جەڭىسكە تاباندىلىق جەتىسپەدى

بۇعان دەيىن جازعانىمىزداي, ۋەفا شەشىمى بويىنشا بەلارۋس قۇراماسى بيىلعى ۇلتتار ليگاسىنىڭ ءوز الاڭىنداعى ويىندارىن سەربيانىڭ سولتۇستىگىندە ورنالاسقان شاعىن قالاداعى بەيتاراپ الاڭدا وتكىزۋگە ءماجبۇر. وعان الەمدە بولىپ جاتقان ساياسي جاعداي تىكەلەي اسەر ەتىپ وتىر. سونىمەن قاتار ۋەفا بەلا­رۋس قۇراماسىمەن وتەتىن كەز كەلگەن ويىنعا جانكۇيەرلەردىڭ دە كىرۋىنە قاتاڭ تىيىم سالعان.

ۋەفا-نىڭ تىعىز كۇنتىزبەسىنە ساي­كەس ءار ەكى-ءۇش كۇن سايىن ماتچ وتكىزىپ جاتقان قۇرامالارعا اتالعان ءتۋرنيردىڭ بيىلعى ماۋسىمى وتە قيىنعا سوعىپ جاتقانى ايتپاسا دا تۇسىنىكتى. دەگەنمەن ءتۇرلى كە­دەرگىلەرگە قاراماستان, قازاقستان قۇ­را­ماسىنىڭ فۋتبولشىلارى ءار تۋر سايىن ءوز جانكۇيەرلەرىن ناتيجەلى ويىنىمەن قۋانتىپ كەلەدى. ەلورداداعى العاشقى تۋردا ازەربايجان (2:0) قۇراماسى مەن ەكىنشى تۋردا سىرت الاڭدا سلوۆاكيانى (1:0) سان سوقتىرعان موگامەد اديەۆ شاكىرت­تەرى جۇمادان سەنبىگە قاراعان ءتۇنى قازاقستان ءۇشىن الىنباس قامالعا اينالعان بەلارۋس فۋتبولشىلارىمەن تەڭ وينادى. ەكى ەلدىڭ قۇرامالارى بۇگىنگە دەيىن رەسمي ماتچتا ءتورت مارتە كەزدەسىپ, سونىڭ بارلىعىندا بەلارۋس قۇراماسىنىڭ مەرەيى ۇستەم بولعان ەدى.

ۇلتتىق قۇراماعا باس باپكەر بولىپ تاعايىندالا سالىسىمەن جانكۇيەرلەردىڭ نارازىلىعىنا ۇشىراعان ماگومەد اديەۆ ءار ماتچ سايىن ماڭىزدى شەشىمىمەن جان­كۇيەرلەردى دە, فۋتبول ماماندا­رىن دا قۋانتىپ جاتىر. ماسەلەن, ازەر­باي­جانمەن بولعان ويىندا الاڭعا بەس بىردەي قورعاۋشىنى شىعارسا دا, ەكى قاپ­تالداعى ەكى قورعاۋشىنى ءجيى شابۋىلعا ارالاستىردى. سلوۆاكياداعى ويىندا نەگىزىنەن قورعانىسقا كوبىرەك كوڭىل ءبولدى. ال بەلارۋسپەن بولعان ويىندا تاعى دا العاشقى تۋردىڭ تاكتيكاسىن ۇستانىپ, ءبىرىنشى مينۋتتان باستاپ شابۋىلعا دەن قويدى.

نوۆي-سادتاعى نوسەرلى جاۋىن ماتچ جىل­دامدىعىنا, ويىن بارىسىنا اي­تارلىقتاي كەرى اسەرىن تيگىزدى. كەزدە­سۋدىڭ العاشقى 10 مينۋتىندا ەكى ەل­دىڭ فۋتبولشىلارى دا كوگىلدىر ەكرانعا كوز تىككەن كورەرمەندەردى ەلەڭ ەتكىزەتىندەي بىردە-ءبىر قاۋىپتى شابۋىل ۇيىمداستىرا المادى. تەك 13-مينۋتتا ابات ايىمبەتوۆتىڭ گولىنان كەيىن عانا ويىن جاندانا باستادى. سول قاپتالدان يان ۆوروگوۆسكيدىڭ اۋەلەتە اسىرعان پاسىنا ءبىرىنشى جەتكەن ايىمبەتوۆ باسپەن كەزەكتى گولىن سوقتى. بۇل – اباتتىڭ العاشقى ءۇش ويىنداعى ءۇشىنشى گولى. وسى ناتيجەسىنىڭ ارقاسىندا ول ۇلتتار ليگاسىنىڭ سۇرمەرگەندەر قاتارىنا قوسىلدى.

ارادا بەس مينۋت وتكەندە الاڭ قو­جايىن­دارىندا ەسەپتى تەڭەستىرەتىن تاماشا مۇمكىندىك بولعان ەدى. الاي­دا جاڭبىردان كەيىنگى الاڭنىڭ تايعا­ناقتىعى بىزگە اجەپتاۋىر كومەكتەستى. ال ويىننىڭ 34-مينۋتىنداعى قارىمتا شابۋىل كەزىندە ۇلتتىق قۇرامانىڭ دەبيۋتانتى ەلحان استانوۆ گول سوعاتىن ۇرىمتال ءساتىن ءمۇلت جىبەرىپ الدى.

ۇزىلىستەن كەيىن قازاقستان قۇرا­ما­سىندا ەسەپتى ەسەلەيتىن, بەلارۋس فۋتبولشىلارىندا تارازى باسىن تەڭەستىرەتىن بىرنەشە مۇمكىندىك بولدى. كەي ساتتە شابۋىلشىلاردىڭ تەپكەن دوبى قاقپادان قيىس كەتسە, ەندى بىردە قورعاۋشىلار مەن قاقپاشىلار قىراعىلىق تانىتتى. الايدا ماتچتىڭ اياقتالۋىنا بەس مينۋت قالعاندا بەلارۋس فۋتبولشىلارى بۇرىشتامادان گول سوعىپ, ەسەپتى تەڭەستىردى. گولدىڭ اۆتورى – ۆلاديسلاۆ ميلۆەۆيچ. ماتچتىڭ سوڭعى مينۋتتارىندا ميلۆەۆيچ ءدۋبلدىڭ اۆتورى اتانۋى مۇمكىن ەدى. بىراق شابۋىلشىنىڭ تەپكەن دوبى قاقپا باعانىنا ءتيىپ, الاڭ سىرتىنا شىعىپ كەتتى. وسىلايشا, قازاق­ستان قۇراماسى ءوز تاريحىندا العاش رەت بەلارۋس فۋتبولشىلارىمەن تەڭ وينادى – 1:1. ال ءبىزدىڭ توپتاعى ەكىنشى ويىن­دا ازەربايجان قۇراماسى ءوز الاڭىندا سلوۆاكيانى قابىلداپ, 0:1 ەسەبىمەن جەڭىلىپ قالدى. قوناقتاردىڭ جەڭىس گولىن ويىننىڭ 81-مينۋتىندا «قايراتتىڭ» بۇرىنعى سلوۆاكيالىق باس باپكەرى ۆلا­ديمير ۆايسستىڭ ۇلى ۆلاديمير ۆايسس سوقتى.

ءۇشىنشى تۋر ويىندارىنان كەيىن ۇلتتار ليگاسىنىڭ «س» ديۆيزيونىنداعى ءۇشىنشى توپتىڭ تۋرنير كەستەسىندە 7 ۇپاي جيناعان قازاقستان قۇراماسى ءالى دە جەكە-دارا كوش باستاپ كەلەدى. ەكىنشى ورىنعا 6 ۇپاي جيناعان سلوۆاكيا قۇراماسى جايعاستى. ال قورجىنىندا 2 ۇپايى بار بەلارۋس ءۇشىنشى, 1 ۇپايى بار ازەربايجان ءتورتىنشى ورىنعا تۇراق­تاعان.

جەرلەستەرىمىز كەلەسى كەزدەسۋىن بۇگىن «استانا ارەنادا» سلوۆاكيا قۇرا­ما­سىمەن وتكىزەدى. ويىن ەلوردا ۋا­قىتىمەن 20:00-دە باستالادى. ايتا كەتەيىك, بۇل ويىنعا قازاقستان قۇراما­سى­نان ەكى سارى قاعازى بار يسلامبەك قۋات, ال قوناقتار ساپىنان جاراقاتىنا باي­­لا­نىس­تى كوماندا كاپيتانى ميلان شكرينيار قاتىسا المايدى.