بۇل وزگەرىستى كورسە دە كوپ ادام ءمان بەرگەن جوق, ارتىنان ينتەرنەت كەلدى, جازۋ مانەرى وزگەردى, ەكى بۋىن اراسىنداعى ءداستۇر ءۇزىلدى, لەكسيكالىق قور بايىدى, قيمىل-قارەكەت باسقا اتاۋلار تاپتى.
ەشكىم ەشتەڭە اڭعارىپ ۇلگەرگەن جوق, جاڭا زامان ورنادى دا قالدى. بۇگىنگى باسپاسوزدەن, جالپى, باق-تان شۇرايلى ءتىل كەتتى. ساراشىلار قۇنارلى ءماتىن كورسە, جاۋ كورگەندەي الەمتاپىراق بولادى. تەحنولوگيا بىزدەن ۋاقىتىمىزدى تارتىپ الىپ جاتىر. كۇنىمىز سمارتفونعا قاراپ قالدى. تىكەلەي تىلدەسۋ جويىلدى. الەۋجەلىلەردى اشساڭ, كۇنى-ءتۇنى بىتپەيتىن ءبىر كارناۆال. شوۋ. ويىن-توي.
بىراق كوزسىز باتىرلار دا بار ەكەن. بۇگىنگى زاماننىڭ اقكوڭىل, ادال جۇرەكتى دون-كيحوتتارى دا بار بولىپ شىقتى. اعىسقا قارسى جۇزەتىن جۇرەك جۇتقاندار دا بار ەكەن. مەن بولات شاراحىمباي بويىنداعى, قالامىنىڭ ۇشىنداعى شىنايىلىقتى, ادالدىقتى اسا جوعارى باعالايمىن.
قازىر سەنەتىن اۆتور جوق, ءبارى باسقا ءبىر قۋلىق-سۇمدىقتارمەن اۋىز جالاسىپ جاتىر.
جازعانىنىڭ جارتىسى وتىرىك. «جالعان سوپى سۋدىڭ سورى» دەگەندەي, ءماشھۇر ءجۇسىپ. ماتىننەن شىنايىلىق كەتتى. تەحنيكالىق تالاپتاردى مەڭگەرگەن, ستيلدەردى يگەرگەن كاسىبي دە كانىگى قالامداس ارىپتەستەر ءبىر شوعىر.
ساياسي ويىندار ادەبي ويىندارعا دەيىنگى دياپازوندى قامتىدى. كۇشەيدى. ماراپات تا ويىن, ماحاببات تا ويىن, قىزمەت تە ويىن. سايكەسىنشە, قوس تاراپتا – تولعان ويىنشىلار. بولات – ناعىز, تازا كوسەمسوزشى. ول قوعام الدىنا وتكىر ماسەلە قويا بىلەدى. جاريالاعان دۇنيەلەرى تالقىعا ءتۇسىپ جاتادى. جانە ءبارى شىنايى, جاساندىلىق جوق. شىن دەگەن ءسوز قولدانىلماي كەتكەلى قاشان, ادامدار مازمۇنى مەن ماعىناسىن ۇمىتىپ قالعان ءتارىزدى. ويتكەنى شىنىڭدى ايتساڭ, ءبىزدىڭ قوعام كۇلەدى. سوندىقتان ءبىر-بىرىڭە جالعان سويلەسەڭ, كولگىرسىسەڭ الدەقايدا تيىمدىرەك. كىتابى شىن نيەت, اق تىلەكپەن جازىلعانى كورىنىپ تۇر. تەرەڭ ماعىنالى ماقالالارعا تولى. ماڭىزى زور. ۇلتتىق ماسەلەلەر, ەلدىك تاقىرىپتار, اۆتوردىڭ پوزيتسياسى اشىق, ەشتەڭە جاسىرمايدى, ناقتى, نىق, ول – ەلىنە, ۇلتىنا ەشقاشان وتىرىك ايتا المايدى.
ديدار امانتاي
