ەكى مەكتەپكە دەيىنگى مەكەمە قىزمەتكەرلەرىنىڭ ەڭبەكاقىسىنىڭ ەسەپتەلۋى مەن اۋدارىلۋىن جوسپاردان تىس تەكسەرۋگە جەكە تۇلعالاردىڭ وتىنىشتەرى نەگىز بولدى.
«تەكسەرۋ بارىسىندا انىقتالعانداي, بالاباقشالاردىڭ ءبىرىنىڭ ەسەپشىسى قازاقستان رەسپۋبليكاسىنىڭ ەڭبەك كودەكسىن بۇزا وتىرىپ, وسى كاسىپورىندا ءىس جۇزىندە جۇمىس ىستەمەيتىن تۇلعاعا التى ايدىڭ ىشىندە نەگىزسىز جالاقى اۋدارىپ كەلگەن, سونداي-اق باسقا دا تولەمدەر جاساعان. كەلتىرىلگەن شىعىن 367,7 مىڭ تەڭگەنى قۇرادى», دەدى پاۆلودار وبلىسى بويىنشا ىشكى مەملەكەتتىك اۋديت دەپارتامەنتىندە.
ۆەدومستۆودا بۇل سومانىڭ تولىق وتەلگەنىن اتاپ ءوتتى.
باسقا مەكتەپكە دەيىنگى مەكەمەدە اۋديتورلار ەسەپشىنىڭ جارتى كۇن جۇمىس ىستەيتىن قىزمەتكەرگە ون اي بويى تولىق جۇمىس كۇنى ءۇشىن جالاقى تولەگەنىن انىقتادى.
«اۋديتورلىق ءىس-شارانىڭ قورىتىندىسى بويىنشا اتالعان بالاباقشالارعا انىقتالعان قۇقىق بۇزۋشىلىقتاردى جويۋ جانە كەلتىرىلگەن زالالدى وتەۋ, سونداي-اق بۇندايعا جول بەرگەن تۇلعالاردىڭ جاۋاپكەرشىلىگىن قاراۋ تۋرالى ۇيعارىم جىبەرىلدى», دەدى دەپارتامەنتتە.
تەكسەرۋ ماتەريالدارى پروتسەستىك شەشىم قابىلداۋ ءۇشىن سىبايلاس جەمقورلىققا قارسى قىزمەتتىڭ پاۆلودار وبلىسى بويىنشا دەپارتامەنتىنە جىبەرىلدى.
