقارىلادى دەگەن سەنىمدەمىن», دەپ اتاپ ءوتتى ول.
تۇركپا جاس پارلامەنتاريلەرىنىڭ مۇشەسى, تۇركيا رەسپۋبليكاسى ۇلى ۇلتتىق جينالىسىنىڭ دەپۋتاتى زەينەپ يىلدىز قازاق ەلىنە قوناقجايلىلىق ءۇشىن العىس ءبىلدىردى.
«تۇركى ينتەگراتسياسىنىڭ حالىقارالىق دەڭگەيدە ماڭىزدىلىعى ارتىپ, ءار جيىن سايىن تاراپتاردى تولعاندىرعان ماسەلەلەر وڭ شەشىمىن تابۋدا. مەملەكەتارالىق بايلانىستاردىڭ دا كۇشەيىپ جاتقاندىعىن ەرەكشە اتاپ وتۋگە بولادى. جىلى شىرايمەن قارسى العاندارىڭىز ءۇشىن العىس بىلدىرەمىن», دەدى زەينەپ يىلدىز.
كەزدەسۋگە قاتىسقان ەلوردالىق جاستار ءماسليحاتى مۇشەلەرىنىڭ پىكىرىنشە, جاس پارلامەنتاريلەرمەن كوزبە-كوز جۇزدەسىپ, تولعاندىرعان سۇراقتارىنا تۇششىمدى جاۋاپ الۋ قىزىقتى وتكەن. ولار سونداي-اق ءوز ەلدەرىندەگى جاستار ساياساتى جايىندا جاڭا اقپاراتقا قانىق بولعانىن ايتتى.
