مۇحيتتىڭ ارعى بەتىندە وتكىزىلگەن دودادا قازاقستان قۇراماسىنىڭ توعىز سپورتشىسى ونەر كورسەتىپ, سونىڭ جەتەۋى جۇلدەگەرلەر قاتارىنان كورىندى. اتاپ ايتقاندا, ەراسىل ساۋلەبەكوۆ (67 كگ), ەدىگە ەمبەردى (73 كگ), دەنيس پولۋبويارينوۆ (81 كگ) جانە نيكيتا ابدراحمانوۆ (102 كگ) مەكسيكادا ءانۇرانىمىزدى شىرقاتسا, نادەجدا لي (64 كگ) كۇمىس, ەراسىل وماروۆ (55 كگ) پەن الەكساندرا بەلەنكو (40 كگ) الەم چەمپيوناتىنىڭ قولا جۇلدەسىن جەڭىپ الدى.
وسىلايشا, ءبىر اپتاعا جالعاسقان جاسوسپىرىمدەر اراسىنداعى الەم چەمپيوناتىندا قازاقستاندىق سپورتشىلار ءتورت التىن, ءبىر كۇمىس جانە ەكى قولا مەدالمەن جالپىكوماندالىق ەسەپتە توپ جاردى. سونداي-اق ءتورت التىن, ءبىر كۇمىس جانە ءبىر قولا مەدال ولجالاعان كولۋمبيا سپورتشىلارى ەكىنشى ورىنعا يە بولسا, ەكى التىن, ءۇش كۇمىس, ءۇش قولا جۇلدە جەڭىپ العان تۇركيا قۇراماسى ۇزدىك ۇشتىكتى تۇيىندەدى. مەكسيكاداعى چەمپيوناتتا بارلىعى 22 ەلدىڭ ورەندەرى جۇلدەگە ىلىكتى.
