تاسباقالار تاجالدان امان قالدى

ۇرلىقتىڭ شەگى جوق جانە ۇرلانبايتىن ەشتەڭە دە قالمادى. ويتكەنى, قازىر جىل­­­تى­راعاننىڭ دا, جىبىر­لا­عان­نىڭ دا ءبارى ۇرىلاردىڭ قولتىعىندا كەتەدى. ال ۇرىلاردىڭ كوبەيۋىنە دەم بەرەتىندەر دە, قولتىعىنا سۋ بۇركۋشىلەر دە وتە كوپ. سونىڭ ءبىر دالەلىندەي, سارىاعاش شەكارا جاساعى توسىن ۇرلىقتىڭ ۇستىنەن ءتۇستى. ولار «كەلەس – سارىاعاش» باعىتىنداعى پويىزدىڭ جۇك ۆاگونىن تەكسەرۋ كەزىندە  جالپى سالماعى 280 كيلوگرامم تارتاتىن, ياعني اناۋ-مىناۋ ەمەس, ءۇش تسەنتنەرگە جۋىق تاسباقالاردى تاپتى. ەركىندىكتىڭ وزىندە اقىرىن باسىپ, جايباراقات ءومىر سۇرەتىن قايران تاسباقالار جەتى قاپقا نىعىزدالىپ سالىنعاندىقتان تۇنشىعىپ قالا جازداپتى. تەك قاپتىڭ اۋزىن اشقاندا عانا دۇنيەنىڭ جارىعى مەن ءبىر جۇتىم اۋانىڭ سامالىنان جىبىرلاپ سالا بەردى. ءسويتىپ, شەكارا قىزمەتكەرلەرىنىڭ ارقاسىندا سۋىق قولدى سۇعاناقتاردىڭ قولىنان سىتىلىپ, قايتا كەڭدىككە شىققان تاسباقالار, ايتەۋىر ءبىر ءتۇس كورىپ وتكەندەي, امان-ەسەن ەركىندىككە اتتاندى. الەكساندر تاسبولاتوۆ, «ەگەمەن قازاقستان».