– قاناعات مىرزا, ەلورداعا قوش كەلىپسىز, بۇل رەتكى ساپارىڭىزدىڭ ماڭىزى جايلى تانىستىرىپ وتسەڭىز؟
– ەڭ اۋەلى ايتارىم, قازاق رۋحانياتى ءۇشىن ەرەن ەڭبەك اتقارعان اكەمىز قايىم مۇحامەدحانوۆتىڭ اتىنا ەلوردا تورىنەن كوشە جانە جاڭادان سالىنعان ۇلتتىق گيمنازياعا اتى بەرىلگەنىنە ريزاشىلىق بىلدىرەمىن. سونىمەن قاتار اتالعان گيمنازيا ىشىنەن «قايىم مۇراجايى» جانە « ۇلىلار ەسىمى ۇرپاق جادىندا» اتتى الاش ارىستارىنا ارنالعان اللەيانىڭ اشىلۋىنا بايلانىستى عالىمنىڭ ۇرپاقتارى اتىنان قۇرمەتتى قوناق رەتىندە قاتىسۋعا كەلدىك.
– ۇيىمداستىرىلعان شارا كوڭىلىڭىزدەن شىقتى ما؟
– ءبارى ءبىز ويلاعاننان دا جاقسى ءوتتى. ۇيىمداستىرۋشىلارعا ءوز اتىمنان جانە ۇرپاقتارى اتىنان راحمەت ايتامىن!
– سىزگە جولىعىپ, تىلدەسۋدى كوپتەن بەرى جوسپارلاپ جۇرگەن ەدىك. وعان سەبەپ, ءۇش جىل بۇرىن «قازاقپارات» سايتىنا جاريالانعان «ايگىلى مۇحاممەد ءاليدى ىزدەپ بارىپ «نوكاۋت» العان قازاق» اتتى جازبا مەن وسىندا اتاقتى بوكسشىمەن بىرگە تۇسكەن ءسىزدىڭ فوتوڭىز. وسى وقيعا جايلى بايانداپ بەرسەڭىز؟
– بۇل 1978 جىلى بولعان وقيعا. ايگىلى بوكسشى كەڭەس وداعىنا كەلدى. ول كىسىمەن جولىعۋ ءار جاستىڭ ارمانى بولاتىن. وسىنداي ءبىر ارمان 26 جاستاعى جىگىت مەنىڭ دە كوكەيىمدە ءجۇردى. ويتكەنى مۇحاممەد ءاليدى ءبىز بۇكىل وتباسىمىزبەن جاقسى كوردىك. اكەم دە ەرەكشە قۇرمەت تۇتاتىن. ونىڭ ومىرىنە قاتىستى جاڭالىقتاردى جىبەرىپ الماۋعا تىرىساتىنبىز. وسى كىسىگە ەلىكتەپ مەنىڭ دە بوكسشى بولعىم كەلگەن.
سودان اتاقتى بوكسشىنىڭ تاشكەنتكە باراتىنى جايلى حاباردى «ۆرەميا» باعدارلاماسىنان كورىپ قالدىم دا, قايتكەندە جولىعۋعا بەكىندىم. انام ەكەۋىمىز تاشكەنتكە بارساق, ىزدەپ كەلگەن ادامىمىز سامارقانعا جول العانى جايلى حاباردى ەستىدىك تە, دەرەۋ ۇشاققا بيلەت الدىق. ءبىر عاجابى, ءبىز وتىرعان ۇشاقتىڭ ىشىنە مۇحاممەد ءالي كەلىپ جايعاستى. قولىمدا شاعىن فوتواپپاراتىم بار-تىن. ءسويتىپ, ۇشاق ىشىندە اتاقتى بوكسشىعا جولىعىپ, بىرگە سۋرەتكە ءتۇستىم. مەن مۇحاممەد ءاليدى ساڭلاق سپورتشى عانا ەمەس, عاجايىپ ادام دەپ بىلەمىن. الايدا تاعدىر ءبىزدى اسپاندا, ياعني ۇشاق ىشىندە كەزدەستىردى. كەيدە مۇمكىن ەمەس جايلار دا مۇمكىن بولادى ەكەن. بۇل ادامنان جولىقپاي تۇرىپ, ونىڭ «وگونەك» جۋرنالىندا جاريالانعان فوتوسۋرەتتەرىن قيىپ العانىم بار ەدى. بوكسشىعا سولاردى كورسەتتىم. ءبارىن مۇقيات قاراپ شىعىپ, اربىرىنە قولتاڭباسىن قالدىردى.
ر.S. جوعارىداعى وقيعانىڭ جالعاسى بار كورىنەدى. بۇل سۋرەتتەردى 2005 جىلى اقش ەلىنە ءبىلىمىن جەتىلدىرۋگە بارعان دينا قايىمقىزى اعاسىنىڭ اتاقتى بوكسشىمەن بىرگە تۇسكەن تاريحي فوتولارىن تانىستارى ارقىلى اريزونا شتاتىنداعى نەۆرولوگيالىق ينستيتۋتتىڭ مۇحاممەد ءالي اتىنداعى پاركينسون ورتالىعىنا تابىستاپتى. بۇل سۋرەتتەر قازىر ارنايى تاقتاعا ورناتىلىپ, ينستيتۋت قابىرعاسىنا ءىلىنىپ قويىلىپتى.
