قازىرگى تاڭدا شىعىستا جوعارى تەحنولوگيالىق مەديتسينالىق كومەكتىڭ 27 ءتۇرى كورسەتىلەدى. بيىل سوڭعى بەس ايدا عانا اتالعان تەحنولوگيا ادىسىمەن 170 وپەراتسيا جاسالعان. جوعارى تەحنولوگيالىق مەديتسينالىق كومەك دەپ وتىرعانىمىز, كەسپەي-تىلمەي وتا جاساۋ. بۇل ءادىستىڭ ءبىر تيىمدىلىگى – ناۋقاستار ءۇشىن اسا قاۋىپتى ەمەس. دارىگەرلەردىڭ دە قولى ۇزارعان. ماسەلەن, جۋىقتا عانا انا مەن بالا ورتالىعىندا ۋرولوگيالىق اۋرۋلار انىقتالعان ءبىر جاستان ون ءبىر جاسقا دەيىنگى 11 بالاعا زاماناۋي ادىسپەن وپەراتسيالار جاسالدى. ول ءۇشىن «UMC» كورپوراتيۆتىك قورىنىڭ «انا مەن بالا ۇلتتىق عىلىمي ورتالىعى» اق بالالار ۋرولوگيا بولىمشەسىنىڭ مەڭگەرۋشىسى, بالالار ۋرولوگ-اندرولوگى, مەديتسينا عىلىمدارىنىڭ كانديداتى ارداق ايناقۇلوۆ وسكەمەندەگى ارىپتەستەرىنە پراكتيكا جۇزىندە شەبەرلىك ساعاتتارىن وتكىزدى.
– ۋرولوگيالىق اۋرۋلاردىڭ بىرىنە وپەراتسيا جاسادىق. اۋىز قۋىسىنىڭ شىرىشتى قاباتىن قولدانا وتىرىپ, ۋرەترانىڭ جەتىسپەيتىن بولىگىنە وپەراتسيا ارقىلى جالعانادى. بۇل وپەراتسيالار شەبەرلىك سىنىبىندا جاس دارىگەرلەرگە كورسەتىلدى, – دەيدى ا.ايناقۇلوۆ.
سونداي-اق بىلىكتى دارىگەر شەبەرلىك ساعاتىندا قۋىققا تۇسكەن تاستاردى بولشەكتەيتىن بىرەگەي اپپارات Auriga XL كومەگىمەن نەسەپ-تاس اۋرۋى بار بالالاردى ەمدەۋدى ۇيرەتتى. اقش شىعاراتىن بۇل لازەرلىك ليتوتريپتور انا مەن بالا ورتالىعىندا عانا بار. دەمەك حيرۋرگياسىز قۋىقتاعى تاستاردى ۇساقتاۋعا بولادى.
جوعارى تەحنولوگيالىق مەديتسينالىق كومەكتىڭ دامىعانى سونداي, ميداعى ىسىكتى دە كەسپەي-اق الىپ تاستاۋعا بولادى ەكەن. شىعىسقازاقستاندىق دارىگەرلەر ونى دا مەڭگەرە باستادى.
– جۇيەلى تۇردە وتكىزىلىپ تۇراتىن شەبەرلىك ساباقتارىنىڭ ناتيجەسىندە ۇلكەن جەتىستىكتەرگە جەتتىك. بۇرىن ميداعى ىسىكتى الۋ ءۇشىن باس سۇيەكتى كەسۋگە تۋرا كەلەتىن. قازىر مۇرىن قۋىسى ارقىلى ىسىكتى الىپ تاستاي الامىز. بۇدان بىلاي جوعارى تەحنولوگيالىق كومەكتىڭ بۇل ءتۇرى ءبىزدىڭ ءوڭىر تۇرعىندارى ءۇشىن قولجەتىمدى بولادى, – دەيدى وبلىستىق مامانداندىرىلعان مەديتسينالىق ورتالىقتىڭ يننوۆاتسيالىق مەديتسينا مەڭگەرۋشىسى جاندوس ۋاپ.
ايتا كەتسەك, مەديتسينا قىزمەتكەرلەرى كۇنى قارساڭىندا مۇنداي وپەراتسيا شىعىس قازاقستاندا العاش رەت ءوتتى. نەيروحيرۋرگتەردىڭ پىكىرىنشە, ەڭ قيىن, ەڭ كۇردەلى وپەراتسيا وسى ەكەن. شىعىسقازاقستاندىق حيرۋرگتەردىڭ شەبەرلىكتەرىن شىڭداۋ ءۇشىن وسكەمەنگە نۇر-سۇلتان قالاسىنىڭ «ۇلتتىق نەيروحيرۋرگيا ورتالىعىنىڭ» ترانسنازالدى ەندوسكوپيالىق نەيروحيرۋرگيا ءبولىمىنىڭ نەيروحيرۋرگ-دارىگەرى, مەديتسينا عىلىمدارىنىڭ كانديداتى دانيار تەلتاەۆ كەلگەن. ەكىكۇندىك شەبەرلىك سىنىپتارىندا مۇرىن ارقىلى مي ىسىگىن الىپ تاستاۋدىڭ بىرقاتار وپەراتسياسى جۇرگىزىلدى.
وپەراتسياعا الىنعان ءتورت ناۋقاس تا وبلىس تۇرعىندارى. ولار بىرنەشە جىل بويى كورۋ قابىلەتتەرىنىڭ ناشارلاۋىنا شاعىمدانعان. وكۋليستەر دە تەكسەرە كەلە ميدا ىسىكتىڭ بارىن ايتقان. ونى مرت تەكسەرۋلەرى دە راستاعان ەكەن. بىلىكتى دارىگەرلەردىڭ ايتۋىنشا, ءسال كەشىكسە, كوزدەرى مۇلدەم كورمەي قالۋى مۇمكىن ەدى.
– باس-سۇيەكتى جاراقاتتاماي مۇرىن قۋىسى ارقىلى ىسىكتى كەسىپ الامىز. بۇعان وسكەمەندەگى نەيروحيرۋرگتەردىڭ قابىلەتتەرى جەتكىلىكتى. ەگەر, وپەراتسيا ءساتتى اياقتالسا, پاتسيەنتتەردىڭ كورۋ قابىلەتى قالپىنا كەلەدى, – دەپ اتاپ ءوتتى نەيروحيرۋرگ دارىگەر دانيار تەلتاەۆ.
جىل سوڭىنا قاراي جوعارى تەحنولوگيالىق مەديتسينالىق كومەكتىڭ تاعى 14 ءتۇرى ەنگىزىلمەك. بۇل ءۇشىن ونكولوگيا ورتالىعىنا, وبلىستىق اۋرۋحاناعا, انا مەن بالا ورتالىعىنا قوسىمشا جاڭا مەديتسينالىق قۇرىلعىلار ساتىپ الىنادى. ال زاماناۋي قۇرىلعىلاردىڭ ءتىلىن ءتۇسىنۋ ءۇشىن 19 دارىگەر يزرايلدە بىلىكتىلىكتەرىن كوتەرىپ كەلمەك.
شىعىس قازاقستان وبلىسى
