ىرگەتاسى 1899 جىلى قالانعان بۋداپەشت قالاسىنىڭ كلۋبى بۇگىنگە دەيىن ماجارستان چەمپيوناتىندا 33 مارتە توپ جارعان. سونداي-اق 24 مارتە ماجارستان كۋبوگىندا جەڭىمپاز اتانعان, 6 رەت سۋپەركۋبوك دوداسىندا دارا شىققان. 1964 جىلدان بەرى ەۋروكۋبوك باسەكەلەرىنىڭ تۇراقتى قاتىسۋشىسىنا اينالعان «فەرەنتسۆاروش» 1964-1965 جىلعى فۋتبول ماۋسىمىندا بۇرىنعى جارمەڭكە كۋبوگى, قازىرگى ەۋروپا ليگاسى تۋرنيرىندە جەڭىمپاز اتانعان. ازىرگە بۇل ماجارستان كلۋبتارى اراسىنداعى ەۋروكۋبوكتا اتوي سالعان جالعىز كوماندا.
«فەرەنتسۆاروش» قازىرگى تاڭدا ۋەفا رەيتينگىندە 101-ورىندا تۇرسا, «توبىل» 310-ساتىعا جايعاسقان. كوماندانى 58 جاستاعى رەسەيلىك مامان ستانيسلاۆ چەرچەسوۆ جاتتىقتىرادى. «توبىل» مەن «فەرەنتسۆاروش» كلۋبتارى اراسىنداعى ءبىرىنشى اينالىمنىڭ العاشقى ماتچى 5 شىلدەدە قوستانايدا, قارىمتا كەزدەسۋ 12 شىلدەدە بۋداپەشتتە وتەدى.
