15 ماۋسىمدا 30 جاسقا تولعالى وتىرعان قورلان جاقانشا 2018-2020 جىلدار ارالىعىندا وتە ساپالى كۇرەس كورسەتتى. سول كەزدەرى ول الەم چەمپيوناتىندا كۇمىس السا, ازيا بىرىنشىلىگىندە ءۇش رەت قولا مەدالدى موينىنا ءىلدى. سوڭعى كەزدەرى قانداسىمىزدىڭ شابىسى ءبىراز باياۋلاپ قالعان سىڭايلى. دەسەك تە 55 كيلو سالماقتا سايىسقا ءتۇسىپ جۇرگەن سايىپقىراندار اراسىندا قورلان جەتىنشى ورىندى يەلەنۋدە. بۇل – قازاقستاننىڭ بالۋاندارى اراسىنداعى ەڭ جاقسى ناتيجە.
67 كيلو سالماقتاعى المات كەبىسباەۆتىڭ باعىندىرعان بەلەستەرى ءبىر توبە. UWW رەيتينگىندە توعىزىنشى ورىندا تۇرعان ول الەم (1 كۇمىس+4 قولا) جانە قۇرلىق (2 التىن+3 كۇمىس) چەمپيوناتتارىندا بەس رەتتەن جەڭىس تۇعىرىنا كوتەرىلدى. ازيا ويىندارىنىڭ ەكى دۇركىن جۇلدەگەرى دەگەن اتاعى تاعى بار. دەسەك تە المات بىلتىر ۇلكەن سپورتپەن قوش ايتىسقانىن رەسمي تۇردە جاريا ەتتى. ياعني ەندى ونىڭ الەمدىك رەيتينگتە جوعارىلامايتىنى انىق. ازيا چەمپيونى دەگەن اتاعى بار 87 كيلو سالماق دارەجەسىندە كۇرەسەتىن نۇرسۇلتان تۇرسىنوۆقا دا توعىزىنشى ورىن بۇيىردى. ال اسا جەڭىل سالماقتاعى امانعالي بەكبولاتوۆ ۇزدىك وندىقتى تۇيىندەۋدە.
كەلەسى وندىققا كەلەتىن بولساق, بۇل تىزىمنەن ءبىراز جەرلەسىمىزدىڭ اتى-ءجونىن كەزىكتىرۋگە بولادى: ابىلايحان امزەەۆ (72 كيلو) – 11, دەمەۋ جادىراەۆ (77 كيلو) – 11, مارلان مۇقاشەۆ (55 كيلو) – 13, دياس قالەن (82 كيلو) – 14, مەيرامبەك ايناعۇلوۆ (63 كيلو) – 15, ءالىمحان سىزدىقوۆ (130 كيلو) – 15, ەرنۇر فيداحمەتوۆ (60 كيلو) – 16, ازات سادىقوۆ (72 كيلو) – 17, تەمىرلان شادۋكاەۆ (77 كيلو) – 18 جانە مەيىرجان شەرماحانبەت (67 كيلو) – 20 ورىن.
توپ-10 گرەك-ريم كۇرەسى شەبەرلەرىنىڭ تىزىمىندە رەسەيدىڭ قاراسى مول. بۇل ەلدىڭ 11 وكىلى ۇزدىكتەر رەيتينگىندە. ەكىنشى ورىندا – تۇركيا. انادولى ەلىنىڭ توعىز ءاپايتوسىنىڭ تاسى ورگە دومالاپ تۇر. سەگىز سەركەسىنە سەنىم ارتقان ازەربايجان ءۇشىنشى ساتىعا جايعاستى. ودان كەيىنگى ورىنداردا مىنا مەملەكەتتەردىڭ بالۋاندارى: يران – 7, گرۋزيا, گەرمانيا – 6, جاپونيا, ماجارستان, پولشا – 5, ارمەنيا, قازاقستان – 4, قىرعىزستان, مولدوۆا, ۋكراينا – 3, نورۆەگيا, فينليانديا, سەربيا, كۋبا – 2, قىتاي, ءۇندىستان, وڭتۇستىك كورەيا, رۋمىنيا, مىسىر, ليتۆا, پولشا, شۆەتسيا, ەستونيا, بەلارۋس, دانيا, اقش, بولگاريا جانە چيلي – 1.
ال جەكەلەگەن سالماق دارەجەلەرىندە ەكى-ەكىدەن يران, گرۋزيا جانە ازەربايجاننىڭ بالۋانى الەمدىك رەيتينگتە جەكە-دارا كوش باستاپ تۇر. تارقاتىپ ايتساق, پارسى ەلى وكىلدەرى اراسىندا مۇحاممادرەزا گەراەي مەن مۇحاممادحادي ساراۆي الدىنا جان سالار ەمەس. 67 كيلو سالماقتا كۇش سىناساتىن 25 جاستاعى گەراەي سوڭعى وليمپيا ويىندارى مەن الەم چەمپيوناتىندا قارسىلاس شاق كەلتىرمەدى. بىراق تاياۋدا عانا الماتىدا وتكەن بولات تۇرلىحانوۆتى ەسكە تۇسىرۋگە ارنالعان حالىقارالىق تۋرنيردە ءبىزدىڭ مەيىرجان شەرماحانبەتتەن جەڭىلگەنىن ءدۇيىم جۇرت كوردى. 97 كيلو سالماقتا ايقاساتىن 23 جاستاعى ءساراۆيدىڭ الەم جانە ازيا چەمپيونى, توكيو وليمپياداسى مەن الەم كۋبوگىنىڭ قولا جۇلدەگەرى دەگەن تولىپ جاتقان اتاقتارى بار.
گرۋزيانىڭ دۇلدۇلدەرى لەرري ابۋلادزە مەن ياكوب كادجايا ەكەنى داۋسىز. ادجاريادا تۋىپ-وسكەن 23 جاستاعى ابۋلادزە بىلتىر وسلوداعى الەم چەمپيوناتىندا كۇمىس السا, بيىل ۆارشاۆادان ەۋروپا چەمپيونى اتاندى. 28 جاستاعى كادجايا وليمپيادا, الەم جانە قۇرلىق چەمپيوناتتارىنىڭ جۇلدەگەرى, ەۋروپا ويىندارىنىڭ جەڭىمپازى اتاندى. ازەربايجاننىڭ سەنىم ارتقان سەركەلەرى سانان سۋلەيمانوۆ پەن رافيگ گۋسەينوۆ ەكەنى ءسوزسىز. العاشقىسى 25 جاستا, ەكىنشىسى 34-تە. سۋلەيمانوۆ 2020 جىلى ەۋروپا چەمپيوناتىندا تەڭدەسسىز دەپ تانىلسا, بىلتىرعى دۇنيەجۇزىلىك دودادا كۇمىسپەن كۇپتەلدى. سوڭعى ەكى جىل قۇرلىقتىڭ باستى جارىسىندا قولا مەدالدى موينىندا جارقىراتتى. ال گۋسەينوۆ بولسا, الەم جانە ەۋروپانىڭ ءۇش دۇركىن چەمپيونى اتانىپ, توكيو وليمپياداسىندا ءۇشىنشى ورىنعا تۇراقتادى.
55 كيلو سالماقتا جاپونيالىق كەن ماتسۋي كوش باستاپ تۇر. 21 جاستاعى حونسيۋ ارالىنىڭ تۋماسى بىلتىرعى الەمدىك دودادا دارا شىقتى. 60 كيلو سالماقتا ۆيكتور چوبانۋ شاشاسىنا شاڭ جۇقتىرار ەمەس. بيىل كۇزدە 30 جاسقا تولعالى وتىرعان مولدوۆانىڭ مارقاسقاسى دا وسلودا الەم چەمپيونى اتانعان ەدى. ودان بولەك, ول 2018 جىلعى دۇنيەجۇزىلىك بىرىنشىلىكتىڭ فينالىنا شىعىپ, قۇرلىق چەمپيونى, ەۋروپا ويىندارى مەن دۇنيەجۇزىلىك ۋنيۆەرسيادانىڭ جۇلدەگەرى دەگەن اتاقتارعا قول جەتكىزدى. 72 كيلو سالماقتا كريستۋپاس شلەيۆا مىقتى بولىپ تۇر. 26 جاستاعى ليتۆانىڭ ءاپايتوسى الەم جانە قۇرلىق چەمپيوناتتارىندا ءۇشىنشى ورىندى ەنشىلەگەن. 87 كيلو سالماقتا زۋراب داتۋناشۆيلي دارا تۇر. 31 جاستاعى سپورتشى سەربيانىڭ تۋى استىندا ونەر كورسەتىپ جۇرگەنىمەن, ونىڭ تەگى گرۋزين ەكەنىن اتى-جونىنەن-اق بىلۋگە بولادى. داتۋناشۆيلي توكيو وليمپياداسىندا قولا مەدالدى ولجالاپ, الەم چەمپيوناتىندا ءبىر جانە ەۋروپا بىرىنشىلىگىندە ءۇش رەت باس جۇلدەنى يەلەندى. مىنە, بۇگىنگى تاڭدا الەمدىك رەيتينگتە كوش باستاپ تۇرعان گرەك-ريم كۇرەسى شەبەرلەرى وسىلار.
