جاقىندا حالىقارالىق IT-ستارتاپتار تەحنوپاركى العاش رەت Caspian Startup-2022 حالىقارالىق بايقاۋى اياسىندا ۇيىمداستىرعان Demo Day ءىس-شاراسى ءوتتى. جاڭا جوباعا قاتىسۋشى NIS وقۋشىلارى اۋەلى ءۇش اي بويى AstanaHub-تا ونلاين وقۋدان ءوتىپ, تالىمگەرلەرمەن بىرلەسىپ ءوز جوبالارىن ازىرلەگەن بولاتىن. كەيىن ۇزدىك شىققان جوبا اۆتورلارى ءوز تۋىندىلارىن كورسەتىپ, قورعاۋ ءۇشىن اقتاۋ قالاسىنا جينالدى.
Demo Day الاڭىنا شىققان جوبالار ىشىندە ورالداعى NIS كومانداسىنىڭ «NFT-وياتقىش L7RK» ستارتاپى ۇزدىك دەپ تانىلدى. بۇل جوبا وتە قىزىق: ۇيقىدان ەرتە تۇرعان ادام باي بولادى! ورالدىق ونەرتاپقىشتار جاساعان NFT ساعاتى ءوز قوجاسىن ۇيقىدان ەرتە وياتادى. ارنايى تەكسەرىستىڭ كومەگىمەن يەسىنىڭ ۇيقىدان تۇرعانىنا كوز جەتكىزگەن سوڭ, باعدارلاما وعان توكەن (كريپتوۆاليۋتا) ەسەپتەيدى. وسىلاي جينالعان قاراجاتتى يەسى تسيفرلىق دوللارعا ايىرباستاپ نەمەسە باسقا تسيفرلىق امياندارعا اۋدارا الادى.
«بۇل جوبانى جاساعان كوماندانىڭ ءار مۇشەسىنىڭ ءوز مىندەتى بار: ادەليا شاۋكەنەۆا توپ كوشباسشىسى بولسا, الماس ساپاروۆ پەن ازامات ورازعالي – ءموبيلدى جاساقتاۋعا جاۋاپتى, ەرنۇر ناسىپقالي – ۆەب-ديزاينەر جانە فرونتەند, ابىلاي مامەتان – اناليتيك مامان», دەيدى ورالدىق NIS ءباسپاسوز حاتشىسى ايدانا حاميدۋللينا.
جەڭىمپازدار ءموبيلدى قوسىمشانى ازىرلەپ بولىپ, ەندى AstanaHub-تىڭ BlockChainBattle-دە باق سىناپ كورمەك. ونەرتاپقىش ۇل-قىزداردىڭ جەتەكشىسى, مەكتەپ مۇعالىمى ورال قىدىرشاەۆ وسىنداي بايقاۋلار وقۋشىلاردى ءوز ءىسىن قالاي باستاۋعا, ءوز ءونىمىن تانىستىرۋ جانە كومپانيالارمەن قارىم-قاتىناس ورناتۋعا ۇيرەتەتىنىن ايتادى.
تاعى ءبىر جاڭالىق – كوماندانىڭ بەلدى مۇشەسى الماس ساپاروۆ كەشە عانا INFOMATRIX-ASIA حالىقارالىق كونكۋرسىندا پنەۆمونيانىڭ بار-جوعىن لەزدە انىقتايتىن ChestXRayAl قوسىمشاسى ءۇشىن التىن مەدال يەلەندى. بۇل بايقاۋعا قازاقستانمەن بىرگە تۇرىكمەنستان, تاجىكستان, قىرعىزستان جانە باسقا ەلدەردىڭ وكىلدەرى قاتىسقان بولاتىن.
راديولوگتەرگە قولعانات بولاتىن وسىنداي باعدارلاما جاساۋ يدەياسى اۆتورعا پاندەميا كەزىندە كەلگەن ەكەن. ول ءۇشىن مەديتسينالىق ورتالىقتاردان جينالعان 6 مىڭعا جۋىق رەنتگەن سۋرەتى بار بازانى پايدالانىپ, ۆيزۋالدى كەسكىندەردى ءوزى تالداي الاتىن كونۆوليۋتسيوندى نەيروندىق جەلى جاسالعان.
– بۇل باعدارلاما رەنتگەن سۋرەتى ارقىلى وكپە قابىنۋىن 92 پايىز دالدىكپەن انىقتايدى. ماماندار ءار سۋرەتتى قاراپ, كەڭەسىپ, دياگنوستيكا ءۇشىن 15 مينۋت جۇمساسا, ChestXrayAI جاساندى ينتەللەكتىسىنە بىرنەشە سەكۋند جەتكىلىكتى, – دەيدى الماستىڭ عىلىمي جەتەكشىسى, مەكتەپ مۇعالىمى بوريس زەلەنوۆ.
باتىس قازاقستان وبلىسى
