يۋتتا ۋرپيلاينەن ورتالىق ازياداعى تۇراقتى دامۋ سالاسىنداعى ماقساتتارعا قول جەتكىزۋگە ارنالعان بۇل سامميت وتە دەر كەزىندە ءوتىپ جاتقانىن, پاندەميا ورتالىق ازيانىڭ تۇراقتى دامۋ ماقساتتارىنا جەتۋ جولىنداعى ىلگەرىلەۋىن باسەڭدەتكەنىن ايتتى.
ونىڭ بايانداۋىنشا, رەسەيدىڭ ۋكرايناعا قارسى اگرەسسياسىنىڭ سالدارى, ماسەلەنى ودان ءارى ۋشىقتىرا ءتۇستى. بۇل رەتتە ەڭ وسال توپتار وتە كوپ جوعالتۋى مۇمكىن.
«تۇراقتى دامۋ ماقساتتارى - ءبىزدىڭ تۇراقتى بولاشاققا دەگەن جولىمىزداعى ورتاق تۇسباعدارىمىز سياقتى. ەۋروپالىق وداقتىڭ ورتالىق ازياعا تۇراقتى دامۋ ماقساتتارىنا قول جەتكىزۋگە كومەكتەسۋ جولىنداعى ءوز بەيىلدىلىگىن راستاۋعا رۇقسات ەتىڭىزدەر. ءبىز سىزدەردىڭ جاعىڭىزدامىز, سەبەبى ءبىز تۇراقتى ءارى ينكليۋزيۆتى بولاشاقتى قۇرىپ وتىرمىز. ءبىز ءسىزدىڭ ايماقتىق ديالوگقا قاتىستى العا ۇمتىلۋلارىڭىزدى قولدايمىز», دەپ اتاپ ءوتتى يۋتتا ۋرپيلاينەن.
ودان ءارى سپيكەر جاڭا «Global Gateway» ستراتەگيامىز تۇراقتى جانە جوعارى ساپالى ينفراقۇرىلىمعا ينۆەستيتسيا سالۋ ارقىلى, ەۋروپا مەن بۇكىل الەمدەگى سەرىكتەستەردى بايلانىستىرۋعا كومەكتەسەتىنىن ايتتى. ورتالىق ازيادا بىزدە «Team Europe» اتتى ەكى ايماقتىق باستامامىز بار. ەۋروپالىق وداق 10 ميلليون ەۋرونى قۇرايتىن «DARYA» وڭىرلىك باعدارلاماسىن قولداپ وتىر. بۇل جاستاردىڭ, سونىڭ ىشىندە ورالعان ميگرانتتاردىڭ ينكليۋزيۆتى داعدىلارىن دامىتۋعا ىقپال ەتەدى. بۇل ءوڭىر ەكونوميكاسىن ارتاراپتاندىرۋعا كومەكتەسۋ ءۇشىن كاسىپتىك وقىتۋدى قولداۋىمىزعا قوسىمشا بولادى.
«سونىمەن قاتار ءبىز ەڭبەك ميگرانتتارى مەن ولاردىڭ وتباسىلارىنا كومەكتەسۋ جوباسىن دايىنداپ جاتىرمىز. اقشا اۋدارىمدارىنىڭ اعىنىن جانە جاڭا ءوسۋدى ىنتالاندىرۋ ءۇشىن اقىلدى تسيفرلىق تەحنولوگيالاردى پايدالانۋعا باستى نازار اۋدارىلىپ وتىر», دەپ اتاپ ءوتتى سپيكەر.
