كۇن تارتىبىندەگى ءبىرىنشى ماسەلە ەل پرەزيدەنتى قاسىم-جومارت توقاەۆتىڭ ۇسىنىمى بويىنشا جوعارعى سوتتىڭ سۋديالارىن سايلاۋ تۋرالى بولدى. دەپۋتاتتاردىڭ داۋىس بەرۋ ناتيجەسىندە دوسجان ءامىر مەن قامبار نۇرىشەۆ جوعارعى سوت سۋديالارى قىزمەتىنە سايلاندى.
سونىمەن قاتار سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەلەكتر ەنەرگەتيكاسى, ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ, جەر قويناۋىن پايدالانۋ, جەرگىلىكتى مەملەكەتتىك باسقارۋ جانە مەملەكەتتىك شەكارا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا قارادى. ناتيجەسىندە سەنات دەپۋتاتتارى زاڭ جوباسىنا بىرقاتار تۇزەتۋ ەنگىزىپ, ونى ماجىلىسكە قايتاردى.
ناقتى ايتقاندا سەناتورلار كوپپاتەرلى تۇرعىن ۇيلەردى كوندومينيۋم نىسانىن باسقارۋدىڭ جاڭا تاسىلىنە كوشىرۋ مەرزىمىن 2023 جىلدىڭ 1 شىلدەسىنە دەيىن ۇزارتۋدى ۇسىندى. ودان بولەك, پالاتا دەپۋتاتتارى الماتى قالاسىن دامىتۋ ماسەلەسىنە نازار اۋدارىپ, جىلجىمايتىن م ۇلىكتى رەسىمدەۋ ماسەلەلەرىن قاراۋ جونىندەگى كوميسسيانىڭ قىزمەتى مەن قۇزىرەتى تۋرالى نورمالاردى ناقتىلاۋ قاجەت ەكەنىن جەتكىزدى. سەنات ەنگىزگەن تۇزەتۋلەردىڭ قاتارىندا قازاقستان رەسپۋبليكاسى ۇلتتىق عىلىم اكادەمياسىنىڭ ۇيىمدىق-قۇقىقتىق نىسانىن وزگەرتۋگە, ونىڭ نەگىزگى وكىلەتتىكتەرىن ايقىنداۋعا, «ۇلتتىق عىلىم اكادەمياسىنىڭ اكادەميگى» ۇعىمىن بەكىتۋگە جانە اكادەميكتەرگە زەينەتكەرلىك جاسقا جەتكەننەن كەيىن ءومىر بويى اي سايىنعى ستيپەنديا بەلگىلەۋگە قاتىستى ۇسىنىستار بار. بۇل نورمالاردى «عىلىم تۋرالى» زاڭدا ناقتى كورسەتۋ ۇسىنىلدى.
سونداي-اق سەناتورلار ۇكىمەتتىڭ جانە ەسەپ كوميتەتىنىڭ 2021 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن تىڭدادى.
وتىرىس بارىسىندا جالپى بىلتىر رەسپۋبليكالىق بيۋدجەتتىڭ نەگىزگى پارامەترلەرى ورىندالعانى اتاپ ءوتىلدى. دەگەنمەن, دەپۋتاتتار بيۋدجەت قاراجاتىن جۇمساۋدىڭ تيىمدىلىگىن ودان ءارى جاقسارتۋ ماسەلەسىنە توقتالىپ, حالىقتىڭ ءال-اۋقاتىن ارتتىرۋعا كەرى اسەر ەتەتىن بىرقاتار ماڭىزدى جانە جۇيەلى پروبلەماعا نازار اۋداردى.
سەنات توراعاسى ەلىمىز دامۋدىڭ جاڭا كەزەڭىنە قادام باسقانىن تىلگە تيەك ەتتى. سوعان بايلانىستى قازىر بيلىكتىڭ بارلىق تارماعى مەملەكەت باسشىسى بەلگىلەپ بەرگەن ماقساتتارعا قول جەتكىزۋ جولىندا كۇش بىرىكتىرۋى كەرەك ەكەنىن ايتتى.
«حالقىمىز 5 ماۋسىم كۇنى مەملەكەت باسشىسى جاريالاعان كونستيتۋتسيالىق وزگەرىستەرگە قولداۋ ءبىلدىردى. اتا زاڭعا ەنگىزىلگەن تۇزەتۋلەر جاڭا قازاقستاننىڭ نەگىزىن قالايدى. قازىرگى تاڭدا وسى باعىتتا ساياسي جۇيەمىزدى تۇبەگەيلى وزگەرتۋ ۇدەرىسى ءجۇرىپ جاتىر. مۇنىڭ ءبارى, تۇپتەپ كەلگەندە, ادىلەتتى مەملەكەت قۇرۋعا باعىتتالىپ وتىر. ءبىز حالىق قولداۋ بىلدىرگەن پرەزيدەنتتىك رەفورمالاردىڭ ىسكە اسىرىلۋىن قامتاماسىز ەتۋىمىز كەرەك», دەدى ماۋلەن اشىمباەۆ.
سونىمەن بىرگە سەنات سپيكەرى مەملەكەت قارجىسىن جۇمساۋدىڭ تيىمدىلىگىن ارتتىرۋ اسا ماڭىزدى ەكەنىن اتاپ ءوتتى.
«جاڭا كەزەندە مەملەكەت قارجىسىنىڭ جۇمساۋدىڭ جانە رەسپۋبليكالىق بيۋدجەتتى ورىنداۋدىڭ تيىمدىلىگىن ارتتىرۋىمىز قاجەت. وسى باعىتتا جاڭا ۇستانىمدار مەن پرينتسيپتەر كەرەك», دەدى پالاتا توراعاسى.
بۇدان باسقا ول ەلىمىزدىڭ الدىندا تۇرعان ماڭىزدى مىندەتتەردىڭ ءبىرى وڭىرلەردىڭ دامۋىن جاڭا دەڭگەيگە كوتەرۋ ەكەنىن ايتتى.
«وبلىستاردا ينفراقۇرىلىمدى جەتىلدىرۋ, كوممۋنيكاتسيالاردى جاڭارتۋ, الەۋمەتتىك نىساندار سالۋ, تۇراقتى جۇمىس ورىندارىن اشۋ, حالىقتىڭ ءال-اۋقاتىن ارتتىرۋ باعىتتارى بويىنشا اۋقىمدى جۇمىس اتقارىلۋعا ءتيىس. كونستيتۋتسيالىق وزگەرىستەردىڭ اياسىندا سەنات وڭىرلەردىڭ ماسەلەلەرىن قاراستىراتىن نەگىزگى ينستيتۋت رەتىندە انىقتالدى. الداعى ۋاقىتتا وسى باعىتتا ۇكىمەتپەن بىرلەسىپ, ناتيجەلى جۇمىس ىستەيمىز دەپ سەنەمىز», دەدى ماۋلەن اشىمباەۆ.
ايتا كەتەيىك, 2021 جىلعى بيۋدجەتتىڭ اتقارىلۋى تۋرالى ەسەپ 2022 جىلعى 20 ماۋسىمدا وتەتىن پارلامەنت پالاتالارىنىڭ بىرلەسكەن وتىرىسىندا قارالىپ, قورىتىندىلانادى.
ايانا توعانبەك
