سەمەيگە جۇمىس ساپارىمەن كەلگەن پرەزيدەنت اكىمشىلىگىنىڭ باسشىسى مۇرات نۇرتىلەۋ ءوڭىردىڭ بارلىق دەڭگەيدەگى ءماسليحاتتارىنىڭ جيىنىنا قاتىسىپ, اباي وبلىسىنىڭ اكىمى لاۋازىمىنا ۇرانحاەۆ نۇرلان تەلمان ۇلى مەن سمايىلوۆ اسحات سايداحمەت ۇلىنىڭ كانديداتۋرالارىن ۇسىنۋ تۋرالى مەملەكەت باسشىسىنىڭ حاتىن وقىپ بەردى.
ناتيجەسىندە, 25 دەپۋتات ا.سمايىلوۆتى قولداسا, 89 دەپۋتات ن.ۇرانحاەۆتى قولداعان. كوپشىلىكتىڭ قولداۋىمەن 11 ماۋسىم كۇنى نۇرلان تەلمان ۇلى اباي وبلىسىنىڭ اكىمى لاۋازىمىنا تاعايىندالدى. ءتيىستى جارلىققا پرەزيدەنت قاسىم-جومارت توقاەۆ قول قويدى.
اباي وبلىسىنىڭ تۇڭعىش اكىمى نۇرلان ۇرانحاەۆ 1987 جىلى ۆ.ي.لەنين اتىنداعى قازاق پوليتەحنيكالىق ينستيتۋتىندا ينجەنەر-مەحانيك, 2001 جىلى قازاق قارجى-ەكونوميكالىق ينستيتۋتىندا ەكونوميست-مەنەدجەر, 2006 جىلى شىعىس قازاقستان مەملەكەتتىك تەحنيكالىق ۋنيۆەرسيتەتىندە ينجەنەر-قۇرىلىسشى ماماندىعى بويىنشا تامامداعان. كەيىنگى جىلدارى سەمەي قالاسىنىڭ «كازپرومتەحمونتاج» كاسىپورنىندا ماستەر, پروراب بولىپ جۇمىس ىستەگەن. ءار جىلدارى سەمەي قالاسىنداعى «سارى-ارقا» اوك باسشىسى, «كازيركۋتسكلەس» اوزت باس ديرەكتورى, شىعىس قازاقستان وبلىسى ەنەرگەتيكا, تۇرعىن ءۇي-كوممۋنالدىق شارۋاشىلىق, قۇرىلىس جانە كولىك باسقارماسىنىڭ باسشىسى, شىعىس قازاقستان وبلىسى كۇردەلى قۇرىلىس باسقارماسىنىڭ باستىعى, شىعىس قازاقستان وبلىسى اكىمىنىڭ ورىنباسارى, استانا قالاسىنىڭ تجم مەملەكەتتىك ماتەريالدىق رەزەرۆى كوميتەتىنىڭ توراعاسى, قازاقستان رەسپۋبليكاسى پرەزيدەنت اكىمشىلىگىندە مەملەكەتتىك ينسپەكتور, «ەرتىس» اكك باسقارما باسشىسىنىڭ ورىنباسارى, قىزىلوردا وبلىسى اكىمىنىڭ ورىنباسارى, سەمەي قالاسى گۋمانيتارلىق زاڭ ۋنيۆەرسيتەتى پرەزيدەنتى كەڭەسشىسى, قازاقستان رەسپۋبليكاسى تۇتىنۋشىلاردىڭ قۇقىقتارىن قورعاۋ اگەنتتىگى توراعاسىنىڭ ورىنباسارى, ۇلتتىق ەكونوميكا مينيسترلىگىنىڭ «قازقسعزجي» اق باس ديرەكتورى, الماتى قالاسى ساۋلەت جانە قالا قۇرىلىسى باسقارماسىنىڭ باسشىسى قىزمەتتەرىن اتقارعان.
بۇگىنگە دەيىن نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى بولىپ قىزمەت اتقارعان.
اباي وبلىسى
