قازاقستاندىق تەننيسشى بۇل سىندا رەسەيلىك اناستاسيا تيحونوۆامەن بىرگە فينالدا قىتايلىق لۋ تسزيا تسين جانە جاپونيالىق يۋ سياودي جۇبىمەن باس جۇلدەنى ساراپقا سالىپ, ەكى سەتتە ەش قيىندىقسىز جەڭىسكە جەتتى. ا.دانيلينا مەن ا.تيحونوۆا ءبىرىنشى پارتيادا 6:4 ەسەبىمەن باسىم تۇسسە, ەكىنشى سەتتە دە قازاقستاندىق-رەسەيلىك جۇپ قارسىلاستارىنا ەش مۇمكىندىك قالدىرمادى – 6:2. وسىلايشا, ءبىر ساعاتتان ءسال استام ۋاقىتقا سوزىلعان ويىن ا.دانيلينا مەن ا.تيحونوۆانىڭ جارقىن جەڭىسىمەن اياقتالدى.
بۇل – اننا دانيلينانىڭ جۇپتىق سىندا جەڭىپ العان 26-شى تيتۋلى. قازاقستاندىق تەننيسشى سونىڭ 25-ءىن حالىقارالىق تەننيس فەدەراتسياسى (ITF) اياسىندا وتكەن جارىستاردا ولجالاعان بولسا, بىرەۋىن بيىل قاڭتاردا برازيليالىق بەاتريس حادداد مايامەن بىرگە سيدنەيدەگى WTA 250 تۋرنيرىندە جەڭىپ العان بولاتىن.
