بىلتىر عانا تۇساۋى كەسىلگەن اتالعان ءتۋرنيردىڭ بيىلعى ماۋسىمىندا قازاقستاننىڭ ءۇش كومانداسى ونەر كورسەتەدى. اتاپ ايتقاندا, ەل بىرىنشىلىگىنىڭ كۇمىس جۇلدەگەرى – «استانا», قولا جۇلدەگەرى – «قايرات» جانە قازاقستان كۋبوگىنىڭ يەگەرى – «قىزىلجار» كلۋبتارى. ۋەفا-نىڭ ۇپاي كوەففيتسيەنتىندە قازاقستان وزگە ەلدەرگە قاراعاندا جوعارى ورىندا تۇرعاندىقتان, قازاقستاندىق كوماندالار كونفەرەنتسيا ليگاسىنىڭ ىرىكتەۋ باسەكەلەرىن ەكىنشى كەزەڭنەن باستايدى.
جەرەبە قورىتىندىسى بويىنشا, ەلوردانىڭ «استاناسى» ەكىنشى اينالىمدا پولشا چەمپيوناتىنىڭ كۇمىس جۇلدەگەرى «راكۋۆ» ۇجىمىمەن كەزدەسسە, الماتىنىڭ «قايراتىنا» ماجارستان بىرىنشىلىگىنىڭ ەكىنشى ورىن يەگەرى «كيشۆاردا» كلۋبى قارسىلاس اتاندى. ال پەتروپاۆلدىڭ «قىزىلجارى» حورۆاتيانىڭ ەڭ ۇزدىك كوماندالارىنىڭ ءبىرى – «وسيەكپەن» كەزدەسەتىن بولدى. 21 شىلدەدە وتەتىن العاشقى ماتچتى «قايرات» پەن «قىزىلجار» قازاقستاندا وتكىزسە, «استانا» ءتۋرنيردى سىرت الاڭداعى ويىنمەن باستايدى. قارىمتا كەزدەسۋلەر 28 شىلدەگە جوسپارلانعان. ايتا كەتەيىك, كونفەرەنتسيا ليگاسىنىڭ العاشقى ماۋسىمىندا يتاليانىڭ «روما» كلۋبى جەڭىمپاز اتانعان بولاتىن.
