قازاقستان ءوزىنىڭ ساۋدا-ەكونوميكالىق ستراتەگياسىندا سانكتسيالاردى ەسكەرەدى - پرەزيدەنت
«قازاقستانعا قاتىستى ايتاتىن بولسام, ءبىزدىڭ ەلگە تىكەلەي قىسىم جاسالىپ جاتىر دەپ ايتپاس ەدىم», - دەدى قاسىم-جومارت توقاەۆ.
وسى ورايدا پرەزيدەنت سانكتسيالار كەلىسسوزبەن شەشىلەتىنىن اتاپ ءوتتى.
«ارينە, ءبىزدىڭ ساۋدا-ەكونوميكالىق ستراتەگيامىزدا بۇل سانكتسيالاردى ەسكەرەمىز. الايدا رەسەيمەن اراداعى ءبىزدىڭ بۇرىنعى شارتتارمەن بايلانىستى قازاقستاننىڭ مىندەتتەمەلەرى بار. وعان قوسا, تاريحتى ايتپاعاننىڭ وزىندە, گەوگرافيامىز بىزگە وتە ەرەكشە جاعدايدا بىرگە جۇمىس ىستەۋمىز قاجەتتىگىن مەڭزەپ وتىر», دەدى مەملەكەت باسشىسى.
پرەزيدەنت ەكى ەل اراسىندا جاڭا جاعدايدا ونەركاسىپ كووپەراتسياسىنىڭ ارنايى باعدارلاماسى بار ەكەنىن ەسكە سالدى.
«اتاپ ايتقاندا, قيىندىقتارعا قاراماستان ەۋرازيالىق ەكونوميكالىق وداقتىڭ بولاشاعى بار. وسى وداققا كىرۋدى دۇرىس ساناعان ەلدەر ەلەۋلى ەكونوميكالىق كۇش پەن الەۋەتتى قۇراپ وتىر», دەدى قاسىم-جومارت توقاەۆ.
دەگەنمەن پرەزيدەنت ناقتى قيىندىقتار ءالى دە بار ەكەنىن اتاپ ءوتتى. سوندىقتان ءوزارا قولايلى شەشىمدەردى ىزدەستىرۋدەگى كەلىسسوزدەر پروتسەسىندە ءتيىستى ماسەلەلەردى شەشۋگە ەرەكشە ەكپىن قويىلادى.
