جاپونيا بالەت ترۋپپالارى جاھانعا ءوزىنىڭ سان الۋان سالتاناتىمەن تانىمال. سولاردىڭ ءبىرى – بي بەكزاداسى ارمانمەن تاندەمدە جۇمىس ىستەگەن Maki Asami Ballet ۇجىمى. سپەكتاكل توكيوداعى بەدەلدى Bunka Kaikan Hall ساحناسىندا ءوتتى. «استانا وپەرانىڭ» جەتەكشى ءسوليسى سپەكتاكلدەگى كاپيتان فەبتىڭ پارتياسىن كەرەمەت ورىنداپ, جاپوندىق كورەرمەننىڭ سۇيىسپەنشىلىگىنە بولەندى.
– جاپوندىقتاردىڭ فەبتىڭ پارتياسىن ورىنداۋعا ادەيىلەپ شاقىرعانى مەن ءۇشىن زور ماقتانىش. بۇل ايتۋلى پارتيامەن شەتەلدە ءبىرىنشى رەت ونەر كورسەتۋىم ەمەس. وسىعان دەيىن ءبىزدىڭ ترۋپپا سانكت-پەتەربۋرگتاعى ايگىلى ماريا تەاترىندا «پاريج قۇداي اناسىنىڭ سوبورى» بالەتتىك سپەكتاكلىن ۇسىنعان بولاتىن. ارينە, كۇندە كورىپ جۇرگەن ارىپتەستەرىڭمەن ونەر كورسەتۋ, ءبىر ساحنادا بيلەۋ باسقا دا, بەيتانىس ارتىستەرمەن جۇمىس ىستەۋ مۇلدە بولەك. اسىرەسە بۇل جاس ءارتىس ءۇشىن تەڭدەسسىز تاجىريبە. وسى ساپارىمدا مەن ءوز ونەرىممەن قازاقستاندى, ءتول تەاترىمدى تانىستىرعاننان كەيىن, ماعان بۇرىنعىدان دا زور جاۋاپكەرشىلىك ارتىلدى, بويىمداعى بارلىق كاسىبي شەبەرلىگىمدى كورسەتۋگە تىرىستىم. ماعان بىلدىرگەن قولداۋى ءۇشىن بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆاعا العىسىم شەكسىز, – دەپ اعىنان جارىلدى تەاتردىڭ جەتەكشى ءسوليسى ارمان ورازوۆ.
بۇل وتاندىق دارىندى ءارتىستىڭ كۇنشىعىس ەلىنە العاشقى بارۋى بولسا دا, ول ونەردە شەكارا جوق ەكەنىن, شەتەلدىك ارىپتەستەرىمەن العاشقى دايىندىقتان كەيىن-اق دوستاسىپ كەتكەنىن ايتىپ, جاپوندىقتاردىڭ قوناقجايلىعىنا باس ءيىپ قايتقاندىعىن دا تامسانا جەتكىزدى. ەكى كۇن قاتارىنان كورەرمەن نازارىنا ۇسىنىلعان سپەكتاكلدە وتانداسىمىز Maki Asami Ballet ترۋپپاسى, سونداي-اق فرانتسيا مەن يتاليادان شاقىرىلعان سوليستەرمەن تاماشا تاندەمدە ونەر كورسەتتى. الەمنىڭ ايگىلى بالەت بيشىلەرىمەن بىرگە بيلەۋگە ارماندى رولان پەتيدىڭ اسسيستەنتى, ايگىلى بالەتمەيستەر لۋيدجي بونينونىڭ ءوزى ارنايى شاقىرۋى دا – ۇلتتىق بالەت ونەرى ءۇشىن زور تابىس ەكەنى ءسوزسىز.
– ءبىز لۋيدجي بونينونى كوپتەن بەرى بىلەمىز. ول وتە كەرەمەت ادام جانە ءبيدىڭ ەگجەي-تەگجەيىنە دەيىن ءجىتى ءمان بەرەتىن كانىگى كاسىبي مامان. 2016 جىلى ول «استانا وپەراعا» رولان پەتيدىڭ حورەوگرافياسىندا «پاريج قۇداي اناسىنىڭ سوبورى» ايگىلى سپەكتاكلىن الىپ كەلدى. ودان كەيىن وسى كورنەكتى حورەوگرافتىڭ قويىلىمىندا لەو دەليبتىڭ ايگىلى «كوپپەليا» تانىمال بالەتىن ۇسىندى. جاپونيادا مەنى لۋيدجي بونينو كۇتىپ الىپ, ەكەۋىمىز بىرگە ون كۇن بويى ونەر كورسەتۋگە دايىندالدىق, – دەپ جاپون ساپارىنداعى اسەرىمەن بولىسكەن ءارتىس وتاندىق بالەت ونەرىنىڭ بولاشاعىنا قاتىستى دا ويىن ورتاعا سالدى:
– بۇگىندە قازاقستاندىق بالەت الەمدىك دەڭگەيدە تۇر دەپ نىق سەنىممەن ايتا الامىن. ءبىزدىڭ ارتىستەردىڭ شەت ەلدەردە ونەر كورسەتىپ, سپەكتاكلدەر مەن گالا-بالەتتەرگە قاتىسۋعا شاقىرتۋ الىپ جاتقانى – وسىنىڭ ايقىن دالەلى. بۇعان دەيىن ومان, يتاليا مەن يسپانيادا تابىستى وتكەن گاسترولدىك ونەر كورسەتۋلەرىمىز كەزىندە, سونداي-اق وسى جولعى ساپار بارىسىندا دا بۇعان انىق كوز جەتكىزدىم, – دەپ ويىن تۇيىندەدى ءبيشى.
بۇل الىس-جاقىن شەت ەلدەردى ونەرىمەن تامساندىرىپ جۇرگەن «استانا وپەرانىڭ» دارىندى ءارتىسى ارمان ورازوۆتىڭ اكتەرلىك شەبەرلىك پەن تەحنيكالىق دايىندىق تۇرعىسىنان جات ەلدى تاڭداي قاققىزىپ كەلگەن العاشقى ساپارى ەمەس. ونىڭ قورجىنىندا قازاقستاننان بولەك, گەرمانيانىڭ بەدەلدى حالىقارالىق بايقاۋلارىنىڭ دا جەڭىستەرى بار. جاپونيادا جارقىراپ ءجۇرىپ جارقىن ونەر تۋدىرعان تالانتقا تامسانا قول سوققان كورەرمەن قوشەمەتى – رياسىز كوڭىل ريزاشىلىعى ەدى.
