بىراق, وسى وتىز جىلدا حالىقتىڭ سانا-سەزىمى دە ەداۋىر ءوسىپ جەتىلدى. تاۋەلسىزدىك ماعان نە بەردى, مەنىڭ ومىرىمە, تۇرمىسىما قانشالىقتى اسەر ەتتى دەگەن سۇراقتار تۋىنداي باستادى. مەملەكەتتىڭ جۇرگىزىپ كەلە جاتقان ساياساتىنا سىن ايتۋشىلار كوبەيدى. بىرەۋلەر وسىناۋ الىپ ەلدەن ءۇي سالۋ ءۇشىن الاقانداي جەر الا الماي وتىرعانىن ايتادى. ەكىنشى بىرەۋلەر جۇمىس تابا الماي جۇرگەنىن اشىنا بايانداسا, ءۇشىنشى بىرەۋلەر كرەديتتەن كوز اشپاي كەلە جاتقانىن, حالىقتىڭ باسىم كوپشىلىگى بانكتەردىڭ «تۇتقىنىنا تۇسكەنىن» جازدى. مىنە, وسى تۇستا جاڭا پرەزيدەنتىمىز قاسىم-جومارت توقاەۆتىڭ جاساپ جاتقان ءىس-ارەكەتتەرى, اسىرەسە «حالىق ۇنىنە قۇلاق اساتىن مەملەكەت» قاعيداتىن ىسكە قوسۋى كوڭىلگە ۇلكەن دەمەۋ بولدى. ونىڭ ناتيجەسىن ءبىز جۋىقتا وتكەن رەفەرەندۋم قورىتىندىسىنان كوردىك. داۋىس بەرۋگە قاتىسقانداردىڭ سەكسەن پايىزعا جۋىعى پرەزيدەنتتىڭ ۇستانعان باعىتىن قولدادى. بۇرىنعى سايلاۋلارعا قاراعاندا الدەقايدا بەلسەندى وتكەن رەفەرەندۋم ءۇشىن بۇل ۇلكەن ناتيجە.
دەگەنمەن ءبىزدىڭ يدەولوگياسىزدىعىمىز, انىقتاپ ايتقاندا, ونىڭ بارى مەن جوعىنىڭ بەلگىسىزدىگى كوپتەگەن سانالى ازاماتتى ويلاندىرماي قويمايدى. يدەولوگيا دەگەنىمىز – بۇكىل قازاقستان رەسپۋبليكاسىنىڭ ازاماتتارىن, ولاردىڭ بالالارىن, ياعني وتباسى مۇشەلەرىن ءبىر ماقسات جولىندا بىرىكتىرەتىن دۇنيە. باي دا, كەدەي دە, باسشى دا, قوسشى دا ءبىر يدەيا مەن ماقسات اياسىندا بىرىگىپ, قازاقستان رەسپۋبليكاسىنىڭ ازاماتى دەگەن ارداقتى اتتىڭ ابىرويىنا قىزمەت ەتىپ, وتانىمىزدى جان-تانىمەن قورعاۋعا ءتيىس. يدەولوگيا – مىنە, وسىنى جۇزەگە اسىرۋ قۇرالى. بار ما بىزدە وسىنداي يدەولوگيا؟ جوق, ءوز باسىم ونى كورىپ تۇرعان جوقپىن. ازىرگە جالپىعا ورتاق تاۋەلسىزدىگىمىزدەن باسقا كوپ ەشتەڭەمىز جوق.
ەلىمىزدە بارلىق ازاماتتىڭ باسىن بىرىكتىرەتىن دۇرىس تا ايقىن جانە ارقايسىمىزدىڭ جۇرەگىمىزگە بارىپ قوناقتاي قالاتىنداي تۇسىنىكتى يدەولوگيانىڭ بولماۋى ەلدى بىتىراڭقىلىققا اكەلەدى. جەرشىلدىك, رۋشىلدىق, ءتۇرلى ءدىني اعىمدارعا بولىنۋشىلىك, ادامداردىڭ ساناسىن ۋلاۋ سەكىلدى كەسەلدەردىڭ بارلىعى, مىنە, وسىدان باستالادى.
ەندەشە, مۇنداي يدەولوگيانى قالاي ازىرلەۋگە بولادى؟
مەنىڭ ويىمشا, مىنا ابدەن ماتەريالدانعان الەمدە ءبىزدىڭ رۋحاني قۇندىلىقتارىمىزدىڭ ءوزى ماتەريالدىق يگىلىكتەرگە قاراي نەگىزدەلۋى كەرەك. ايتپەسە, ءار ازاماتتىڭ جۇرەگىندەگىنى قوزعاي الاتىنداي يدەولوگيا تۋدىرا المايسىڭ. اقيقات كىلتىن دە اشا المايسىڭ. ال اقيقات نە دەيدى؟
اقيقات اتا-بابالارىمىزدىڭ سانداعان ۇرپاعىنا ءناسىپ بولعان جانە سولاردىڭ قانىمەن قورعالعان بايتاق دالامىزدىڭ استى-ءۇستى تولعان قازىنا بايلىق ەكەنىن, سول بايلىقتا ءاربىر قازاقستاندىقتىڭ ۇلەسى بولۋعا ءتيىستى ەكەنىن ايتادى. مىنە, وسىنداي ساياسات جۇرگىزگەندە عانا ءبىز دۇرىس يدەولوگيا تۋدىرا الاتىن بولامىز. ارينە, ول ۇلەستىڭ مولشەرى قانداي بولۋى كەرەگىن قازاقستان رەسپۋبليكاسىنىڭ ۇكىمەتى ايقىندايدى. ويتكەنى بۇل بىلىكتى ماماندار مەن ساراپشىلاردىڭ تالقىسىن قاجەت ەتەتىن ماسەلە. شاماسى, بۇل ۇلەستىڭ ءبولىنۋ مولشەرى اركەلكى بولار. ماسەلەن, ءبىر جاس ازامات شەتەلدەن ءبىلىم الىپ كەلىپ, سوعان سايكەس جاڭا ءبىر كاسىپ باستاۋعا نيەتتەندى دەلىك. ارينە, جاڭا كاسىپ كوزىن اشۋ وڭاي ەمەس. ول ءۇشىن سول كاسىپكە لايىق جاڭا تەحنولوگيانى قوسا اكەلۋى كەرەك جانە ءىستى باستاۋ ءۇشىن اينالىم قارجىسى دا قاجەت بولاتىنى تۇسىنىكتى. دەمەك مەملەكەت بەلگىلەگەن يننوۆاتسيالىق باعدارلامالاردىڭ بىرىنە قاتىسىپ جەڭىلدىكتى نەسيە الۋىنا تۋرا كەلەدى. قىسقاسى, ءىستىڭ تاۋەكەلى جوعارى بولعاندىقتان بۇل ازاماتقا كوپ ءبىلىم مەن تاجىريبە, قوماقتى قارجى جانە سانداعان ۇيقىسىز تۇندەرگە سوزىلعان ۇلكەن كۇش-جىگەر قاجەت بولادى. ال ەكىنشى بىرەۋ ازىرگە دۇرىس ءبىلىمى مەن ماماندىعى بولماعاندىقتان سەندەلەكتەپ بوس ءجۇر دەلىك. بىراق ورتاق تابيعي بايلىقتا ونىڭ دا ۇلەسىنىڭ بولۋى ادىلدىك ەكەنى ايقىن.
قاراساڭىز, قازىر الەم مەملەكەتتەرى وسىنداي يدەولوگيامەن ءومىر سۇرۋدە. ءتىپتى بىزبەن كورشى موڭعوليا دا جاڭا پرەزيدەنتتەرىنىڭ جۇرگىزگەن ساياساتىنىڭ ارقاسىندا وسىنداي جولعا تۇسە باستاعان. دەمەك بىزگە دە ماتەريالدىق يگىلىكتەرگە نەگىزدەلگەن ايقىن دا تۇسىنىكتى يدەولوگيا قاجەت. سوندا عانا ءبىز بارشا ازاماتتىڭ پاتريوتتىق سەزىمىن نىعايتىپ, ولاردىڭ ءبارىن ءبىر تۋدىڭ استىندا جينايتىن بولامىز.
