«قۇرىلتايعا پارلامەنت دەپۋتاتتارى, ساياسي پارتيالار مەن قازاقستان حالقى اسسامبلەياسىنىڭ مۇشەلەرى دە شاقىرىلدى. ۇكىمەتتىك ەمەس جانە كاسىبي ۇيىمداردىڭ وكىلدەرى دە شەت قالعان جوق. قۇرىلتاي قۇرامىنا وڭىرلىك قوعامدىق كەڭەستەردىڭ مۇشەلەرىن قوستىق. مەن ۇلتتىق قۇرىلتاي اتىنا زاتى ساي بولىپ, ەل ءۇمىتىن اقتايدى دەپ سەنەمىن. بىزدە ءتۇرلى پىكىرتالاس الاڭدارى بار, بىراق قۇرىلتايدىڭ ورنى ءبىر بولەك. قۇرىلتاي - كەڭ اۋقىمدى جيىن. بىراق بۇل جۇمىستىڭ ساپاسىنا كەرى اسەر ەتپەۋى كەرەك», دەدى قاسىم-جومارت توقاەۆ.
وسى ورايدا پرەزيدەنت وتىرىستاردى مۇقيات ۇيىمداستىرۋ كەرەك ەكەنىن باسا ايتتى.
«بۇل جەردە شىن مانىندە حالىقتىڭ ءۇنى ەستىلىۋى ءتيىس. كەز كەلگەن ادامدى قۇرىلتايعا قاتىستىرۋعا بولمايدى. جۇرتتىڭ مۇڭ-مۇقتاجىن, تالاپ-تىلەگىن جەتكىزەتىن ازاماتتار باس قوسۋى كەرەك. بۇل ەل بىرلىگىن نىعايتاتىن, قوعامدى ۇيىستىراتىن تىڭ يدەيالار ورتالىعى بولاتىنا كامىل سەنەمىن», دەدى مەملەكەت باسشىسى.
ايتا كەتەيىك, بۇگىن پرەزيدەنت جاڭادان قۇرىلعان ۇلىتاۋ وبلىسىنا جۇمىس ساپارىمەن باردى.
سونداي-اق كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.
