ء«بىز قازىر «اتىراۋ - استراحان» تاسجولىندا تۇرمىز. جولدىڭ جالپى ۇزىندىعى - 277 شاقىرىم. ونىڭ ىشىندە 60 شاقىرىمىنا بۇگىندە اسفالت توسەلدى. قازىر قالعان 217 شاقىرىم جولدى قايتا جوندەۋ جۇمىسى ءجۇرىپ جاتىر. جول جوندەۋ جۇمىستارى 4 ۋچاسكەگە بولىنگەن. 500-دەن استام جۇمىسشى 400 شاقتى تەحنيكانىڭ كومەگىمەن ەڭبەكتەنىپ جاتىر. قۇرىلىس ماتەريالدارى كورشى ماڭعىستاۋ جانە اقتوبە وبلىسىنان جەتكىزىلەدى. ماتەريال جەتكىزۋدە ۆاگون سانىنىڭ ازدىعى بايقالادى. جول ۇزاق, كەيبىر ايماقتارعا تەمىرجول قاتىناسى بارمايدى. بۇعان دەيىن «اتىراۋ - استراحان» ءۇشىنشى ساناتتى بولسا, ەندى ەكىنشى ساناتتاعى تاسجول سالىنىپ جاتىر. جولدىڭ ەنى بۇرىن 7 مەتر بولسا, ەندى 9 مەترگە جەتەدى», دەدى بولاتبەك ايتبەكوۆ باق وكىلدەرىنە ارنالعان تۋر بارىسىندا.
فيليال باسشىسىنىڭ دەرەگىنشە, بيىل اتىراۋ وبلىسىندا جول سالۋ جانە جوندەۋ جۇمىستارىنا 30 ملرد تەڭگە قارجى بولىنگەن.
«بۇل جولدى سالۋ 2020 جىلى باستالعان. دەگەنمەن جوبادا جەرگىلىكتى جەردىڭ ەرەكشەلىگى ەسكەرىلمەگەن سوڭ مەردىگەر كومپانيالار جوبانى قايتا قارادى. بيىل جىل سوڭىنا دەيىن اسفالت توسەپ پايدالانۋعا بەرەمىز دەپ جوسپارلاپ وتىرمىز. بۇل جەردە باستى ماسەلە - قۇرىلىس ماتەريالدارى ۋاقىتىلى جەتسە جانە اۋا رايى قاراسىپ تۇرسا بولعانى», دەيدى ول.
ايتا كەتەيىك, «قازاۆتوجول» ۇلتتىق كومپانياسى «اقتوبە – ورال – اتىراۋ» باعىتىنداعى رەسپۋبليكالىق ماڭىزى بار جولدارداعى ىستەلىنىپ جاتقان جۇمىستار بويىنشا باق وكىلدەرىنە ارنالعان تۋر ۇيىمداستىردى.
